¹ Bǝrarǝ nyang, chitǝtta miyu tǝ yʊlgoi, bǝ ka mʊra buwong ka jiyǝng. Tǝ nǝngnga kǝmarang a jiya Yesʊwi, ni tǝmri na rǝ nigra tung Jɨni ya chǝriya Niyajiyʊwi ya ngarang ka nǝn nǝngi. ² Hangʊ ni rǝ yǝmbǝ nyami a gwa Niyajiyʊwi, wa ti hangʊwi, nyǝngkǝ Mʊsa nanu rǝ yǝmbǝ nyam rǝga kaita Niyajiyʊwʊng. ³ Bǝraki Yesʊ ka dautǝna grate a li Mʊsa, bǝraki wa mʊ kaiyu ka kaihi rǝ grate. ⁴ Bǝraki tǝnǝ kaiki nǝn gu wa mʊ, mǝnni wa mʊ Jɨni warigʊwi nǝn Niyajiyʊ. ⁵ A kagi kang, Mʊsa nanu ni rǝ yǝmbǝ nyami a kaita Niyajiyʊwi warigʊ. Hangʊ nanu ni surǝ yǝm a jiya jiwʊn nabǝn suwe yǝma ji ya kaggi. ⁶ Mǝnni Kristi gǝn Yǝli wʊ Jɨna kaita Niyjiyuwi warigʊ wa kangka gǝngngi. Nən nǝn kaitangʊ nən si rǝ kumni a titang ka daang dura səssi ki. ⁷ Bǝrarǝ nyang, a chin nyǝngkǝ We Yʊlgoi a suwe rǝgǝng go: "Ko kuwi, nwi jiir da gǝnki ⁸ kari bǝtǝ bʊ furna Jɨnu nyǝra fʊlla durdə nəgənna bəngorangnga seiya mʊriyu. ⁹ A fʊlla waiwe gu tebǝbba Jɨnǝm a gugo dʊtte a gwa bǝngoi rǝgi, na rǝ fʊlla jǝtǝ furtǝ gwari, hanjim ka chu swiyer da miyǝn. ¹⁰ Bǝrarǝ nyang nwi bǝ lǝmmang rǝ ban daam bǝrere. Kǝn suwe mo, 'Jutǝkwang hanjim bǝ fʊng furna jiyu. Hanjim a yǝmbǝ juta miyu.' ¹¹ A chin nyǝngkǝ bau buni rǝga mʊra jwagǝr da miyǝn mo: 'Hanjim me ba dǝgi ya gǝriya miyu.'" ¹² Tǝ dǝgi rǝ yutan Jɨnu, chǝte, bǝri bǝn nya guwan Jɨnu wʊ rǝ furi bwirai wa bunai ya nǝbǝntang a yǝmbǝ nyami, furi wa wʊlgamǝn bwi ya Niyajiyʊ rǝ yumi. ¹³ Mǝnni, tǝ yəgtən kumni a bwite jutǝkwang, kwam bǝn bu kohi mo "kokuwi ki," bǝra guwan Jɨnu ba bʊ furiyangʊ wa julaiyu a nǝngngatang a ji bwirai. ¹⁴ Bǝraki kǝnǝn chi kagǝm ba swerǝm ba Kristiyǝm ki bǝnǝn si rǝ kumni ya nǝbǝntang a furi nyǝngkǝ nən su rǝgǝng yɨgira mwatǝntǝ ki. ¹⁵ A jiya nyangngi kǝn suwe mo, "Ko kuwi, tə nwi jiir dan gǝn ki, kari bǝtǝ kʊssə furna jənu, nyǝra kota gugtang a dʊriyǝng." ¹⁶ Nǝn ba wʊne ba nwi Niyajiyʊwi ka gug dʊri? Me gǝ bǝn Mʊsa jǝrre rǝga tǝmba Masarǝməm ga? ¹⁷ Nǝn ba wʊnǝ bǝ hangʊ a nǝngnga jwagǝr rǝ gə jǝtǝ furtǝ gwarǝmi? Me gǝn ba nǝngnga Jɨni bwiraiyǝm ga, bǝ libotan jiyu a yǝra seiya mʊrǝm ga? ¹⁸ A bau buni nǝn ba wʊne go me ba dǝga gǝriyangʊ, me bǝn ba kwila nwitang a hangʊwiyǝm ga? ¹⁹ Kǝnǝn yǝm no hanjim a dǝmǝn ba dǝgiya gǝriyangʊ bǝra rǝ bunaiya nǝbǝntang a yǝmbǝ nyami.