¹ A bukka yai jəni yaiyəng kən nwi dagi jiir a jɨrgo tən jiir da nəbbən mwam a ji sʊwe rə go, ''Hallelʊya. Yiyarang, wertang, tən kumni ka chi kʊrəkwang a gwa Niyajiyʊwa nənnʊwi. ² Dʊʊtəttangʊ bə nyam rə ji nya, na ba a nəngngatən duuta talli kʊnta wa dəg gʊsəta nəngnga kʊrsən rə taltətangʊwi. Ka dəb yaməntang ka dʊgʊm ba kewetangʊwʊng, bə talli hi rə bwigo a kwisərrem.'' ³ Hanjim ka kau bwi a sʊ yəmbə sʊwʊm: ''Hallelʊya! Yon kə gʊnne ra gwan giyʊ yɨgira mwatənte.'' ⁴ Tabə bambe fʊr təsʊ a jɨr bə gwar tən jɨnni nəngnga rə yuumummi ye tə gwar ka yarra ne grate Niyajiyʊ gə wʊ ka chiya gwa gratiyʊ. Hanjim sʊwe rə go, ''Amin; ''Hallelʊya! ⁵ Kə dagi jiirra jɨre wa gaiya gwa grati sʊwe rə go, ''Tə wer Niyajiyʊwa nənnʊ, jɨn kewetangʊ warigʊ, jɨn bətə nwi tatan gʊwʊm, rə bə me rə finiyəm rə bə rə kumniyəm.'' ⁶ Nyang bo kən nwi dagi jiir dan jiir nyəra neb mwaməm, nyəra gɨrtang ka nyallingəng , sʊwe rə go, Hallelʊya! Nigra kə nəngnga dʊʊte, Nigra nəngnga dʊʊta jiya warigʊ. ⁷ Masi nən nəngnga bwiləmri, nən nəngnga fur də kwʊwʊn rə kwanni, na bo nən ne weri bərakə bwiləmriya nata be bənglai ka be, bwiwiyangʊ bo ka kʊra dʊr da gən. ⁸ Kən ngatən mo a dʊ jɨnangʊ kəlbari na yʊlgoi ya dʊttətə bʊkrə bʊkgi'' (bərakə dʊttətə bukrə bʊkgi gen swiyetətta ji nyai na kallʊwʊrəm). ⁹ Kə we təmriya swimən go, ''Mʊlla waiwe: Bən dəgtən kangngən gən ba nya buwʊng yɨgira bwiləmriya nata be Bənglaiyʊ.'' Ka kabba swimən go, ''Tai bwantəta Niyajiyʊwi ta yəmbə nyami.'' ¹⁰ Kən yar a kak ka nanan gʊwʊng na ba rʊwatən nyini, mənni ka swimən go, ''Kari bən nəngnga nyang! Mərə kinang mən chʊgo kewetiya mʊ na chətətta mʊ tə karə bʊtangnga buk a jiyan Yesʊwiyʊ. Rʊwatən nyina Niyajiyʊ, bəraki butangnga buk a jiyan Yesʊwi gən we yʊwei.'' ¹¹ Go nyəng kən chu jiya wʊmmən wʊwi bwiyəng, jəggang bo dagi gərmar də kwauwʊn gə de. Wa gwiyʊ mən bu mo wʊn nga rəgə rə yəm bə nyami. Nəngnga duutə rə yəm bə nyam, nəngnga kun. ¹² Kəmta gʊ nyərra səllən da kərrangngən, a dʊr da gən ka gurmongtə mwam we. Ka rə dʊn mʊllatənna bwiyang gʊ, də merə wʊ ba yəmmi, me nən gə gən kwan ki. ¹³ A mai dʊkkən dəgga mʊra dʊgʊmməng, mənni mən bu dʊn da gən mo bwanda Niyajiyʊwʊn. ¹⁴ Kʊlən da jiyən də barə kərangngən fəngngere a jiya gərmatəttə kwauwi, a dʊrawʊ dʊttətə bʊgrə bʊggi kwau rə yʊlgoi. ¹⁵ A nyiyangʊ n'dampo rə nwiyʊ jərrere, wʊ ba bau nəbbə me Yahudawam gərən, bo ba nəngngatən duute rə damər da mʊnən. Fiya gani yam hiya inabiyʊwi rə jwagər də kwewʊn da Niyajiyʊ rə kumni warigʊwʊn. ¹⁶ Kən mʊllatən dʊnna dʊkka gəng rə dəmman gʊ: ''Nidʊwa dʊʊbi tən Nigra nəbə grami.'' ¹⁷ Kən chu we təmriya sissiya ko. Ka bu buwʊng rə kumniya kəlettə warigʊ yə gʊnna jiyʊ. ''Tə be, tə kʊra bwi bərarə bwiləmri kʊntai ya Niyajiyʊwi. ¹⁸ Tə be tə jau namta dʊʊbi, rə namta dʊʊbə ba kunnəmmi, rə namta nəbbə grami, rə namta gərmati, rə ya bə gwirəmmi, rə namta nəb wargʊwi, bən yiyam tən kewete, bə me rə finiyem rə bə rə kumniyəm.'' ¹⁹ Kən chu namhi tən dʊʊbə ba gusətəm na kʊlən da jiyən. Kʊra bwi go na tə nəngnga kun tən wa jiya gərmari tən kʊlən da kunnən da gən. ²⁰ Kən tau nam hi tən nəb yʊwerəm bə kərra nyatəm ba nəngnga swiyetətta bautangnga təmmi a kak ka gəng. Rə kang nʊngtangke kəka jʊlla ba yʊ kʊwiya nam hiyʊ tən bə negratə wullihiyəm, kən mai waringəm ba jiyəm bəsʊ rə yuumum a mʊra səggər da kərangngən də jarrən. ²¹ Bagi kən juwo rə dampo wʊ jərrera nyiya wa gwiya gərmari. Kəlletə warigʊ ka jau libotan jiyʊ.