¹ Bərə nyang, me Bulus, me niya chənti ya Kristi Yesʊwi bəra nən jɨn bətə yəbbə yəm bə nyaməm. ² Mən kəmma mo kətə nwi yəm ba swiyer də nəttəttən dautən bəwi ta Niyajiyʊ a ni bəra nən jɨni. ³ Mən mʊla gəmən a jiya churang kən nʊngiyəng. Bam be gən yəm bə nyam ba kʊlʊ-kʊlʊwi bwiyəm bən mʊlla gəmən kəptərəm. ⁴ Fʊlla tə ke wai jiwi, bətə jəgga jɨn barabaraiyʊ a jiyang Kristiyʊ. ⁵ A təgai təngngərte nʊngbən bə bətəm ba nəbbəm yəmbə nyam bambe. Mənni kʊ We ka nʊng nəb təmrəm tən nəb yʊwerəm bə samən bəra swiyer dan dəm. ⁶ Bam yəm bə nyam bən kʊlʊ kʊlʊwiyəm gə bə sʊwe rə go nəbbə me Yahudawawʊm chəttəta jautang a kʊlai na bo sʊni bwiyʊ nən kin, bo bənən wʊtəgo yəm bʊrəm ba Kristi Yesʊwʊm a mʊra yəm bə ləmmangngəm. ⁷ Kən yʊllo bwira yəm bə ləmmangngəmi bambe a gwa nəttətən dautən bəwi tə Niyajiyʊ a nəbbən a mʊra swiyer da kumni ta gʊwʊn. ⁸ Niyajiyʊ ga ni tai nətte, nən kwini məmən yarmən a mʊra nəbbə yʊlgoiyəm ba Niyajiyʊwʊm. Tai nəttə te go na sitən finang ka yəm bə ləmmangngəm a bən me Yahudawam a jiya yuumməntang ka nəttətan Kristiyəng. ⁹ Nəttəta Niyajiyʊ bera mi go na jəggatənna nəb warigʊ ji ya chin kəmmarang ka Niyajiyʊwʊng. Wai jiwe Niyajiyʊ a kʊlʊ-kʊlʊ a jittə mwam ta suwi, gʊ wa nəngnga jɨni warigʊwi. ¹⁰ Wai jiwe nʊng nəb a gwa Ekklisiyam naki bə nəngnga duutəm tən kumni a mʊra ji a nya yəmtang a jʊtə dəndang a bərsan da Niyajiyʊwʊn. ¹¹ Wai jiwe a nəngnga bwi nyang bərə kəmmarang kə mebə təgəng ka ri bwi a mʊra Kristi Yesʊ Nigra nənnʊwʊng. ¹² Mənni a mʊra Kristiyʊ nən ka nənnə kumni rə nyatang dʊra səssi bərarə nəbbəntang ka yəm bə nyam ba nənnəm a mʊra gi. ¹³ Bərarə nyang kəmən chəlla gənne kari furnan jɨnʊ ba bətəro bərarə kʊnnang kəmən norə bəra nən jɨnnəng wʊ gən gratətan jɨnənʊwʊng ¹⁴ Bərarə nyang kən ru rə dʊnte a kak ka Taiyəng, ¹⁵ wʊ a kən baratənə kai tən təmi. ¹⁶ Mən rʊwa nyini mo a nga gəmən, bəra yuumməntang ka gratəta gʊwʊng, tə nya kumni a mʊra Weng gʊ,wʊka mʊra jɨnʊwi. ¹⁷ Mən rʊwa nyini mo Kristi a chiya mʊra furna jɨnʊ a gwa nəbbəntang a yəm bə nyammi,na tə chi tə dəg nəttə wʊlʊlloi a mʊra yotang ka dang kagəng. ¹⁸ Masi tə nya kumni tə jəggarə, rə nəbba nəbbən yəm bə nyaməm warigʊ, wʊn gə gran, wʊliliyʊ, tə bangsangngi na wʊləlloi, ¹⁹ Na tə yəm yotang ka dang ka Kristiyəng, ka li yəmtangngəng, natə ri rə ritang ka Niyajiyʊwʊng warigʊ. ²⁰ Kʊ a wʊ karə kumni a nəngnga jɨni bənən chəllai warigʊ ali ji nən kəmmari, a mʊra kumni tangʊ tə nəngnga swiyer a mʊra nənniyʊ. ²¹ A gwan giyʊ kumni a chiya Ekklisiya na mʊra Kristi Yesʊwi a tangngərtə warigʊ kʊrəkwang tən kʊrəkwang. Amin.