¹ 'Yɨgira we təmri wʊ ka Ekkilisiya Afisai mʊla: 'Bwantəte ta wa tau betə swangngi nyibi a kang kə nyang ka gəngngi. Wʊ yoyom a jʊgər da gʊn təgga gʊngortətta kərangngi tən wetəttə kəlchə- kəlchi nyibiyʊ. ² Kən yəm jɨni nəngngai, rə kʊnang kən nong, na mitang ka dang ka mʊng, kən yəm me mən mida rə nəbbə bwiram. Kən yəm kən bɨngo bə sʊwe rə go tən bwiranəm na mənni me nyangngəm, kən yəm mo nəbbə kəra nyattəm. ³ Kən yəm ka mənnə mitangnga da rə kwani. Mənni bo, kən no kunang dəni bərarə dʊn da miyən, mənni gɨbbe. ⁴ Mənni nwi bə lammang nən mwe, bəraki kən dʊ yodai ya mʊ rə jigʊwi. ⁵ Kəmma rə gʊ yarwi, bukang na nəngnga jɨni nəngnga rə jigɩïịɨĩwi, bukang, bə be nən, jəgmən gʊngor da kərangngən da mʊn a gʊ chirang gʊ. ⁶ Ka mənnə wai yobi we, kən kwila jɨni Nikolatawa nəngngari, yə mərə kinang kwilai. ⁷ Wʊ karə suniyʊ a nwi ji we sotənna Ekklisiayai. Wa jau kʊnni, bən ne da a jau beta rəyang ka yuumuməng, kə jɨrəra mʊra fardausi ya Niyajiyʊwiyəng. ⁸ ''Yɨgi ra we təmri wʊ Ekklisiya Samirna, mʊla: 'Bam be gən bwante tə rə jɨgʊwi, na ta mwatənti, wʊ ka bwiya na kauwe bwi rə yuumumi: ⁹ ''Kən yəm kunang ka mʊng na bʊnən da mʊn; mənni ka mənnə gənna. Kən yəm bə lʊgtə dʊn go tən Yahudawam mənni me nyangngəm. Ekklisiya Chetanni. ¹⁰ Kari bən nwi tata kʊnang kə bən nwi a kak gəng, jəga; Chetan kə farə go gə mai bagi ba jɨnəm a mʊra jarəm, go na gə bɨngogən, bətə no kʊnang ka kotə kwʊwʊng. Tə nəngnga jiya dautən wi yɨgira bwiyate, bən nəggən gʊrmʊng ka yuumumməng. ¹¹ Wʊ karə suniyʊ a nwi ji we sotənna Ekklisiya. Wa jau kʊnni, bwiyatən sʊwi me ba nəngnga tən yarri.'''' ¹² Yɨgira we ka Ekkilisiya Bʊrgamasi, mʊla: Tai bwantəte ta wʊ kari dampo rə nyini təsʊwi. ¹³ ''Kən yəm gʊn chiwi, a gʊrə a gwa dəntələn da Chetani kawi. A nyangngi kən tau dʊn da miyən rə kʊmni. Kən yəm, nəngnga bə bʊri a ne tang a yəm bə nyam ba miyəm, me nyəra jii Antifas ni ya bʊ bukka miyəng a dautən wi, wʊn nga rəgi, wʊn ju a jʊgər da jɨnənni, a gʊre gʊn Chetan a chiwi. ¹⁴ Bʊnai ya nwitang a ləmmang ka miyən nən mwe: ka mənnə bagi ba mʊm bə ka tau məssarang ka Bala'aməm kəng kangngəm, wa məssatənna Balak go ti jiya təltangnga nai a kak ka bətəm ba Israilami, go na jau jɨni bwangtənna yəttənati, na bo nəngnga talti. ¹⁵ Nyang bo bagi ba jɨnəm ka tau məssarang ka Nikolotawan kəngkang. ¹⁶ Bərari nyang, tə bukang! Kwila ki bən be mwi rə kwa, nəngnga kun nən jɨn rə dampo ka miya nyiyʊ. ¹⁷ Masi wʊ kari suniyʊ a kautən suu a ji we sotənna Ekklisiyai. Wa jau kʊnni, bən ne Manna kəllʊkəllʊwi, bən ne wer də kwauwʊn də rə dʊn də fiyən mʊlatənna werhən, dʊn də me ni ya yəmmən bwigi wa yʊwi.'''' ¹⁸ Yɨgira we Ekklisiya Tiyatirai mʊla: 'Taite gən bwantəta yəlla Niyajiyʊwi, wʊ kari kəmte nyəra səllən da kərangngəni narə nyəra nəbri summa kərangngi: ¹⁹ ''Kən yəm jɨn nəngngai: yəm bə nyam rə kʊmni na mitang ka dang ka mʊng kə wululong. Kən yəm ji nəngnga langbə ka li ji nəngnga rə jigʊwi. ²⁰ Bʊnai ya nwitang ka ləmmangngəng ka miyəng nən mwe mo: Kən, mida rə nyʊi bərə mo Jezebelli, wʊ bərə dʊr da gən go nyʊi yʊwe yəmmi, a mʊra məssarang ka gəng, jʊlla bwiranəm ba miyəm go nəngnga talte na jau jɨni bwangtənna yəttənati. ²¹ kən ne fʊlla mo na bukang, mənni ka kwila, me bə farə go gə bukang gə dʊ taltətta gʊ. ²² Jəga! Bən mai hangʊ a sweta bwati, ba nəngnga taltə kinəm ba dɨgiya kʊnang rə kwani, mənni ki ba bukang rə swiyete ta jiyʊ ki. ²³ Bən bau bətəm ba gəm rə bwiyate. Ekklisiya warigʊ ba yəm go mənni sənna kəmmarang ka furiyəngngi. Bən ne wʊnə jɨnʊ a səttəna jiya nəngngai. ²⁴ Mənni bagi bə ka mʊra Tayatiram, nən wʊna tabbə məssarang kang ki, na yəm bə jɨni bagi bərə go, jɨni wululoi ya Chetanni-jɨn mən sʊwe mo nəggən be gʊ nəggənni. ²⁵ Bərarə nyang tə si rə kʊmni yɨgira betang ka miyəng. ²⁶ Wa jau kun na wa nəngnga ji nəngngai yɨgira jitangngi, bən ne grata jiya təm bə kunnəm. ²⁷ 'Ba nəngnga dʊʊte rə da mʊnən də ba bʊsa nyəra setetta təllai.' ²⁸ Nyəra kən yʊwe gəra gwa Temiyʊwiyəng, mərə kinang bən ne betə swangngi ya təmsilanəmmi. ²⁹ Masi wʊ rə suniyʊ a nwi ji we sotənna Ekklisiyai.''''