¹ Kʊ yǝm bʊrǝm bǝ rǝ jiguwʊm ka rǝ yǝgi juta ruwani nyiniyu a nyǝngkǝ kanda ruwani nyiniyǝn da tǝmǝn na tau rǝgəng. ² bǝraki kanda ruwani nyiniyǝn sussur. Kandǝ rǝ jiguwʊn de, gu nyarǝ gu chiriya gungor da kǝrangngǝnəm wi, ka ganang we, na rǝ mwandǝ fum-fumǝn dǝ nǝbbǝn nǝn we, mǝn bu mo gu yʊlgoi. ³ A bukka dʊk kə suwʊng ka dagi kanwe, bǝrǝ mo gwa li kaluriyu. ⁴ Ka rǝ chǝriya wer dǝ kǝlchǝ-kǝlchǝni bǝra tungtangnga Jɨni mǝtǝ-mǝti. Karǝ gungor da yǝm bʊrǝmǝn, wʊn yǝngna bulgǝr rǝ werdǝ kǝlchə-kǝlchǝn dǝ rǝ chəmǝr deniyǝn. A mʊri yangʊ karǝ gungor da werdǝ kǝlchǝ-kǝlchǝn dǝ tarǝ mannan, damǝr da Harunan da suwa waniyǝn a gai, na rǝ wetəttən mʊla yəm bʊrǝmwi. ⁵ A jita gungor da yəm bʊrəmǝn, ka wʊlona grati ya weni təmriyu ya səgtən kəglang a balən da tuməntanga jəni bwiraiyəm, wʊ me bənnə su yəm ban gəm rəkwaniyu. ⁶ A bukkǝ yǝngna Jɨni yaiyǝng ki, nǝbbǝ tung Jɨniyǝm bǝ dǝgi jutǝkwang kanda tariyǝn da kanda ruwani nyiniyǝn ki ka nǝngnga swiyer da jiyǝn. ⁷ Mǝnni nigra nǝb bǝ tung Jɨniyǝmi gǝ dǝgirǝ kali kin a mʊra jǝr a kandǝ suwʊn, jutǝkwang bǝ dǝgi nǝn dʊgʊm bǝra rǝ Jɨni bwiraiyangʊ ya yǝmbi na rǝ ya nǝbbi. ⁸ We Yʊlgoi bǝ nʊng bǝn go jʊwi yɨgira gwa li yʊlgoiyʊ lambǝ nʊng bǝne a chi kanda nyini ruwaniyǝn dǝ rǝ jǝguwʊn ka sǝssi. ⁹ Jəni yaiye warigʊ mo na nungbən jəni kuwiyəm mo na nʊngbǝn jiya dam bambi. Rə nəttə tən jəni tungre kuwi warigʊ me bǝ ri kǝmarang ka nǝbbǝ ruwa nyiniyǝm. ¹⁰ Hanjim jiya dai Jɨni-jauri tǝn ji ba noi na rǝ Jɨna bwilǝmriyʊ dan-dang rǝ yəramǝntang a bwi. Jəni yaiye warigʊ sori ya bwiyʊ wʊn ne nǝb na yamerǝ ji wʊ fi bǝn nǝngngai. ¹¹ Kristi a be nyǝra nigra nǝbbǝ tung Jɨni a chǝriya Niyajiyʊwi wa Jɨni nyai yǝ ba bei. Ka dǝga dun kandǝ kuntan da ruwani nyiniyǝn dǝ men niya mʊ rǝ kananguwʊn, dǝ me da gusǝtǝnǝnǝ. ¹² Me gwa dugum ba bitəm tən ba be ta təngatəm, mənni rə dʊgǝm bangǝm a mʊra gwa li yʊlgoiyʊ kali kin bərə nəb warigʊ ka jǝgbǝn kurəkwangngǝng. ¹³ bǝraki na lungo dʊgǝm ba bitǝm tǝn ba tǝngatǝm na rǝ bugǝm bǝn wʊsǝlatǝna nǝbbǝ me rǝ kaluriyǝm ka ba dǝmǝn na kawʊrtǝne hanjim a Niyajiyʊwi bǝra rǝ tumǝntang ka bwita jiyuwʊngki, ¹⁴ Ba chi nyənne dʊgǝm ba Kristiyǝm wa gwa We kaluriyu wʊ kurəkwangngi