¹ Chəttəta miyʊ, kari bətə tau nəbbəntang ka yəm bə nyamməm ka jɨnəng a gwa Yesʊ Kristiyuum, Nigra wʊ rə grati, rə nʊngtang a dəndangngi a bwiti bagə nəb, da bagi kali bagi. ² A yəllo da kən nya gʊ a dɨgiya kʊrgarang ka jɨnəng a mai dʊtəttə nyai deniyʊ, na nyang bo nya gʊ ni wʊ meri gʊjiyʊ a dɨgigəmən a mai dʊtəttə rə nemarri. ³ Mənni jəga ni wa mai jɨni nyaiyʊ kən sʊwe mo, ''Kən chəllan chiya gwe a gʊ nya, ''Mənni bo sotəna wʊ merə gʊjiyʊ, ''Mwe siya gʊre'' ''Chiya nana miyʊ.'' ⁴ Mənni me duute tə nəngnga tənna bwita jɨnnʊ ga? Tə yəllo bə nəbbə mwe duutəm a kəmmarang kə bwirangəng ga? ⁵ Tə kau sʊ, chəttəta miyʊ ta daai, me Niyajiyʊ ga sammən nəbbə meri jɨniya kaniyəm ba gʊsətəm na yəllo nəbbə rə jɨniya kaniyəm a nəbbəntang ka yəmbə nyamməm na ba yəllo nəbbə ba jau kʊlam a kai tangʊ a bu yəm a ba yotən daam ga? ⁶ Mənni kətə kwila nəbbə mərə jɨniyəm! mənni me nəbbə rə jɨniya kaniyəm nəggənne kʊnang ga? Me nə jiham bə dɨgi nən jɨn a kantəta duuti ga? ⁷ Me nən ji bə kəbba dʊn də nyan də tə mʊtən jiwʊn ga? ⁸ Nyang bo ki kəmənna fʊng sori wʊ nya wa bɨngotəna wʊ mʊla mʊlayʊ, ''Yotən da a chʊmma kʊlliyʊ nyəra rə dʊr da mʊn, ''Kə nəngnga nyagʊ. ⁹ Mənni a chi karə bə sammən dang a mʊra bagi nəb ki tə təm jɨni bwira, mənni sori ka tigən, kəti yʊllo nəbbə me bə fʊng soriyəm. ¹⁰ Wʊnə ni wa fʊng sori warigʊ na təlna a kwani, ka yʊllo ni wa yarməna sori warigʊwi. ¹¹ Hangʊ wa sʊwe go, ''Kari bən darə nyʊi a gʊwi,'' ga kabba sʊwe go, ''Kari bən nəngnga jʊrang, ''Mənni a yʊllo me mən nəngnga talte, na kamən nəngnga jʊrang ki, kən yʊllo ni wʊ me bə fʊng soriyʊ. ¹² Bərarə nyang sʊ yəm na təm nyəra rə nəbbə bən nəngnga tən duutəm a jiya soriya gəriyʊ. ¹³ Mənni duute ba be merə bʊmte a bə me bə nwi bʊmtəm, bʊmte ka jarə kʊmni a jiya duute... ¹⁴ Nyagʊwi yangʊ, wʊllai chəttəta miyʊ, kə gʊ a sʊwe go gə kari nəbbəntang ka yəm bə nyamməm, mənni na yʊllo me rə swiyer ki? Kang nəbbəntang ka yəm bə nyaməm ba yiya hangʊ ga? ¹⁵ A chi da chiyamiyʊ na wʊ chʊwa miyʊ me rə ji mairi na rə ji jauri a koi. ¹⁶ Mənni gʊ wa jɨnʊ a sotəna hanjimmi go, ''Tə di bwitə ləmang, tə chi chimbə rəbəgəm narə ritang, ''Mənni na tə nebə jɨniyi bwi fari ki, nyagʊwang wʊllai? ¹⁷ Nyang bo, nəbbəntang ka yəmbə nyam gən kwan, na merə swiyer da nʊnggən ki, ka yʊllo jəya bwiya bwiyaiyʊ. ¹⁸ Mənni gʊ ba sʊwe go, ''Mən kamənən nəbbəntang ka yəmbə nyamməng, me bo mən kamənən swiyer, ''Nʊngngi nəbbəntang ka yəmbə nyammam ba mʊm me swiyer we, na me bən nʊngngən nəbbəntang ka yəmbə nyaməm na rə swiyer da miyən. ¹⁹ Kən nəbbən yəmbə nyam mo Niyajiyʊ kwan. Kən nəngnga nyagʊ. Mənni bo weni bwirai ka nəbbən yəmbə nyam rə tata bwi. ²⁰ Ka mən farə mo yəm mɨtəta niyʊ ki, ba nəngnga go nyənne ki nəbbəntang a yəmbə nyam merə swiyer ki ka yəlo ji merə finiyʊ. ²¹ Me nəng Ibrahim Te nənʊ wa nya yiyarang bərarə swiyer da təmmən a ji wa nəbbən Ishakʊ yəlliyangʊ kwan a gʊ a jiya chəriyʊ ga? ²² Kən chu kang nəbbəntang ka yəmbə nyaməm rə swiyer, ka nəngnga swiyer da dautənwʊng, dan swiyer hən bo ka gra deni. ²³ Wang ka rii jiya sʊwei go, ''Ibrahim ka nəbbən yəm bə nyam a gwa Niyajiyʊwi, ka dəg ke hangʊ mo gən ni nya, ''Kən bu hangʊ mo chʊgo Niyajiyʊwi. ²⁴ Kətə chu to swiyer ga be tənə yiyarang a ni, me nəbbəntang a yəm bə nyam gən kwan. ²⁵ A wai jʊwi bo, me nən Rahab talli gʊn yiya bərarə swiyeri ga, a ji wa səg nəb sənnarem, naki bo a yo ban hanjim a gʊ jʊwi dangi ga? ²⁶ Mo nyəngkə bwi gəng kwan me we wʊ ki ka yʊllo jiya bwiya bwiyaiyʊwʊng, nən nyang bo nəbbəntang a yəmbə nyam me rə swiyer ka yʊllo jiya bwiya bwiyaiyʊ.