¹ Kən chu we təmri sʊwe ra jii. Karə banna fʊgangngiya bwa kə wuləllʊng kə me mwatəntə wʊng, ka rə chənte a kang ka gəng. ² Ka dəb so funiyəng, wʊnən Ibilisi, dagi dʊn mo Chetan, ka bʊwa jəttə nee kwan. ³ Ka maiya mʊra bwa kə merə mwatəntəng, ka mərrang, bo ka bautən kʊrran a jitan gʊwʊng. A nəngnga bwi nyang na ba kari ba yəgtənna jʊlla nəbbə kunəm yɨgira bukka jəttə nee kwanəng. A bukka nyangəng, a chin kwak n'jamən hangʊwa fʊlla bani. ⁴ Mənni kən chu gani chiri grai. Ba chiro a jitan gʊwʊm gə bə ne kumnita duutiyən. Bo kən chu wena bən mwiyamən dutte bərarə butangnga bʊk Yesʊwi tən yəm ba Niyajiyʊwʊməm. A nebə grate nam hi tən wullongʊ, ka kwila yəbbə kʊwi a katəttan jiyʊ tən kanna jiyʊ. Ka kau bwiya nəngnga yuumum, ka nəngnga dʊʊte tən Kiristi a jətə nee kwan. ⁵ Bagi ba bɨtɨrom a kauwe bə bwi rə yuumum, yɨgira fʊlla jətə nee kwanna rii bwiyʊ. Kang kə gən gʊntang ka ba bɨtɨrom kə rə jigʊwʊng. ⁶ Wʊn dəgtən kangngi, wʊ yʊlgoi, gə karə nyatang a mʊra gʊntang kə rə jigʊwʊng! Bwiyatən sʊwi me rə kumniya jiya bambe. Ba yullo bə tung jɨniya chəriya Niyajiyʊwiyəm na wa Kiristiyʊ, bo ba nəngnga dʊʊtə kin a jəttə nee kwan. ⁷ A nyəngkə jətə nee kwan ba be mwatəntəng, bən jamən Chetan a jarəm. ⁸ Ba jɨrre na ba a jʊlla nəbba təmməm bə ka kəngngərtəttə gwar ya gʊsətti- Gog tən Magog- ka kʊra hanjim bəri kun. Mwamiyan jiyʊ ba chi nyəra jʊssaiya wimangngi. ⁹ Ka wʊssəlla bwita kak ka gʊsətəng, mənni bo a kawʊr gana ba nəbbən yəmbə nyami, bɨr də yotən daan. Mənni kərang ka fiye wa ji a be kʊlma hanjim, ¹⁰ Chetan, wa jʊlla hanjimi, kən mai hangʊwa mʊra kərang kə kwauwʊng kə jarəng, a gʊn mai namhi wi tən ni yʊweri wʊ tiya nyati we. Ba no kʊnang rə kum rə ko yəggira mwatənta mwatənti. ¹¹ Kən chu gʊ chiri gra kwauwi tən wʊ ka chiya jiyʊ. Gʊsətə tən ji ka mwa mənna kak kagəng, mənni merə gʊba yəgi wi. ¹² Kən chu ba bɨtɨrom bə rə kumniyəm tən bə merə fəniyəm- a sira a kak ka gʊ chiri grang, kən wʊmmən wani. Kən wʊmmən kagi wang- wang ka yuumuməng. Kən nəngngatən duuta ba bɨtɨrom a jiya ji wʊn mʊlla mʊra wanihiyʊ, a sitənna swiyetəttan jiyʊ. ¹³ Wimang ka nəbbən ba bətəro a mʊra giyəm. Bwiyate tən gwa kʊnangngi ka nəbbən ba bətəro a mʊra jiyəm, kən nəngngatən duute a sitənna ji wʊn hanjima nəngngai. ¹⁴ Kən mai bwiyate tən gwa kʊnangngi a la mʊgangngi. Kang kə gən bwiyatən sʊwi-la mʊgangngi. ¹⁵ Wʊn nyabə dʊn da gən mʊlla mʊra wang ka yuumuməngngi.