¹ Bǝrarǝ nyang, tǝnǝn chi rǝ wʊtangka suwʊng bǝrǝ gu ba yarmǝna yǝmbʊrǝm ba dʊtǝna bugǝm bə go bǝtǝ dǝga gǝriya Niyajiyʊwiyǝm. ² Bǝraki kǝn subǝmǝn yǝmbǝ lǝmmangǝm nyǝngkǝ sotǝn rǝga hanjimǝng. Mǝnni kang tǝmrang a nǝngngatǝn bǝ fini ya ba mʊrga bǝ dur a mʊra yǝmbǝ nyam tǝn ba fʊng jʊwi sotǝniyəm. ³ Bǝraki nǝn bǝ nǝn nǝbbǝn yǝmbǝ nyamǝm nǝn bǝ nǝn digiya gǝrihi, nyǝngkǝ hangʊ a suwe rǝgǝ go, "Nyǝngkǝn bau buni rǝga mʊra jwagǝr da miyǝnǝng, Hanjim me ba dǝga gǝriya miyu." Rǝ nyang, swiyer dǝ hangʊ a nǝngngən ka ji rǝ langtang a sutang ka gusǝtǝng. ⁴ Bǝraki hangʊ a suwe guji a jiya ko nyibiyu, "Niyajiyʊ a gǝrmǝn a swiyerda gǝn warigʊ a ko nyibiyu." ⁵ Ka kaubwi ya suwe bo go, "Hanjim me ba dǝga gǝriya miyu." ⁶ Bǝrarǝ nyang, bǝraki kən titǝn na bagi mo ba dǝga gǝriya hangʊwiyǝng, na chi mwama Isra'ilawai ba nwi yǝmbǝ lǝmmangǝm a dǝgi ba gǝriya hangʊwi bǝra rǝ dʊrdǝ nǝggǝnnǝn nǝng, ⁷ Niyajiyʊ ka kaubwi ya ti gu ko bǝrǝ mo, "Kʊ." A bukka kotǝ mwamǝng, ka suwe yǝm a gwa Daudai, nyǝngka suwe gǝrǝ rǝ jiguwʊng, "Kʊ tə nwi jiir da gǝn ki, kari bǝtǝ kusa furna jənu." ⁸ Bǝraki na nu go Joshuwa ka ne gǝri hanjim ki, Niyajiyʊ na suwe bǝ guji a jiya gu ko bo. ⁹ Bǝrarǝ nyang ka gu ko-gǝriyuwe wʊn titǝna nǝbba Niyajiyʊwʊmi. ¹⁰ Bǝraki ni wa dǝga gǝriya Niyajiyʊwi gǝrǝ bwigo ka gǝrmǝna swiyerdan gǝn, nyǝngkǝ Niyajiyʊwa gǝrmən gəra dǝgǝnǝng. ¹¹ Bǝrarǝ nyang masi tənnǝn chi rǝ fautang ka dǝgitang a wai gǝriyəng na kari bǝn nya guwa nǝnnu wʊ ba yara mʊra yobi wa dʊrdǝ nǝgǝnǝn dǝ hanjim a nǝngngan. ¹² Bǝraki bwamǝr da Niyajiyʊwʊn nǝn yuum rǝ kumni rǝ nyi jarǝn deni a li dampo nyini tǝsuwi. Bǝ tur jugǝr da yuumǝn yigira mʊra we, na rǝ sǝggatang ka kutǝn yigira mʊra fim. Ka dǝmǝnne yǝm ji furi kǝmari tǝn gu yigiwi. ¹³ Merǝ ji wʊn nǝngnga nǝngngaiyu wa baramǝn barai bwi ya Niyajiyʊwi. Mǝnni, wʊnǝ ji ki nǝn tangsang a wʊmǝn wʊwi bwi a kǝmta wa chin kwag nǝn nǝbbǝn ji nǝn nǝngngaiyu warigʊwi. ¹⁴ Bǝrarǝ nyang, kwam ka nǝn nǝ ni rǝ grati wʊ tung Jɨni ya chǝriya Niyajiyʊwi wʊ ka su a mʊra jiyu, Yesʊ Yǝla Niyajiyʊwi, tǝnǝn tau nǝbbǝntang ka yǝmbǝ nyamba nǝnnǝm rə kumni. ¹⁵ Me mo nigra nǝbbǝ tung Jɨniya chǝriya Niyajiyʊwi ya nǝnnu me ba dǝmǝn na nwi bunǝnda nǝnnǝn bǝrarǝ yarmǝntang ka nǝnnǝng ngi. Mǝnni, nǝn ka nǝnnǝ wʊ kǝn bǝngo a jutə warigʊwi nyǝngkən nǝngnga bǝmən rǝgǝng mǝnni nya bǝrǝ jɨni bwirai ¹⁶ Masi tǝ nǝn di rǝ furi kwan rǝ kumni yigira gwa dǝntǝlǝn da dʊʊtǝn da nǝttǝn dautǝn buwi, na ba nǝn yu bumte na nǝn nya nǝtte tǝ ba tugabǝna fulla fautangngi.