¹ Bǝraki wʊnǝ nigra nǝbbǝ tung Jɨni a chǝriya Niyajiyʊwi, mǝn samǝnna mʊra nǝb, mǝn ti mo a nǝngnga swiyer bǝrarǝ nǝb a Jɨna tau ya Niyajiyʊwi, mo na ba nǝbǝn na tung Jɨni bǝrarǝ jɨni bwirai ² Hangʊ ba dǝmǝn a fʊng rǝ nǝbba yǝmbǝm ba den tǝn ba yarmǝna jʊwiyǝm bǝraki hangʊ rǝ bwigo niya yarmǝn yariyu. ³ Bǝrarǝ nyangki, mǝn fau mo hangʊ a tung Jɨni bǝrarǝ yigi Jɨni bwirai, nyǝngkǝ ba nǝngnga gǝre bǝra Jɨni bwirai ya nǝbbiyəng. ⁴ Me rǝ gu ni ba dǝb tai gratǝ taiti. Mǝnni, Niyajiyʊ ga buwe, nyǝngka bu Haruna rǝgǝng. ⁵ Nǝ nyang bo, Kristi a nebbǝ gratǝ dʊrdangǝn a yullo ni tung Jɨni ya chǝriya Niyajiyʊwi. Mǝnni, wʊ sotǝn yǝmma hangʊwi a suwe go, "Mǝn Yǝla miyu; ko kʊwi kǝn chi Temʊ." ⁶ Rǝ nyang nyǝngka suwe rǝga gukang, "Mǝn ni tung Jɨniyu a chǝriya Niyajiyʊwi wʊ kʊrǝkwangngi nyǝngka Malkisadegǝng." ⁷ A mʊra kotangu ya bwiyʊ, Kristi ka nǝngnga ruwani nyini rǝ chǝllan ti tiwi rǝ kumni rǝ bǝtǝkǝmi yigira gwa Niyajiyʊwi, ni wʊ ba dǝmǝn na jǝg hangʊ a mʊra bwiyati. Kǝn kautǝn su a hangʊwi bǝra rǝ yobiyangʊ. ⁸ A nyangi hangʊ yǝliyǝng, ka mǝssa nəbbəntang a grate a gwa kunong ka nongngi. ⁹ Hangʊ ka lau ritang, bǝri nyang ka yulo jiya mǝsarangiyǝng ka bǝ nwitǝn yǝməm, a bǝ nya jǝgrang ka mwatǝntǝməng. ¹⁰ Niyajiyʊ ga nǝngnga hangʊ go a chi ni tung Jɨniya chǝriya Niyajiyʊwi nyəra ka Malkisadekəng. ¹¹ Ka nǝnnǝ Jɨni mwam yǝ bǝnnǝ suwe wa jiya Yesʊwi, ka bwai jəgga gəmən bǝraki bǝrsan da Jɨnǝn ka yarmǝn bǝraki suna Jɨnu ka nǝggǝn na nwitang. ¹² Bǝraki kǝna dautǝnwe tǝ yullo nǝb mǝsarǝm bera wai fula we, mǝnni berǝ kʊ tǝ fauto mǝsa gǝmǝn Jɨngta Jɨni rǝ jiguwi ya yǝmba Niyajiyʊwʊmi. Tǝ fau yiim, men mwan dǝ kɨngkangngǝn! ¹³ Bǝraki ni no yiim gǝn kwani lambǝ bǝrsǝntǝna yǝmba nǝngngatang a ji nyam fu, bǝraki hangʊ bwe kǝtǝlli fu. ¹⁴ Mǝnni mwandǝ kɨngkangngǝn da nigran. Bambe ji nǝbbǝ bǝrarǝ gratǝtang jiyu karǝ yǝmtang ka jǝggatang a ji nya tǝ wʊ bwirai.