¹ Na nʊ tən nəbba bɨtɨro-bɨtɨroiyəm rə letang na jɨni bwiraiya jinʊ. ² Na tə chi-chim ba jɨnəm a wai yobi wai we nyəngkə gʊsətə tə kʊwi ka gərəng. Nanʊ tə chi-chim ba jɨnəm nyəra ba nidʊ wa dʊʊtətta simbami, we wʊ nəngnga swiyer a mʊra bətəmbə me bə nwi yəməm. ³ Warigʊwa nənʊ na chi mʊra nəbhəm, nən fʊng jɨni bwita nənʊ fari, tən təm bwiran rə kəmmarang ka be bəmən a furniyəng. Na nʊ nən chi nən bətəm ba jwagərəm, nyəra rə bagi nəb. ⁴ Mənni Niyajiyʊ wʊ rə bʊmtə mwami bərarə graji ya yodai hangʊ a yobəməni. ⁵ A jiwʊ nən bətəro-bətəroi a mʊra jɨni bwirai ya nənʊwi, ka dəg bəne chi rə yuumum bə fiyəm warigʊ a mʊra Kristiyʊ- a gwa nətəttənən dautən bəwi gʊn jəgbəni. ⁶ Niyajiyʊ ka gugbən kin na Kristi, Niyajiyʊ ka dəgbən chi kin warigʊ a ji a mʊra Kristi Yesʊwi, ⁷ a nəngnga nyang go na tangngərtəttə beri gə nʊngbən gratətta nəttəttangʊ tən dautən bəwi tə me mən bɨngori a mʊra Kristi Yesʊwi. ⁸ Bərarə nəttəttən dautən bəwi gʊn yiyabəni a gwa nəbbəntang ka yəm bə nyami, wai wa jɨre ba jɨni, nəttə ta Niyajiyʊwi. ⁹ Nəttəttən dautən bəwi a be bə bərarə swiyer, bəri gʊ ba gug dʊr. ¹⁰ Bəraki nən swiyer da kang ka Niyajiyʊwʊn, nəngnga bən a mʊra Kristi Yesʊwi na nən nəngnga swiyetətə nyai, tə Niyajiyʊ a kʊrabəmən rə langtang, go na nən yo yom a mʊriyəm. ¹¹ Bərarə nyang tə kəma to natə nʊ tən nəbba kuməm a mʊra bwi. Mən bəgən mo "nəbbə mwiyatən bə kwaltəm" a rə ji bərə mo nəbba mʊya kwaltəm a mʊra bwiyəm bən nəngnga tən rə kana nəbbiyim. ¹² A wai ji wʊrere kən wʊtəgogən tən Kristi. Tən fʊbe a nəbba Israi'lam. Tən fʊbə ba yəm-bʊrəməm. Tə me tənə titang a fʊri a gʊji a kaggi. Tə me tənə Niyajiyʊ a mʊra gʊsəte. ¹³ Mənni kʊ a mʊra Kristi Yesʊwi jɨn bə natə nʊ pre nən Niyajiyʊwʊm kən be nən jɨn rə do bərarə dʊgʊm ba Kristiyəm. ¹⁴ Bəraki gən chim bə ləmangngəm ba nənəm. Ga mʊrga bəsʊ a chi kwan. A gwa bwiyan gʊwi ka nyəng kʊli na wʊtəgo bəni. ¹⁵ Mə sʊwe mo, ka dəbmən jʊta soriyʊ go na gə nəngnga ni fi kwan a mʊra gi, naki a be rə chim bə ləmmangngəm. ¹⁶ Kristi ka negobən a chi bwi kwan a gwa Niyajiyʊwi a mʊra riyang yʊwarang, na tʊrsəmmən bʊnai ya nwigotangngi. ¹⁷ Yesʊ ka be sigəmən finang ka chim bə ləmmangngəmən jɨn bə na tə nʊ pre na chim bə ləmmangngəm tən bə karə dom. ¹⁸ Bəraki a gwa Yesʊwi waringəm ba nənəm bəsʊ a mʊra We kwan nən kanənnə jʊwi yɨgira Tei. ¹⁹ Bəra nyang, jɨn bə na tə nəbən bə yəm bə nyaməm me tən nəbbə me Yahudawam. A nyangngi,tən nəbba təməm tən nəbbə yʊlgoiyəm ba Niyajiyʊwʊm tən bə me Yahudawam. ²⁰ Kən mʊgən a jɨngta nəb-təmrəmi rə ya nəbbə yʊwe yəməm, Kristi Yesʊ rə bwigo gən wer da jɨngən. ²¹ A gwa giyʊ warigʊ jin mʊwi ka chi bwi nyagʊ ka gra nyəra rə kanda chəriyən a gwa Nigrai. ²² Wa mʊra hangʊwi kətə nya mʊgən nən na tə yʊllo gwa chəri ya Niyajiyʊwi a mʊra We Yʊlgoi.