¹ Kǝmǝn sugǝmǝnǝ mo wu ba jau kulai bwe ki, me dang tǝn kewe, nǝn kwini gərǝ kulahi warigu. ² Bəraki, hangu wa təm rə bə jǝga jǝnihiyəm yigira fula te titəni. ³ Nǝ nyang, fula wu nǝn ka nǝn bǝtǝbǝyu, nuwa mura halata jǝna gusətiyu. ⁴ Mǝnni fula wa dautǝnwi a beng, Niyajiyu ka tǝmme Yəllangu, wu nyiya buwi, na buwa mura soriyu. ⁵ A nǝngnga nyang go na gǝ yuwe ji nən wugoi a bǝ ka mura soriyəm, go na ba nǝn nya yutang nyǝra yǝllǝm. ⁶ Bǝra ki tǝn yǝllǝm, Niyajiyu ka tǝme We Yǝliyu a mura furna nǝnu, wu nǝngnga buwong go, "Abba,Tai." ⁷ A nyangngi me mǝn kewe mǝnni yǝlli, mǝn yǝlli ki, mǝn kamǝn sǝr rǝ kumung da kula jautangngən a mura Niyajiyuwi. ⁸ Mənni a wai fulla, a fulla tə yəmbə Niyajiyuwi, kǝn tǝgǝn tǝ chitǝn keweta a bǝ, bǝrarǝ kumnita, men kojiyute. ⁹ Mənni ku na kətə yəm Niyajiyuwung, na bo Niyajiyu ka yəm gənəng, nǝngnga mo nyǝnnǝ ki tə kautən bwi a jǝni me rə kumni tǝn finiyu? Tə fau tə chi kewete bo ga? ¹⁰ Tǝ so kote tǝn swangngǝr ti na fullani tǝn tǝn jǝtte. ¹¹ Mǝn nwi tate mo kari swiyerda miyǝng a mura jǝnu ba chi dǝrǝ kunǝn. ¹² Kǝ mǝn chǝllagəne, chite, tǝ chi nyǝra nǝn me, bǝraki kǝn chi nyǝra nǝn jǝn. Tǝ nǝngngai mǝn bǝ bwiran da gujiyən. ¹³ Mǝnni kǝtǝ yəm to bǝra rǝ bunaiya bwilǝmangnga miyu gun sigǝmǝn finang ka yǝmbǝ lǝmangngǝmi rə jiguwung. ¹⁴ Nǝn bunai ya bwi lǝmmangngi ya miyu ka dǝgǝn dəggən a bəngorang, tə kwilaibe. A nyangngi, kətə yi nyǝra rə we təmriya Niyajiyuwi, da mǝnǝ Kristi Yesu rə bwigo. ¹⁵ Bəra rə nyang, mǝnni dǝgtang ka kangǝng ka jǝnǝng ka le? Kǝn jǝggagǝmǝn mo, ba nǝngnga bwi ki, na bǝtə jəga məne kəmta jǝnu natə ni. ¹⁶ Mənni bo, kən chi chugo kagi yan jǝnnu bǝrarə yǝmbə nyam bən sugəmənə ga? ¹⁷ Hanjim bə fungən kursǝ-kurse, natə yullo bǝgiyǝm,mǝnni me bǝrarǝ ji nya. Bə fau go tə jǝggǝn a tari, na ba tǝ chi bǝ kursǝ-kursǝm ba gǝm. ¹⁸ Ka nyagu jǝtəkwang ni a nəngnga kursə-kurse bəra jǝni nya, kari ba təg tən na fulla nən ka kini. ¹⁹ Bətəm ba miyəm, bo muwa muriya kwewi a buwongi bǝra nǝn jǝn yigira fulla Kristi nya chim a jǝniyu. ²⁰ Kən li fautang mo na nənnu kin ku na wulga jir da miyən, bəra ki ka mən mənabuni nən jǝn. ²¹ Tə swimən, jǝn bə tə farǝ fʊngtang a soriyǝm, tə kautǝn bə su sorihi ga? ²² Bəra ki kən mula mo Ibrahim kǝna nu rə yəlləm bǝsu, kwan a gwa kewei mǝnni kwan wa gwa nyi ya kaiyu. ²³ Mǝnni wu kwani bu wa ga kewei mura bwi, mənni wu kwani bu a gwa nyi ya kaiyu bərarǝ bʊrǝm. ²⁴ Yai jəni yaiye bən jǝgga nyagu nyǝra bəngorang, bəra ki nyim bambe bə sitang na yǝmni burǝm tǝsu. Kwan na jiyu a jire wa bang ka Sinaiyǝm ka buwo bətəm bən Kewetəm.Waiwe nən Hajaratu. ²⁵ Ku Hajaratu gən bang ka Sinaiyǝng a təm ba Arabiyam; a siya nyiya Urshalima kuwi, bəraki wa kewete tən bətəm bangəm. ²⁶ Mənni Urshalima jiyu nən yǝllənte men kewe, mǝnni gən ne nənu. ²⁷ Bəraki mula mo, "Nəngnga məksai, mu nyiwu mən bəlmiyu, me bǝ bəri. Gug jir na dulga bǝra fur dǝ kwauwun, mu me mən nwi kwewi a buwongi. Bəraki bətǝm ba nyi jamǝni nǝn mwam a li ba nyi karǝ nibariyu." ²⁸ Mǝnni jǝn, chitte, nyǝra nǝn Ishaku, tǝn bǝtǝm ba yəm burǝmǝm. ²⁹ A wai fulla wurere wum bu a bwiyu ka ne kunang wu bu a We. Nən nyang ku nyangnyəngke. ³⁰ Wulai ji wang a suwe? "Ka bwe chuwi kewei tən yǝlli. Bəra ki yəlliya bwechuwin kewe me ba wutogo kulla tən yǝlliya nyiya kaiyʊwi." ³¹ Bərarə nyang, chite, nən me nən bətəm ba bwechuwi kewem, mənni nən ba nyi rǝ kaiyuwi.