¹ Ki jiya yəgtannga kumniyʊ wa mʊra Kristiyʊ ki, ki ka gʊji a sətang ka fʊriyʊ a jiiri wa yodai a gʊwi ki, ki ka mʊrgatang ka dʊrəng a mʊra We ki, ki ka bʊmtewe tən nwitangnga kʊnnang ka bwitəng ki, ² tə dʊ fur də kwauwʊn da miyəng a ribwi a gwa kəmmarang kə kinəngngi, tənə yodai kwani, tə yoyom a mʊra We Yʊlgoi, tə chi rə kəmmarang kə kinəng. ³ Kari bətə nəngnga gʊji rə fautang ka dʊrəng na rə gratə tə rə kʊni. Buk ka nyangngəng tə chi rə səgtang ka dʊrəng wʊni ka churə go gʊ ka li gən. ⁴ Wʊna jɨnʊ ki kara jəga dʊr da gən gən kwan, mənni a jəga ji bagi fari bo. ⁵ Tə nəngnga yobi nyəng ka Kristi Yesʊwʊng. ⁶ Hangʊ a chi chim ba jɨrgo tən Niyajiyʊwʊm, mənni a dəbbə chim ba gəm a sigo tən Niyajiyʊ da rə gʊji ba mʊtən jiwi. ⁷ A jiya nyangngi ka ti dʊr da gən me nən gʊji. Hangʊ ka dəb yobi a bwirai. Hangʊ a jɨre nən jɨrgoi ya nəbbi. Hangʊ nya jɨre nyəra ni. ⁸ Hangʊ a səg dʊr da gən rə nwitanga yəm yɨgira bwiyate, rə bwiyata riyang yʊwarangngi! ⁹ Bərarə nyang kə Niyajiyʊ a ne hangʊ gratətta li warigʊwiyəng. Hangʊ ka ne dʊn da li tagi dʊntə warigʊwʊn. ¹⁰ A nəngnga nyangngi go na a mʊra dʊn da Yesʊ ki dʊntə warigʊ a rurotən, dʊntəta bə ka jiyəm, na bə ka jiya gʊsətəm bə ka mʊra təmmi. ¹¹ A nəngnga nyangngi go na dənə langngər ka nga sʊwe go Yesʊ Kristi gən Nigra, yɨgira gratəttan Niyajiyʊwi Te. ¹² Bəra rə nyang, chəttətta miyʊ ta yodai, nyəngkə jʊtəkwang ki tə fʊng ji mən sʊgəməni rə gəng, me bəri mən ka gaiyəng mənni na chi mən me gai ki, tə nəngnga ji wa dau jəgrang kan jɨnəngngi rə bwi kauri rə tate. ¹³ Bəra ki Niyajiyʊ gə nəngnga swiyer a mʊra jɨni bəra rə ji fari tən swiyer bəra rə ji nya bwiləmre a gʊwi. ¹⁴ Wʊnə ji ki tə nəngnga na tə dʊ kʊglatang a yəmni rə buri ya jautang. ¹⁵ Tə nəngnga nyang ki na tə nya tə yʊllo nəb bə nyam bə me rə jiya kəbbarəiyəm, bətəm ba Niyajiyʊwʊm bə merə jiya kəbbari. Tə nəngnga nyang ki na ba tə yɨn nyəra kwetərei ya mʊra gʊsəte, a jʊgər da tangngər də kʊrsənnən da nyəngimmən a jʊwiyən. ¹⁶ Tə tau bwan da yuumumən rə kumni na ba nya jiya grati a ko Kristiyʊ. A ko hi ki yəm mo swiyer da miyən tə səg ka miyəng a chi bən ji rə kʊni. ¹⁷ Mənni a chi bən tʊraimən nyəra rə yʊtang ka jiya tungtanggən tən swiyer da yʊtang ka yəm bə nyaməm ban jɨnəm mən ki, kən nəngnga fur də kwauwʊn, mənni bo kən nəngnga fur də kwauwʊn tə nən kin warigʊ. ¹⁸ Awai yobi kwanni tə nəngnga fur də kwauwʊn, tənən nəngnga fur də kwauwʊn kin. ¹⁹ Mənni kən ti fʊri a mʊra Nigra Yesʊwi mo a yɨgtəne ki bən təm gəmən Timoti, na bən nya kumni a jiwʊ hangʊ ba swimən nyəng kə tə ka grəngngi. ²⁰ Bəraki me mənnən gʊwʊ yobiya gʊ a be wʊ kwani tən winəngngi, ni wʊ kəmma rə jɨnəng nən yəm bə nyammi. ²¹ Bəraki wʊne jiyʊ ki bə fau jiya dʊr da gəni, me jɨnniya Yesʊ Kristiyʊ. ²² Mənni kətə yəm grattətan gʊ, bəraki nyəng kə bwe nəngnga tən swiyer rə ga te gʊwʊn, mənni kənnən nəngnga swiyer kin a mʊra yəm bə ləmangngəm. ²³ Bəra rə nyang mən ti fʊri mo bən təm hangʊ a ya rəkwa-rəkwa buk kə chu nyəng kə jɨni ba nəngnga bwi nə mə gərəng. ²⁴ Mənni mə rə bwimi mən Nigra kamənnən dʊr a sim a gwa Nigrai mo bən ya me rə langtang. ²⁵ Mənni mə kəmma mo ka dautənwe kabi təm gəmən Abafaraditas a ya. Hangʊ chiya miyʊ tən chʊgo swiyeri na chʊgo kunni ya miyʊ, na ni təmriya tən bwira a jiya jɨni mən fari. ²⁶ Bəra ki hangʊ ka fʊm nən jɨnəng warigʊ, nyəngkə tə nwi mo kəggə bwang. ²⁷ Bəra ki bə nyam hangʊ kəna bwa rə kwani na dʊbe na ba bwiyang. Mənni Niyajiyʊ ka nwi bʊmtang gʊ, me hangʊ gən kwan, mənni na mə rə kinəng, go na kari bən nwi fʊr də yʊlluwʊn a jiya fʊr də yʊlluwʊn. ²⁸ Bəra rə nyang kəməna nəngnga kəmarang rə kwani mo məm təme hangʊ, nan ba tə nya tə chu hangʊ bo ki bətə nəngnga fʊrdə kwauwʊn na mə rə kinəng bən nya dəndeni a mʊra kəmarang. ²⁹ Tə yuum Abafaraditas rə bwiləmri warigʊ a mʊra Nigrai. Tə ne gratə nəb nyəra nən ge. ³⁰ Bəra ki swiyer da Kristiyən gəndə yəmma na ba bwiya gərən. A nəbbən yuumum ba gəm go na gə nəngngai mən swiyer na gə ri swiyer də na bətə nəngnga na tə dəmən bə tə nəngngaimənən.