¹ Bulus, ni təmri ya Kristi Yesʊwi, a mʊra kəmmarang ka Niyajiyʊwʊng yɨgira bə yʊlgoiyəm bə ka Afisam, na nəbbə nəngnga ji nyai a mʊra Yesʊwʊm. ² Nəttətən dautən bəwi tən bə Niyajiyʊ Te nənnʊ na Nigra Yesʊ Kristiyʊ. ³ Masi Niyajiyʊ tən Te Nigra nənnʊ Yesʊ Kristi a yʊ wertang, wa dəg bəmən kang, rə kənnə nəbbəntang ka Weng warigʊ a mʊra ji na mʊra Kristiyʊ. ⁴ Niyajiyʊ a sabəmən a mʊra gi a sʊtang ka gʊsətəng, go na tən chi rə yʊlgoi rə bʊnai ya ji ya kəbari a kak ka gəng. ⁵ Niyajiyʊwi ka sabəmən rə jigʊ nən chi bətəm ba gəm a mʊra Yesʊ Kristiyʊ, a mʊra fautang kə nyang ka fʊriyangʊwʊng. ⁶ Yəbəntang ka nənnəng a be nən wertang ka gratəttan gʊ ta nəttətən dautən bəwi wa nəbbən bərarə wʊn hangʊ a yotən dai. ⁷ A mʊra Yesʊ Kristiyʊ kənən nya jəgtang bərarə dʊgʊm ba gəm na yənotang ka jɨni bwiraiyəng,bərarə yuumməntang ka nətəttan gʊ tən dautən bəwi. ⁸ A nəbbən nətettən dautən bəwi mwam a mʊra bərsan na jəggatən. ⁹ Niyajiyʊ ka nʊngbən kəmarangəng kə kʊlʊ-kʊlʊwiyəng, a nyəng ka dautən gra giyəng, na nyəngka bɨngo bəmən gra mʊra Kristiyəng. ¹⁰ rə kəmmarang ka ritang a ji tiya kagi a ritang ka fʊllang na gə kʊra jɨni warigʊ, jɨni warigʊ ya jiyʊ rə təmi, berə ga dʊr da gən, nən Kristi. ¹¹ A mʊra Kristiyʊ kən nəbbən jautang a fʊlla. A nəngnga bəmən rə jigʊ a mʊra nəngngatang ka gəng, wʊ təm jɨni warigʊ yɨgira jʊwiya kəmmarang ka gəng. ¹² Niyajiyʊ a sabəmən naki nən chi bə jarə kʊlam na hangʊ a chi wʊ rə jigʊ ba bau fʊri a titang a dai a mʊra Krisityʊ, naki nən chi bərarə wertang ka gratətta gʊwʊng. ¹³ A mʊra Kristiyʊ, jɨn rə kəgənəng, a fʊlla tən nwi bwan da yəm bə nyaməm,yəm ləmmangngəm ba yiyatang ka jɨnəngəng, kətə nəbbən yəm bə nyam a mʊra gi kən bu gəmən kʊrən rə yəm bʊrəm ba We Yʊlgoiyəm. ¹⁴ wʊ gən ngarang ka jautang ka kʊla nənnʊwʊng,yɨgira fʊlla nən lau ritang ka gənəng, yɨgira wertang ka gratəttan gʊwʊng. ¹⁵ Bərarə wai ji we, a fʊlla wʊ nwi nəbbəntang ka yəm bə nyam ba jɨnəm a mʊra Nigra Yesʊwi rə yodai ya jɨnʊ yɨgira nəbbə yʊlgoiyəm ba Niyajiyʊwʊm warigʊ, ¹⁶ Dʊbe wʊnnan yɨgira Niyajiyʊ bəra nən jɨn a fʊlla mən dəggən a rʊwaninyini ya miyʊ. ¹⁷ Mən rʊwa nyini mo Niyajiyʊ wa Nigra nənnʊ Yesʊ Krisityʊ, Te grati ba nəggən we bərsani rə churang tən yəmtang. ¹⁸ Mən rʊwa nyini mo kəmta furna jɨnʊwi a wʊmen bwi, na tə yəm yəm bə nyam ba buwʊng ka jɨnəməng tən yuumməntang ka gratətta kʊla gʊ a səttəni ta nəbbə yʊlgoiyəm ba Niyajiyʊwʊm. ¹⁹ A mʊra rʊwani nyini ya miyʊ, mən chəlla masi tə yəm gratəttə me bɨngortə wi ta kumnita gʊwʊng a mʊra nəbbən yəm bə nyaməm, yɨgira swiyer da kumni ta gʊwʊn. ²⁰ Tai tə gə kumni tə kwani tə Niyajiyʊ a nəngnga swiyer a mʊra Kristiyʊ, a fʊlla gug hangʊ mʊra ba bɨtɨrom na ne gʊ chiri a kang kə nyang ka gənəng a jiyəng. ²¹ Ka ne Krisit gʊ chiri pre a ji rə dʊʊte, tən kumni na titang, na dənə dʊn də bən buwʊn. Kristi ba nengnga dʊʊte, me a dan tangngər də gə kwan mənni nyang a tə beri. ²² Niyajiyʊ ka dəg wʊnə ji warigʊ a nana Kristiyʊ ka nəbən Ekklisiya a chin dʊr a ji a jɨni warigʊ. ²³ Ekklisiya gəng bwiyangʊ, ritang ka wʊ ri jɨni warigʊ a mʊra warigʊwʊng.