¹ Me nəb mwam ba yʊllo nəb məssarəm chətətta miyʊ. Kənən yəm no bənən yʊ duutə kweyʊ. ² Bəraki ka nən təl na a jʊtə mwam. Ki karə gʊ wa lebe a yəmma sʊtangngi ki ka rii ni, ba dəmən a tau bwiyangʊ warigʊ kwʊng. ³ Kʊ tənən dəgtən gwagi a nyina gərəmati, na ba nəngnga ji nəng fari, bo bənən wʊlga bwita jiyʊ nyəng ki nən fau gərəng. ⁴ Yəm nyang bo mo bontəlongtətta hiyʊ, nyang rə kʊtagʊ wan jiyʊ səmba ka wʊlgare, mənni bo mən sʊr hangʊ nən mʊn də kətəlen yɨgira gʊ ni sʊrri a fauwi. ⁵ Nyang bo rə langngər, n'ji kətəle a bwi, ka wer dʊr a jɨni kʊntai. Tə jəga bo nyəngkə kərang ka rəgə kətəlegʊwʊng ka jʊrə gərraji a ləggərri. ⁶ Langngər bo n'kərang, gʊsətetəta jɨni bwiraiyʊ wʊn dəg ga mʊra sʊni bwiya nənnʊ. Bə lʊktə bwi warigʊ, bə tʊngtən kərang a ji ba be rə yuumumi. Hangʊ rə bwigo bə fʊgtə kərang a kaita kərangngi. ⁷ Namta seiyʊ warigʊ, kəlete, rə jɨnni kiti fʊti, na namta wimangngi, ni gə tore. ⁸ Mənni bo, me ni ba dəmmən a tau langngər. N'ji bwira wʊ mebən tauwi, a ri nən saam ba bwiyatəm. ⁹ Rə langngər n'gʊn ne gratə Nijəgri na rə Teh, rə gə bo n'gʊ nəngnga tən nyi gəra nəbbə, bən nəngnga mʊra jɨrgotang ka Niyajiyʊwʊng. ¹⁰ A gwa nyi kwani n'gʊn a dəgtangnga kang gəri na nəngnga nyi gəri. Chətətta miyʊ, yai jɨniye kari ba nəngnga bwi. ¹¹ Nuu wa hiyʊ, ka wʊtərə wʊ chʊllʊwi na tiritiyʊ a gʊ kwani ga? ¹² Chətətta miyʊ kə tə chumən we jaurang a tʊ beta zaitunni ga? Mənni bo kʊ a inabi a to jauri ga? Nyamən bə wʊ mo hi ya bʊmkanəmmi ka wʊte hi chʊllʊwi. ¹³ Wʊne gə rə bərsan na rə jəggatang a sətənita jɨnʊ? Masi wai ni a təm ji nya a mʊra yobiyangʊ, a gwa təmtang a swiyer də nyan narə bʊnai a gugtang ka dʊrəng ka bərsənnən. ¹⁴ Mənni tə katənə nʊgʊn də bwiran na rə fautang kə bwiran a furna jɨnʊ ki, kari bətə wer bwittan jɨnʊ, bo kari bətə titən nyar a yəmbə nyam. ¹⁵ Dan də bərsən də, me da sʊwe wa jiyən, a nyangngi da gʊsətən, me yobiya wei, yobi a weni bwiraiyʊ. ¹⁶ A gʊ ka nʊgʊn wi na rə fautang kə bwirang ka wi, ka nigatang a səte na təmtang a jɨni bwirai. ¹⁷ Mənni bərsən da jiyəng, nəng kalʊri rə jigʊ, rə chimbə ləmangngəm, rə dəndeni, dəb nəggənni, a rii bʊnte na rə betə nyai, yə me bə yʊrre, na nyagʊ bo. ¹⁸ Təmtang a ji nya betangʊ mən wau a mʊra chimbə ləmangngəm, a jʊgər da nəbbə farə chimbə ləmmangəm.