¹ Bərarə nyang, tə chi nəbbə məssamənna Niyajiyʊwʊm, nyəra bətəmbə bən yotəndam. ² Tə yo mʊra yodai, nyəngkə Kristi ya yobəmən da gərəng, na nəbbən dʊr da gən, ji tungri məttəmətti a gwa Niyajiyʊwi. ³ Kari bən nwi yəm ba taltəm a səttənni tan jɨnʊ, ki jɨni sirəmmi, ki sʊ ki, a dautən bə nya a mʊra nəbbə yʊlgoiyəm ba Niyajiyʊwʊm. ⁴ Kari bən nya nemər,yəmba mɨtəm, yʊtə bwirai ya dautən bəwi tən jɨniya dautən bəwi warigʊ. A nyangngi, tə yʊllo rə wʊnnan. ⁵ Kəttə yəm to me talli, ni merə yʊlgoiyʊ, ni rə sʊwi- mən sʊwe mo ni ne gratə jibaniyʊ, ba nya kʊla a mʊra dʊʊtəta Kristi na Niyajiyʊwi. ⁶ Kari gʊ ni ba jʊllangən rə bwantətə rə kʊnni, bərarə jɨni yaiye giyə jwaggər da Niyajiyʊwʊng betən na bəttəm bə me bə nwi yəmməm. ⁷ Kari bətə mʊrga bwi tən hanjim. ⁸ Na tən nʊ a mʊra kʊm mənni kʊ tə wa kwetərrəi a mʊra Nigrai. Tə yoyom nyəra bəttəm ba kwettərrəm, ⁹ (bəraki finin ta beta kwəttərai wa mʊra nyagʊwi warigʊ, nəngnga ji nya, na yəmbə nyam) ¹⁰ tə fauwe ji ləm bwi Nigrai. ¹¹ Kari tə məra bwi rə swiyetəttə bwirai ta kumi, mənni tə gʊlla. ¹² Bəraki jɨni ba hanjim nəngnga ra kʊlukʊlʊwi bwiyʊ jiya bʊjəriyʊ a sʊtang. ¹³ Bəraki fʊlla wʊnə ji warigʊ jəge wa kweterrə, ki kən chure. ¹⁴ Bəra nyang, jɨn churi gən kweterei. Bəra nyang, a sʊwe go, "Gʊn, mʊ wa dʊmmi, na gʊn mənna ba bɨtɨrom, na Kristi ba yən a jiya mwi" ¹⁵ Tə jəgga nyagʊ nyəng kə kətə yogərəng-me nyəra bə merə bərsanəng mənni nyəra wʊ rə bərsannəm. ¹⁶ Tə yiya fʊlla bəraki mʊwa kotihi bwirai. ¹⁷ Bərarə nyang, kari bətə yʊllo mɨte, mənni tə jəgga nyəngkə kəmmarang ka Nigrang ka gərəng. ¹⁸ Kari bətə dʊ chʊwa jəggəng, bəra ki lʊgtən yobi. A nyangngi, tə ri rə We Yʊlgoi. ¹⁹ tə sʊga yəm a mʊra fite, na fitətta Wei. Tə mara fite, tə wer Nigra a furna jɨnʊ warigʊ. ²⁰ Jʊtəkwang tə nəngnga wʊnnan a jɨni warigʊ a mʊra dʊn da Nigra nənnʊ Yesʊ Kristi yɨgira Niyajiyʊ Te, ²¹ tə nəbbənə dʊttəta jɨnʊ a bwita jɨnʊ tə ne grate Kristi. ²² Nyʊiyəm tə ne dʊttətan jɨnʊ nəbbə barəm ba jɨnnəm, da tə ne Nigra. ²³ Bəraki nibari gən dʊr da nyʊin, nyəngki Kristi gən dʊr a bən Ekklisiyam, Kristi rəbwi go gə Ni jigriyan gʊ. ²⁴ Mənni nyəngkə bən samənsawi nəbbən dʊr gra Kristiyʊ, a chi kwak nyʊiyəm a nəbbən dʊttəttan jiyʊ a nəbbə barəm ba jiyəm a jɨni warigʊ. ²⁵ Nəbbə barəm, tə yotənda nyʊiyəm ba jɨnəm nyəra kə Kristi a yotənda gəra Ekklisiyang na nəbbən dʊr da gən bəra nəngəng. ²⁶ Kristi ya nəbbən dʊr da gən go nagi tʊməm a chi yʊlgo, nyəng ka tʊmən hangʊ rə hi na rə bwanən, ²⁷ na ba gə nəbbən hangʊ a gwan giyʊ nyəra grate, me rə nemər, me rə bwiran, kənə wʊnə ji ki, mənni a chi me rə bwiran. ²⁸ A mʊra wai jʊwi, nəbbə barəm ka dautən a yotən da nyʊiyəm ba jiyəm nyəra bwitan jiyʊ. Wa yotən da nyʊiyan gʊwi a yotən na dʊr da gən. ²⁹ Me rə ni kwila bwiyan gʊwi, mənni ka yʊwəlle na yəngna rə nyagʊ, nyəngkə Kristi yʊwəlle na yəngnarə Ekklisiya nyagʊwʊng. ³⁰ Bəra ki nən sʊni bwiyang gʊ. ³¹ "Bərarə wai jiwe, ni ba dʊ te tən nee a mʊrga bwi tə nyʊi ya gʊ, na ji bəsʊ ba chi nam kwan." ³² Bam yəm bə nyam bəm kʊlʊkʊlʊwiyəm, nə grate dəni- mənni mən sʊ yəm a Kristiyʊ tən Ekklisiyang gʊ. ³³ Nən nyang bo, a chi kwag wʊnna jɨnʊ a yotən da nyʊiyangʊ nyəra dʊr da gən na nyʊi bo a chin kwag a ne grate nibaran gʊ.