¹ Bǝrarǝ nyang ka dautǝnwe nǝn kautǝn su a ji tǝnǝn nwiyu nyagʊ, kari bǝnǝn bulgamǝnwe. ² Bǝraki a chi yǝmbǝ weni tǝmri a suwem ka rǝ swiyer ki, na kǝnǝ yamǝntang tǝn bunai ya fʊngtang a soriyu bǝn mwetǝn duutǝtta dautǝnwi ki, ³ bǝnǝn jiir no nyǝne nǝn kwila kang jǝgrang kǝ kutanngǝng ki? Kang jǝgrang ke kǝn Niyajiyʊ a si finang kan gǝng rǝ jiguwʊng na ba nwiyǝm a be subǝmǝnǝm. ⁴ Niyajiyʊ ka yǝgtǝn a bʊ bukkan gǝng rǝ Jɨni churi, ya mǝnatang a buniyu, na yǝrǝ kumniyu dǝndang a nǝngngatang, a gwa wʊtǝ go dǝmǝntang ka We Yʊlgoi nyǝngka chu rǝ sǝr gǝrǝng. ⁵ Bǝraki Niyajiyʊ a ne bǝ gratǝ weni tǝmri a jiya gusǝtətǝ beri, tǝnǝ suwe yǝm bagǝmi. ⁶ Mǝnni, gu a guka ka bʊ buk rǝ yǝm, suwe rǝ go, "Ni wʊllai, wʊn dəg ba fura mʊ a giyʊ? Mǝnni yǝlla niyu, wʊ mǝn jǝgari? ⁷ Mʊmǝn nǝngnga ni a yarmǝn yari a weni tǝmri; mʊmǝn bʊtǝn gurmong rǝ yǝllǝnte rǝ grate, kǝn ti hangʊ a jiya swiyer da kangka mʊngǝng. ⁸ Kǝn ti Jɨni warigʊ mo hangʊ a chi rǝ grata jiyǝng." Bǝraki Niyajiyʊ a ti Jɨni warigʊ go hangʊ a yulo rǝ grata ji. A dʊtǝn bǝ guji a tari wʊn hangʊ merǝ grata jiyu. Mǝnni kʊ lambǝ nǝn churǝ ji warigʊ n’dəga sʊtətta hangʊwi fu. ⁹ Mǝnni kǝnǝn chu wʊ dǝg a yarmǝn a weni tǝmriyu a fula bani: Yesʊ, wʊ, bǝrarǝ kunang tǝn bwiyatangu, kǝn bʊtǝn gurmong rǝ netangnga grate tǝn gratətə kuntai. Bǝrarə nyang a gwa nǝttǝtta dautənbəwi ta Niyajiyʊwi, hangʊ ka nwimǝn bwiyatǝ we bǝra rǝ nǝb waringəm. ¹⁰ Niyajiyʊ ka chu go ka dautǝnwe, bǝra ka nǝngnga Jɨni warigʊ a gwan giyʊ, na nya bǝtǝbi mwam a yulo rǝ grate. Hangʊ a chu go ka dautǝwe nigra sitǝn kak a ba nya jǝgtangəm a ri a gwa notang a kunongi. ¹¹ Bǝraki wʊ kawʊrri tǝn bǝn kawʊrem dɨlda jiyǝn diyǝn. Bǝrarǝ nyang hangʊ a me rǝ bujǝri ta butang a hanjimi go chətti. ¹² Hangʊ a suwe go, "Bǝn si finang ka dunda mʊnǝng a gwa chittǝtta miyuwi, bǝn ma fiyang bǝra nǝn mwe a a jugǝr da nǝb mwamǝn." ¹³ Ka yǝgtǝn go, "Bǝn nga nǝn hangʊ." Ka kaubwiyǝng go, "Chu, mǝn gwe na rǝ bǝtǝmbǝ Niyajiyʊ a niyǝm." ¹⁴ Bǝrarǝ nyang, a chi bǝtǝm ba Niyajiyʊwʊm karǝ namtǝ tǝn dʊgǝmmǝng, Yesʊ rə kəgang karǝ gǝre nyǝngka hanjimǝng, go na a gwa bwiyati hangʊ ba maisǝre wʊ ka rǝ kumni ta bwiyati, mǝn suwe Chetan, ni bwira. ¹⁵ A nǝngnga nyang go na jǝgmǝn nǝb warigʊ a tata bwiyatiyəm a chim ba jiyəm warigʊ a mʊra kewete. ¹⁶ Bǝrarə nyang me weni tǝmri giya a furiyangʊwi; a nyangngi, duwʊm ba Ibrahimǝm gǝba furiya hangʊwʊm. ¹⁷ Bǝrarǝ nyang a chin bwi hangʊ a yullo nyǝra rǝ chittǝttangu a gani warigʊ, na nya hangʊ a yullo rǝ nwitang rə bumte tən nəngngatanga ji nya nigra tung Jɨni a chǝriya Niyajiyʊwi, na jiwa tau wa yǝnotang ka Jɨni bwiraiya nǝbbiyǝng. ¹⁸ Bǝraki Yesʊ rǝ bwigo ka no kunong tǝn bǝngorang a jutǝ mwam, bərarə nyang ba dǝmǝn a tuga bǝn bǝngorəm.