¹ Bulus tən Timoti, keweta Kristi Yesʊwi, yɨgira bən samən a mʊra Kristi Yesʊwi bə ka Filibiyəm warigʊ, tən nəbbə gram na yarəm bə jəgga Ekklisiyam. ² Masi na nəttətən dautən bəwi a chiyan jɨni rə chim bə ləmangngəm ba Niyajiyʊwʊm Te nənnʊ na Nigra nənnʊ Yesʊ Kristi. ³ Kəmən nəngngatən wʊnnan na Niyajiyʊ a miyʊ a fʊlla kəmma nən jɨni. ⁴ Rə wʊnə ko ki kamən rʊwa nyini bəra nən jɨn warigʊ, rə fur də kwauwʊn gə də mən rʊwa nyini rəgən. ⁵ Kəmən nəngnga wʊnnan bəra rə mʊrgatang ka dʊttəng ka jɨnəng a mʊra yəm bə ləmangngəm a ko rə jɨgʊwi bera kʊ. ⁶ Ka mənnən netangnga fʊri, mo hangʊ wa sʊ swiyer də nyan a mʊra jɨniyʊ ba jaukag rəge yɨgira mwatəntang lauwera ko Yesʊ Kristiyʊ. ⁷ Ka nəngngai mən nyagʊ nwi nyanyəngke bəra nən jɨn warigʊ bəraki tə ka fʊriya miyʊ. Tən kagəm ba miyəm a mʊra nəttəta dautən bəwi tən chim a jarəm tən bʊtang a buk na sitang rə nani bəra rə yəm bə ləmangnmgəm. ⁸ Bəraki Niyajiyʊ gən ni bwimən buggi, nyəngkə lang mə nwi jəllən da jɨnən rəgəng warigʊ rə nwitang a bʊmte Kristi Yesʊwʊng. ⁹ Mən nəngnga yai nyini rʊwani yaiye: mo na yodai ya jɨnʊ a jaukag rə kwani ya mʊra yəmtang na jəggatang warigʊ. ¹⁰ Mən rʊwa nyini nyangke mo na tə nya yʊtang a jiwʊ nya, na tə yʊllo nəbbə nyam bə merə jiya kəbariyəm a ko Kristiyʊ. ¹¹ Mən rʊwa nyini bo mo na tə ri rə nəngngatang a ji nya wa jəre wa gwan Yesʊ Kristi, yɨgira netang a gratə na rə wertang a Niyajiyʊ. ¹² Kʊ chətte, mə fau mo tə yəm, to jiwa nəngnga bwi nə mi a nəngnga bwi bəra rə jautang a kak ka yəm bə ləmangngəm. ¹³ Bəra rə nyang, chim ba miyəm a chənte a mʊra Kristi ka be yɨn a mʊra nəb bə barə kərangngəm ba dʊʊtəm, rə nəb bə ka gaiyəm warigʊ. ¹⁴ Chətətta nənnʊ mwam ka nya kumni a mʊra Nigrai bəra rə chəntə tə mən ka mʊriyʊ, hanjim ka rə kumni merə tate sʊtəngnga bwanni. ¹⁵ Jum bə nyam bagi bə sʊ yəm ba Ni jəgriyəm nən jʊgər rə nʊggən, mənni bagi bə sʊ nən furə nya. ¹⁶ Ba ballam bə nəngnga mʊra yodai, rə yəmtang go ti ya gwe bəra rə bəm a yəm bə ləmangngəm. ¹⁷ Mənni bə rə jigʊwʊm bə sʊ yəm ba Kristiyəm bəra fautang ka dʊrəng rə bʊnai a yəm bə nyamme. Bə tə go bətə yəgi mən kʊnnang ka chəntə tə mən ka mʊriyʊ. ¹⁸ Wʊlai bo gi? A chi go a mʊra jʊtə warigʊ, na nʊ wa mʊra yəm bə nyam ki, kən jʊlai ki, kə yəm bə nyam ki, mən wau yəm ba Kristiyəm, məgsata miyʊ wa dan de. O, mənni bən nwi bwiləmri, ¹⁹ bəraki kən yəm mo mwatəntangʊ ba chi jɨrtang ka miyəng bəra rʊwani nyina jɨnʊ na rə tʊgarang ka We wa Yesʊ Kristiyʊ. ²⁰ Bəra rə ji yəmmi na ji mən nəngnga titən a daa wi mo me bən nwi bujiri, mənni me tatəwe, kʊ nyəra jʊtəkwang, bən ne gratə Kristi a bwiya miyʊ, kə mənnə yuumum ki kən bwiya-bwiyaki. ²¹ A gwa miyʊ yuumum nən Kristi n'bwiyaki nyatang a hi. ²² Mənni kə bən chi yuumum a mʊra bwi ki, ba chi mən nyatang ka swiyer da miyən. Mənni bən samən gə wʊne? N’yəmbe. ²³ Bəraki warigʊ jɨni yaiyə təsʊ ka wʊre kəmmarang ka miyəng. fautang ka miyəng mo mənnan di nya Kristi, na ba li mən rə kwani, ²⁴ Mənni chim ba miyəm a bwi nən fəni bəra nən jɨn. ²⁵ Na ka dəb fʊriya miyʊwʊng, kən yəm mo bən jaukag nən jɨn warigʊ, bəra rə jautang ka kaggən kan jɨnəng rə nəbən tang ka yəm bə nyaməm ban jɨnəm. ²⁶ Na chi go a mi bətə nya jiwʊ bətə bau fʊri rəgi a mʊra Kristi Yesʊwi ji wʊ bən kawe bwi rəga jɨniyʊ bo. ²⁷ Ji mən fara jɨniyʊ mo tə chi chimba dautənwʊm rəga buwong ka yəm bə nyaməm ba Kristiyəm, na chi nya kang ya chugən ki, ki nyabə kang ki, bən nwi nyəngkə tə katən rəgəng, mo kətə si rə kumni a mʊra we kwan, rə fʊri kwan tə tərsa bwite bəra rə yʊtang a yəmbə nyam na yəmbə ləmangngəm. ²⁸ Kari tə nwi tate bəra rə nəbba nəngnga kag nən jɨnəm. Ba chitən nən gʊji ya nʊntangngi a yɨgira kiyatang ka jɨnəng, mənni rə jəgtang kan jɨnnəng- nyanyəngki a jəre wa gwa Niyajiyʊwi. ²⁹ Bəraki kən nga gəmən nəng, bəra nən Kristi, mi yʊtangnga yəm bə nyam a hangʊwi gən kwan, mənni bo tə no kʊnnang bəra nən ge, ³⁰ a chi katənnə wai lwigori wʊ tə chu wa miyʊ a jɨniyəng, kətə nwirə kʊ a mi.