¹ Bərərə nyang a nyiya miyʊ mə wa niya chənti bərarə Nigra, kəmmən chəlla gənnə tə chi-chim ba dautəna buwʊng kə Niyajiyʊ wa bəgəng rəgən. ² Kən chəllagən tə chi rə səgtang ka dʊrəng deni, rə mitang ka dang, tə chi rə yodai a bwite jɨnʊ. ³ Tə nəngnga nyəng kə bətə dəmən rəgəng natə chi rə mʊrgatang ka dʊrəng ka Weng a jʊwi ya chim bə ləmmangngəm. ⁴ Kau bwi kwan na We kwan, nyəra kə bəggənne gra jiya titang ka dang kwan. ⁵ Mənni ka Nigra wʊ kwan, nəbbəntangnga yəm bə nyam kwan, batisma kwan. ⁶ Na Niyajiyʊ kwan warigʊwi, wʊ ka ji tə warigʊ, na mʊra warigʊwi na gwa warigʊwi. ⁷ A wʊna nənnʊ kən ne nettəttən dautən bəwi a ji ya bɨngorang ka nebbəntang ka Kristiyəng. ⁸ Nyəra kə bwan a sʊwe rəgəng: "A fʊlla gwiya jiyʊ, ka fʊng rə nebbən tʊwa tʊwaiyəm yɨgira mʊra nəngngatang a kewete, bo ka ne nəb nəttə dəndang. ⁹ Jəgga bwan də,"Ka gwi ya ji" a dimən a mən sʊwe mo, ka suwa mʊra təm wʊluloi? ¹⁰ Gə wai wa sʊwei nən gə bo wa gwi pre a jiya jitte, naki gə rə jɨni warigʊ. ¹¹ Kristi ka bu go yʊllo nəb təmrəm, bə nəb yʊwerəm, bagi bə, ware yəmbə ləmmangngəm, bagi yarəm tən nəb məssarrəm. ¹² A nəngnga nyang go na gə yəngna nəbbə yʊlgoiyəm ba gəm bərarə swiyer, bərarə mʊtang a bwiya Kristiyʊ. ¹³ Ka jau kak rə mʊtang a bwiyang gʊ yɨgira fʊlla bənən bən chim chim ba mʊrgatang ka dʊrəng ka nəbbəntang ka yəm bə nyaməm ba yəlla Niyajiyʊwi, go na tənən gra na nən lau bɨngorang ka ritangnga ka Kristiyəng. ¹⁴ Kristi a mʊ bən nən gra nakki kari bən kau bwi nən chi bəttəbi, bə bən chi wʊlgarə səmba məssartə dəndangi na rə bərsan da nəbbə bwiranəm a mʊra jʊlai ya jiyʊ. ¹⁵ A jiya nyangngi, nən sʊrə yəm bə nyam a mʊra yodai na nən gra jɨni warigʊ a jʊwiyan gʊ a mʊra waiwe gən dʊri, wai nən Kristi. ¹⁶ Kristi bə mʊ bwi warigʊ, kən mʊrga tau kwang rə nəttə tʊgari warigʊ, mənni gani warigʊ a nəngnga swiyer kin ki, ba dəg bwi a gra nyəng kə ba mʊ bwiyan gʊ a mʊra yodai. ¹⁷ Bərərə nyang, kən sʊwe mənni mə wʊla wer a mʊra Nigra, mo kari bəttə kaubwi tə chi chim ba nəbba yəm bə Niyajiyʊwʊm nəngnga ra mʊra chim bərə kʊnnəm bə me rə finiyəm. ¹⁸ Me bə jəgga kəmmarang ka jiyəng, ka chin fʊbe a yobi ya Niyajiyʊwi, bərarə bʊnai ya yəmtangngi wʊ ka furna jiyʊ yə kəngkangngi. ¹⁹ Me rə bʊjərri, ka nəbbən dʊttəta jiyʊ a yobiya bwiyʊ rə swiyetəttə bwirai rə kʊnni. ²⁰ Tə məssa bən Kristi a wai jʊwi we. ²¹ Mən kəmma mo kətə nwi a ji nyangngi, bo mo kən məssagəmən a mʊra ngi, nyəra kə yəm bə nyam wa mʊra Yesʊwiyəng. ²² Kə məssagəmən mo tə kwisəre ji wa chi yobiyan jɨnʊ wʊ kʊniyʊ, mo tə jəgmən Ni funni. Ni funni hi ga kiya kiyai bərarə jʊllai wʊ ka fʊriyan gʊwi. ²³ Kən məssagəmən mo tə fʊlga bwi a mʊra we furna jɨnʊwi, ²⁴ na tə mai ni fi wʊ nəngnga a mʊra wʊllo Niyajiyʊwi-a mʊra nəngngatang kə nyagʊwʊng tən yʊlgoi. ²⁵ Bərarə nyang, tə kʊssəre nyatte, masi wʊna jɨnʊ a sotən yəm bə nyam a niya kʊliyʊ wa gʊ" bəraki tən sʊni bwi kwani. ²⁶ Tə nəngnga jwagər, mənni kari bətə nəngnga jɨni bwirai. Kari bətə dʊ ko yar tə ka jwaggər. ²⁷ Kari bətə ne da Chetan. ²⁸ Wʊ na nʊ nikʊwi a dʊ kʊte. A chin kwag a nəngnga swiyer rə kanan gʊ na nya jiba tʊga bagi rəgi. ²⁹ Kari yəm bə bwiram a jɨre a mʊra nyi na jɨnʊ. Tə nəngnga swiyer rə bwantəttə ba chi a tʊga mʊ bagiyəm, a jiya fʊntang ka jiyəng, na bwantətta jɨnʊ a tʊga ba nwinnəm. ³⁰ Kari bətə ləbtəmən fʊri ya We Yʊlgoi ya Niyajiyʊwi, bəraki a gwa giyʊ gʊn bagəmən kʊran gəri bəra ko jəgang ngi. ³¹ Tə kʊssəre tirətəi warigʊ, jwagər, nyəbgatang a yəmni, kəbgai tən yəgai jɨni bwirai warigʊ. ³² Tə nəngngatən nyagʊwi a bwita jinʊ, tə chirə furni ləmmangngi, tə yənotənna bwita jɨnʊ, nyəngkə Niyajiyʊ a mʊra Kristiyʊ a yənogəmən rəgəng.