1 Bʊnnai ya niggotangngi rə bwigate a səttəni ta jɨnʊ, bə jəre wa le? Me bə be bərarə jəllən da bwiyəng də nəngnga bwigate a jʊgər da nəbba jɨnəmən ga? 2 Ka tə fare, məni tə nyabe. Ki kətə nəngnga jurang, sʊʊ, mənni me tə nyare. Ka tə bwigare tə bʊgare. Tə nyabe bəraki tə nəngnga bə chəllan. 3 Kətə chəlla mənni tə nyabe yəbe bəraki tə chəlla ba a jʊwi nya, na ba tə nəngnga fini gəra fautang ka bwiyəng. 4 Jɨn talbe! Tə yəmbə to chʊgote rə gʊsəte bə nəngnga kag rə Niyajiyʊ ga? Wʊnə ni wʊ farə go gə nəngnga chʊgʊte rə gʊsəti, ka ti dʊr da gən niya kaggi wa Niyajiyʊwi. 5 Mən kəmma mo wang a sʊ nən kʊn ga, ''We hangʊ a təmme na chi a furniya nən nʊ wi, ka rə nʊgʊn deni''? 6 Mənni Niyajiyʊ bə nəbbəmən sər nyəng kə wang a sʊwe gərəng, ''Niyajiyʊ bə nəngnga kag rə nəbbə guggo dʊtəm, Mənni ka ne sər nəbbə sik dʊttəm.'' 7 Nəbbən dʊr da mʊn a gwa Niyajiyʊwi. Kwila Chetan, ki ba mwa məna mwi. 8 Be rə do a gwa Niyajiyʊwi, ba be rə do nən jɨn. Tʊmmən kana jɨnʊ, jɨn nəbbə tə təm jɨni bwirayəm, na tʊmmən furna jɨnʊ jɨn bə rə furni təsʊwʊm. 9 Tə təm ji nya, tə nəngnga fur də yuumlluwʊn, rə bʊmte, na tə tiro wite! Masi nʊtəta jɨnʊ a yʊllo fur də yuumlluwʊn, na bwiləmri a yʊllo fur də yuumlluwʊn. 10 Tə sək dʊtətta jɨnʊ kak ka Nigrang, hangʊ bo ba guggən. 11 Kari bətə sʊ ji bwira a jiya gʊ, chətte. Ni wʊ sʊrə ji bwira a jiya chiyʊ ki nanʊ bə nənngnga tən duute naki sʊrə ji me nyagʊwi a jiya soriyʊ ka mwetən tə duuta sori nəngnga tən duuta sori ki me mən təm sori, mənni mən nəngnga duute. 12 Ni kwan gə nəbbən sori, gə nəngnga duute. Hangʊ gən kwan a dəmmən a yiya na bo mʊkte. Mənə wʊne, mʊwʊ mən nəngnga tən duuta chʊmma kʊlliyʊwi? 13 Kʊ kau su, jɨn be tə sʊwere to, ''Kən kʊ ki kə rə si la ki bən dɨgi a bɨr, nəngnga jɨr a gai, mii jɨni na nyamən hiya ji.'' 14 Wʊna yəm ji ba nəngnga bwi rə silai, yuumum ba mʊm wʊllai? Mə mər də ba jɨre tau a ji ba bani ki ka kʊwon. 15 A nyanggi ka dautən we, sʊwe mo, ''Nigra a nga bəmən rə yuumum ki bənən nəngnga jiwe tən wʊrere.'' 16 Mənni kʊ tə wer bwite rə dʊtəttə nəggən tə tɨggorən. Yai jɨni tə wer bwite gəri warigʊ yə bwirai. 17 Bərarə nyang, ni wa yəm ji nya mənni na nəngnga bi, a gwa giyʊ, ji bwira.