a nǝbǝn dʊr da gǝn dǝ merǝ gujiya kǝbari ya gwa Niyajiyʊwi, ba tumǝne furna nǝnnu gra mʊra swiyer bwiyati na nǝn nǝngngatǝn swiyer ra Niyajiyʊ rǝ yuumiyəng? ¹⁵ Bǝrarǝ nyang, hangʊ gǝn niya jugǝri wa yǝmbʊrǝm bǝ fiyǝmmi. Waiwe nǝn nyang a chi kən nəngnga bwiyatǝ bǝrarǝ nǝbbǝ na nu wa mʊra yǝmbʊrǝm bǝrǝ jiguwʊm na nya jɨrmǝne wa Jɨnni bwiraiya jiyuwʊng, bǝn buwowʊm ba yu yǝmbʊrǝm ba kula kurəkwangngiyǝm. ¹⁶ Bǝraki gu ka jiir dʊrǝn wi, a chi kwak niya dʊ jiirhǝni a bwiya fu. ¹⁷ bǝraki jiir duran ba nǝngnga fini a jiwʊ ni ya nǝngngai a bwiyai, a bwiyabǝ ki me ba chi rǝ kumni. ¹⁸ Yǝmbʊrǝm bǝ rǝ jiguwʊm a nǝngnga bǝbwi rǝ kun me dʊgǝm we. ¹⁹ bǝraki ji wʊn Mʊsa ne nǝb sori warigʊwi, ka dǝb dʊgǝm ba tǝngatǝm na rǝ ba bitǝm, tǝn hi, landir dǝ kwiyuwʊn, na bǝlli, ka wʊsatǝnna wana soriyu tǝn nǝb warigʊ. ²⁰ Ka mǝnna suwe go, "Dʊgǝmbe gǝ ba yǝm bʊrǝmǝng bǝ Niyajiyʊ a nǝngngaimǝn sori bǝra nǝn Jɨnǝm." ²¹ Ka kaba nǝngnga nyang bo, ka wʊsəlatǝn dʊgǝm a kanda ruwani nyinyǝn tǝn jəni nǝngnga swiyer rǝ ga gaiyu warigʊwʊng. ²² Fʊng ji sori suweri ki, Jɨni warigʊ mǝn tumǝn nǝn dʊgǝm.Kwi bǝ dʊgǝm ki me yǝnotang a Jɨni bwirai we. ²³ Bǝrarǝ nyang a chi kwak wʊlo wa Jɨnna jiyu tumǝn rǝ yai nǝbǝntang a yai namtǝ ye. Mənni rǝ nyang, a chi kwak nǝbǝn guji wa li wa yaiyi bǝra rǝ tumǝntang ka Jɨnna jiyuwʊng. ²⁴ bǝraki Kristi a dǝgi ba gwa li kaluriyu wʊn nǝngnga rǝ kaniyu, wʊ busǝnangkangǝng wʊlo wa dun wʊ nyaiyu. Mǝnni a dǝga ji rǝ bwigo, naka chi ya kak ka Niyajiyʊwʊng bǝra nǝ nǝn. ²⁵ Hangʊ a diba gai go na gǝ nǝbǝn dʊrdan gǝn kali mwam, nyǝngkǝ nǝbbǝ tung Jɨni ya chəriya Niyajiyʊ nǝngnga gǝrǝng, bǝ naki dǝgi ra gwa li kaluriyu a jǝra ra jǝri rǝ dʊgǝm ba guwʊm. ²⁶ Na nu go nǝn nyangki, na ba chin bwi hangʊ a no kunong kali mwam rǝ sutang ka guǝsətǝng. Mǝnni kʊ kunonghǝng kali kin kǝ nungbǝn hangʊwʊng ka jitǝ mwamǝng nyǝngka nǝbbǝn dʊr da gǝn gǝrǝ kali kin na ti Jɨni bwirai rǝ kǝgǝngəng. ²⁷ Wʊnǝ ni ki kən titǝn ba bwiya kali kin, mənni a bukka nyangngǝng ki duute. ²⁸ Nǝ nyang bo, Kristi rǝ kǝggang, wʊn nǝbǝn kali kini mo na dǝbmǝn Jɨni bwiraiya nǝb mwami, ba juwe kǝn suwʊng, me bǝra Jɨni bwirai, mǝnni bǝra rǝ jǝgtang ka ba mida yamerǝ hangʊwʊm.