¹ Kən chu ji tə fi tən gʊsətəttə fiyəng, bərakə ji tərə jigʊwi tən gʊsətərə jigʊwi ka suu, mənni wimang mewe. ² Kən chu bɨr də yʊlgoin, Urshalima fi, da sʊwe wa ji a gwa Niyajiyʊwiyən, yəngna nyəra bwiwʊn nəngngatən məksa bɨri bariyʊ. ³ Kən nwi gən da jirən a gʊ chiri gra sʊwe rə go, ''Chu! Gʊ chiriya Niyajiyʊwi ka tən nəbbə kunəm, ba chiro kin. Ba yullo nəbba gəm. Niyajiyʊ rə bwigo ba be a gwan jiyʊ ki ka yullo Niyajiyʊwan jiyʊ bo. ⁴ Ba tʊrsamən betəkəmmai ya kəmtan jiyʊwi warigʊ, ki me bwiyatə wʊbbo, rə fur də yuumllʊwʊn, rə wite, na kʊnnang. Jɨni fʊni ka suu. ⁵ Gə wa chiya gʊ chiri grai go, ''Chu! Kən wʊlga wʊnə ji a yullo wʊ fi. ''Ka sʊwe go, ''Mʊlla bwantətte bərakə bwanti taite kəngnga rəge rə yəmbə nyam.'' ⁶ Ka swimən go, ''Yai jɨni yaiye kən mwarmən! mə mən Alpha na Omega, jɨgʊ tən mwatənte. Wʊ nwi hi kʊgriyʊ bən ne nətte a gwa kəmmiya hiyʊ wa yuumumi. ⁷ Wa jau kumni, ba jau kʊlla a yai jɨni yaiyi, mə bo bən yuumllʊ mən Niyajiyʊ wan gʊ, ki hangʊ ka yuumllʊ yəllamiyʊ. ⁸ Mənni a gwa bərə tatəmmi, rə ba nəbən bə yəmbə nyammi, rə bə sirəmməm, rə bə juwʊ nəbbəm, rə talbe, rə bə barrə təmməm, rə bə ne gratə yetənatəm, rə bə kərra nyatəm warigʊ, gʊ chiriyan jiyʊ ba yullo a mʊra la wʊ jarə rə kərang kə kwauwʊngngi. Bwiyatən sʊwi.'' ⁹ Kwan a mʊra weni təmri yə nyibiyʊ ye, ka be a gwa miyʊ, wʊ rə nəbri nyibi a kang ka gəngngi a ri rə kʊnang tə nyibi ya mwatənti, go, ''Be gwe. Bən nʊnggən bwiwi, nyiya be Bənglai.'' ¹⁰ Ka dəbbiya mʊra weng yɨgira kagi bang kə pəlləng, ka nʊngngi bɨrdə yʊlgonəng, Urshalima, sʊwera ji a gwa Niyajiyʊwi. ¹¹ Urshalima karə gratə ta Niyajiyʊwi, kummur dan gən nyərra rə wer də kəlbarən, da wer da Yasfan, rə bwiləmmangngi nyəra riyang. ¹² Ka rə kʊlli kʊnta a gra-grai, rə fʊggai kwʊ a jɨr təsʊ, rə weni təmri kwʊ a jɨr bəsʊ a fʊggai hi. A fʊggai hi kən mʊlla dʊntə kwʊ a jɨr təsʊ ta bətəmba Isra'ilami. ¹³ A Tʊr ka fʊggai wʊ tə bwanbi, rə jiyang, fʊggai tə bwanbi, rə tʊwang, fʊggai tə bwanbi, a yʊ bo, fʊggai tə bwanbi. ¹⁴ Kʊlliya bɨrhənni karə gwaktən mʊ rəgi kwʊ a jɨr təsʊ, karə dʊntə kwʊ a jɨr təsʊ a nəb təmrəm kwʊ a jɨr bəsʊwʊm ba be Bənglam. ¹⁵ Gə wa swimən yəmmi karə damər də bɨnggorən də kəlchə-kəlchən bɨri bɨngotangnga bɨrhən, rə fʊggaitan gʊ na kʊlliyan gʊ. ¹⁶ Bɨrhən; rə sʊmmər da gən rə bangsangngi yangʊ kə kwanəng, ka bɨngo bɨrbən rə damər dən bɨnggo rəgən, mel neetə kwʊ a jɨr təsʊ a sim (bangsangngi, rə sʊmmər, rə wʊləlliyʊ wan gʊ wʊ kwani warigu). ¹⁷ Ka bɨnggo kʊlliyan gʊ bo, ka tau be kwan rə fʊrtə gwar a jɨr tə gwar, 144 a ji bɨnggori a ni kuniyʊ (wʊgən ji bɨnggoriya we təmriyʊ). ¹⁸ Mʊ kʊllihi nən Yasfa, bɨrhən bo nən wedə kəlchə kəlchən kalʊri, da jɨrgo tən ji jəga kak rəgi kəlbari. ¹⁹ Kən nəngngatən məksa a kʊllihi rə dənə wer də nyan. Dərə jigʊwʊn yasfa, dən sʊwʊn safir, dən bwanbiyən agat, rə dən gwarən emerld, ²⁰ dən nʊwʊn onis, dən nʊkkʊnnən sardiyʊs, na dən nyibiyən kirisolat, dən narʊwʊn beril, dən wʊrwinən tofaz, dən kwʊwʊn kirisofaras, dən jɨr kwanən yakinta, dən jɨr sʊwʊn bo ametis. ²¹ Fʊggai kwʊ a jɨr təsʊ gəsəm bə kəlbarim; kənə fʊggang ki, nəngnga nən gəsəm kəlbarim, jʊta bɨrhənni bo wetəttə kəlbari tə kalʊriyʊ tə nyai, ki da jiwʊn jəga kak rəgi rə kumni. ²² N’chubə gʊn rʊwa nyiniwi a bɨrhən, bəraki Nigra Niyajiyʊ rə kumni warigʊwi tən be Bəngla ji gʊn rʊwa nyini wa. ²³ Bɨrhən me bə farə ko tən swang a yəntang, bərakə gratətta Niyajiyʊwi ka yən hangʊ, bo gʊngor da kərrangngən da gən be Bənglahi. ²⁴ Nəb ba yoyoma kwetərei a mʊra bɨrhən. Dʊʊbə ba gʊsətəm bo ba be rə weriyan jiyʊ a mʊran gi. ²⁵ Fʊggaitan jiyʊ bo me bən mərra rə ko, me kumma gai bo. ²⁶ Ba be rə weri tən yʊlgoiya təmbə kunəmi a mʊran gi, ²⁷ Me rə gʊji wʊrə sirəmmiyʊ ba dɨgiya mʊriyʊ. Rə wʊ təm jʊna bʊjʊriyʊ tən nyatəm, ba təgtənna bən mʊlla dʊntəttan jiyʊ a mʊra wang ka yuumuməng ka Be Bənglang dang ni ji.