¹ Chǝre chǝre, Niyajiyʊ a sotǝn yǝmma Tebǝba nǝnnǝm, a jute dang-dang, a nyini ya nǝbbǝ yuwe yǝməm. ² Mǝnni a daam bǝ jiirǝm be, ka subǝmən amʊra yǝllangu, wa dǝg ba jau kulla Jɨnni warigʊwi. A nǝngnga gʊsǝte a gwa giyʊ. ³ Gǝn kwetǝrre a wertang ka Niyajiyʊwʊng, jiirgoi ya gratətan giyʊ tǝ kurǝkwangngi. A tau Jɨnni warigʊ rə gratəta bwan da giyǝnni. A bukka tumǝn Jɨnni bwirai ya nǝnnu wi, ka chi ya kang kǝ nyang ka Gratətə kuntai ta jiyu. ⁴ Hangʊ ka chi rǝ grata jiya weni tǝmri, nyǝngkǝ dunda gǝn da jau kulan ka li dǝgin dun rǝ gratǝ deni. ⁵ Mǝnni gǝn wʊnǝ we tǝmri gu Niyajiyʊ a sotǝn go, "Mǝn yilla miyu, ko kuwi kǝn yulo temʊ" na yǝgtǝn bo go, "Bǝn chitǝn te hangʊwi, na hangʊ ba chimǝn yǝla miyuwi"? ⁶ Mǝnni bo, fʊlla wʊ Niyajiyʊ wa berǝ yǝllangu rǝ jiguwi a mʊra gusǝti, hangʊ a suwe go, "Weni Temriya Niyajiyʊwi warigʊ a chi kwak a ne gratǝ hangʊ." ⁷ A ji ya weni tǝmri hangʊ a suwe go, “Hangʊ ga dǝg weni tǝmri weni, na bwiranǝm ba gəm sǝllən da kǝrangən." ⁸ Mǝnni a jiya Yǝlli hangʊ a suwe go, "Gu chiriya duutete mʊwi, Niyajiyʊ, wʊ kurekwangngi, Damər da dʊʊtǝn da mʊn damər da yəmbəmən a təgamən təgai. ⁹ Kǝn yotǝnda ji nya n'kwila ji bwira. Bǝrarǝ nyang Niyajiyʊ, Niyajiyʊwa mʊ, ka kwinǝn nʊng ka samǝntangngǝng ka mʊng, rǝ nʊng ka bwilǝmriyǝng a li ka kagǝm ba mʊm mǝm." ¹⁰ Rǝ jigu, Nigra, kǝn ti Jɨngta gusǝti. Ji n'swiyer da kangka mʊngngǝni. ¹¹ Ba su, mǝnni bǝn jau kak. Ba kiya warigʊ nyǝra dʊtte. ¹² Bǝn kulma warigʊ nyǝra ji mərani, na bǝn wʊlga nyǝra dʊtǝtta bwiyʊ. Mǝnni mʊ wə kwani, jǝtǝtta mʊ me bǝ jiire." ¹³ Mǝnni wʊnǝ we tǝmri gu Niyajiyʊ a sotǝn go, "Chiya kangkǝ nyang ka miyǝng yigira fʊlla bǝn dǝg nǝb ba kaggǝm ba mʊm a yulo nǝn dǝntǝlǝn dǝ bǝn nyab nanamʊ a jiyǝni"? ¹⁴ Balli me weni tǝmri warigʊ weni nǝngnga swiyerəm, bə tǝm bǝrarǝ jigatangnga bə jarə kula jǝgrangngǝmi ga?