¹ A mwatənte, chətətta miyʊ, tə nəngnga fʊr də kwauwʊ a mʊra Nigrai. Me mo ji nəgənni kabi mʊla gəmən jɨni yaiye. Jɨni yaiye ba yiyagən. ² Tə nəngnga den bərarrə jwate. Tə yo kəmte bəra nəbbə nəngnga swiyer də bwiran. Tə nəngnga ba den bəra nəbbə mwe bukgəm. ³ Bəra ki nən nə nəb bə mwitən jwinəm, bəraki nən nən ne grate a gwa We Niyajiyʊwi. Nən nə rə bautangnga fʊri a mʊra Kristi Yesʊwi, me nənnə titang a daa a mʊra bwi. ⁴ Nən kwinən, ka bən dəmən ti fʊri a bwi. Karə ni wʊ churə go gəbə ti fʊr a bwiyʊ ki, mən chu mo wa buk ka miyəng. ⁵ Mwemən jwin a ko narʊwi, a gwa nəbba Isra'ilayəm, sʊr da Benjimenən, ni ya Ibrainiyawai wa Ibrainiyawai; a jiya yəm ba soriyəm, mə ni ya Farisiyawai. ⁶ A a gwa tərsatangngi, kən ne kʊnnang Ekklisiya Niyajiyʊwi; a nəngngatang a ji nya mʊra sori ki, me mənnə ji ya kəbbari. ⁷ Mənni wʊni ji wʊ chi wa nyatang ka hiyəng ka miyəngngi, dəb mo yartang bəra nən Kristi. ⁸ Yəmbə nyam, kʊ nyangnyəngke mən kee jɨni warigʊ yartang bəra rə yəmtang kə nyang kə yəm yəm ba Kristi Yesʊ Nigra miyʊ rəgəng. Bəra nən hangʊ kən bʊnna jɨni warigʊ. Dəb mo jɨni rə kʊni na nya Kristi, ⁹ na ba nyai a hangʊwi ya mʊri. Me mənnə ji nya nən winəngngi a gwa soriyʊ. A jiya nyangngi, ka mən nəngnga ji nya a gwa yʊtang a yəmbə nyam a mʊra Kristiyʊ, nəngngatang a ji nya wa jiire wa gwa Niyajiyʊ bɨra rə nəbəntang a yəm bə nyami. ¹⁰ Bəra rə nyang mə fau mo mə yəm hangʊ na rə kʊmni ta gʊntangka gəngi a mʊrgatang ka dʊrəng a mʊra kʊnnang kangngəng, na chi yəra nən ge bwiyatanggʊ, ¹¹ ki na bən nəngnga mo yənneki na nwimən gʊnməntang we a mʊra ba bəttərom. ¹² Me mo kən nya yai jɨni yaiye warigʊ, me mo riiri. Mənni mə tərsa mo na nya tau ji waiwʊ Kristi Yesʊ a taiye bəra gəri. ¹³ Chətətte miyʊ, n'kəmma bə mo me rə bwimi kə nya tau jihi fu. Mənni ka ji kwan we; kən tamən rə ji wʊ ka sʊwi, mən dəg dʊr a jiwʊ ka kaggi. ¹⁴ Mən tərsa a jiwʊ ka kaggi mo na nya jau jangəmmi bera gwa Niyajiyʊwi a mʊra Kristi Yesʊwi. ¹⁵ Warigʊ wa nənnʊ bənə tau dʊʊtəm, masi tənən nəngnga kang kəmarang ke, ki bəttə nəngnga kaggi kəmarang dang a jiya wʊnə ji kee, Niyajiyʊwi ba nungən wai ji. ¹⁶ Bəra rə nyang, wʊnə ga kə nən lawi, masi tənən tau nyang. ¹⁷ Chətətta, tə məsa məna mii. Tə jəgga nyagʊ rə bə yo yom nyəngkə tə məsa rə ga nənniyəng. ¹⁸ Nəb mwam bə yo yom-nən ji gəbbə sʊgəmən yəm ba jiyəm məm, kʊ kəmən sʊgəmənne rə betəkəmi nyəra kən hanjim nəbba kaggəm ba riyang yʊwarang kang Kristiyʊwʊməng. ¹⁹ Mwatənta hanjimi kiyatang. Bəraki Niyajiyʊ wa hanjimi futəttan jiyʊ, gugtang ka dʊrrəng ka jiyəng bujiiri. Hanjim bə kəmma nən jɨnna gʊsəti. ²⁰ Mənni gʊ chiriya nənnʊ wa jii, gʊ nən yamme Nijəgri wi, Nigra Yesʊ Kristi. ²¹ Ba wʊlga kʊmtenətta bwita nənnʊ a chi nyəra yəgi bwi rə grati, ya nəngnga rə kʊmnitangʊwi na dəg wʊni ji warigʊ a gwa giyʊ.