¹ Bǝrarǝ nyang, tǝnǝn dʊ mǝsarang kǝ rǝ jiguwʊng ka yǝmba Kristiyǝm na tǝnən jau kak yɨgira bitang. Kari bǝnǝn kautǝn bwi a mǝsarrang ka butangnga kangǝng rǝ fʊngtang kǝ me jʊwiyǝng na yǝmba nǝbǝntangnga yǝmbǝ nyam a Niyajiyʊwʊm, ² tǝn mǝsarang ka batismang, tiyatangnga kani, rǝ guntang ka bwiyatang, na rǝ duutǝttǝ kurǝkwangngi. ³ Bǝnǝn jaukak rǝge Niyajiyʊ a nga ki. ⁴ Bǝraki mebǝ nəngnga bwi nǝb bǝnna nya yǝmtangngǝm, bǝ ka nwimǝn nǝttǝtta jiyuwʊmi, bǝ ka nyamǝn We Yʊlgoiyʊ, ⁵ bǝ kǝna nwimǝn lǝmmang ka bwamǝr da Niyajiyʊwʊn tǝn gratǝtta jǝttǝttǝ beriyu, ⁶ mǝnni a yarmǝna jʊwi ki-karǝ bwaiyir n'kauwebwi nǝn hanjim a kangnga butang. Nǝn nyang bǝraki hanjim bǝ kaubwi bǝ buro-buro Yǝla Niyajiyʊwi a riyang yuwarang rǝ butǝji bo, ka kaubwi jǝg swiyir da gǝn a tari. ⁷ Bǝraki tǝmba no hi naki switǝnem, na jiirotǝnnǝ Jɨnni rǝ finiyʊ a nǝbba juromǝng-gǝn tǝmba yu dǝgtang a kang ka Niyajiyʊwʊm. ⁸ Mǝnni Jɨnni jiirora jiyu a yullo tʊttǝ tǝ kuro nǝbbi ki, ka yullo Jɨnni me rǝ finiyʊ yǝn nǝngngatǝn nyiyu. Jitang kangngǝng tungtang. ⁹ Mǝnni kǝnǝn nga rǝ jɨnin nyai ya Jɨna jiyu, Jɨn ba yodaiyǝm, Jɨna chi yǝ nyai ya jǝgrangngi. ¹⁰ Bǝraki Niyajiyʊ me rǝ bunaiya yǝmbǝ nyami kǝ ba tamǝn rǝ swiyerda Jɨnǝnnǝng na yodai tǝ nǝngngarǝ bǝra dundan gǝnni, bǝraki kǝtǝ nǝngngatǝn swiyera nǝb ba nǝbbǝn yǝmbǝ nyamǝm na katǝ nǝngngatǝn swiyera hanjimi lauwerǝ ku. ¹¹ Ka nǝn farǝn deni no wʊnan Jɨnu ki a chi rǝ kang yǝmtang ke ka titangnga furiyǝng yɨgira mwatǝnte bǝrarǝ ritangka jin chubiyǝng kǝ nǝn nǝbbǝn furiwʊ rǝ kumniyǝng. ¹² Nǝn nyang bǝri bǝtǝ chi rǝ bug rǝ-bugi, mǝnni tǝ mǝsamǝna ba nǝbbǝn yǝmbǝ nyamǝm na nǝngnga mitangka daang ka lau a nya kula yǝmbʊrǝmi. ¹³ Bǝraki a fʊlla wʊ Niyajiyʊ a nǝngngatǝn yǝmbʊrǝm a Ibrahimi, ka bau buni rǝ bwigo, na chi me ba bau buni rǝ wa li hangʊ rǝ grati. ¹⁴ Hangʊ a suwe go, "Bǝn dǝgnǝn kang rǝ yǝmbǝ nyam, bǝn dǝg dʊkka mʊng a yumǝn." ¹⁵ A mʊra nyangki, Ibrahim ka yu jiwʊ suwe wa yǝmbʊrǝmi bukka yam rǝ mitangka dangngǝng. ¹⁶ Bǝraki nǝb bǝ bau buni rǝ wa li kumnita jiyuwi. A bukka buri yan jiyu warigʊwʊn ki, bunihi bǝ chi ya jiya butangnga buggi. ¹⁷ A fʊlla wʊ Niyajiyʊ a fau go gǝ nʊng nǝbbǝ ba jau kula yǝmbʊrǝm ban gǝmmi me rǝ wʊlgatang a jiya dǝg ka nǝngnga nyangki, bǝ mʊrga nǝn buni. ¹⁸ A nǝngnga nyang go na Jɨnni tǝsu yǝ me bǝn wʊlgai-wʊ men ji ba nǝngnga bwiyʊ go Niyajiyʊ a ti nyari- nǝn, bǝ nǝn mwarawe bǝrarǝ bǝmǝntangngǝm, bǝnǝ nya kumni deni nǝn tau jiwʊ nǝn nǝbbǝn furiya ji kɨngkangngi. ¹⁹ Nǝn kanǝn titangnga daa nyǝngkǝ karǝ ga yuumǝng, a bubuwi, a chi bwi gǝ dǝgira mʊra bukka dʊg-mǝranangǝng. ²⁰ A gu bǝra nǝn nǝn Yesʊ ka lubǝn rǝ dǝgitangnga gai nyǝngka yullo ni tung Jɨnni a chǝriya Niyajiyʊwi wʊ kurǝkwangngi a bǝngotǝta Malkisadekigi.