¹ Bətəbi, tə nwitən yəm a nəbba bəgənəm a mʊra Nigrai, wai we ngə nyagʊ. ² "Nə ne grate te mʊ tən nee mʊ" (wʊ gən sori rə jigʊwi rə yəmbʊrəm), ³ "na ba nəngnga nyagʊ na tə chi kotə wʊlliliyʊ a gʊsəte." ⁴ Tebe, kari bə tə dəg bətəmba jɨnəm a nəngnga jwagər. A nyangngi, tə no a mʊra yʊrang kə nyang tən soriya Nigrai. ⁵ Kewete, tə nwitən yəm a nəbbə gram ba jɨna gʊsətəm rə grate na rə tate a fʊriyan jɨnʊ rə yəmbə nyam ba jɨnʊwəm. Tə nwi yəm a hanjimi nyəngkə bətə nwitən yəm gra Kristiyəm. ⁶ Tə nwitən yəm me bərə kə nəbbə gram ba jɨnəm ka jəgga gəmən na ba nwi fur də kwauwʊn nən jɨn. A nyangngi, tə nwitən yəm nyəra keweta Kristiyʊ, bə nəngnga kəmmarang ka Niyajiyʊ a mʊra fʊriya jɨnʊwʊng. ⁷ Tə nəngnga swiyer rə furna jɨnʊ warigʊ, da tə nəngngatən swiyer a Nigrai men nəbbe. ⁸ Bəraki kətə yəm to wʊnə ji ni ya nəngngai ki, ba yʊ jangəmiyang a gwa Nigrai, ki kewe ki, ki bwe kai yʊ ki. ⁹ Nəbbə gram, tə nəngnga tən na kewetan jɨnʊ a jʊwi kwani. Kari bətə ne tate. Kətə yəm to hangʊ wʊng Nigra jiyʊwi na wʊniyʊ wa mʊra ji, na bo me saməntang wa hangʊwi. ¹⁰ A mwatənte, tə chi rə kumni a mʊra Nigrai na rə kumni ta gratəttan gʊwi. ¹¹ Tə kwi jɨniya kʊni ya Niyajiyʊwi warigʊ, na bətə dəmən tə si rə kak a dəlna Chetani. ¹² Bəraki tərsatang ka nənəng me ka namtə rə dʊgʊməng. A nyangngi, wa kak rə nəbba tau təməm, tən weni rə kumniyʊ, na dʊʊbe bə bwiram ba mʊra kuməm, a jiya weni bwirai a gana jiyʊ. ¹³ Bərarə nyang, tə kwi jɨna kʊni ya Niyajiyʊwi warigʊ, na bə tə dəmən tə si rə kag rə kumni a wai fʊlla bwira, a buk kə tə nəngnga jɨni warigʊwʊng, tə si rə kumni. ¹⁴ Tə si, bərarə nyang, a bukkə tə bʊ dagla yəm bə nyami, tən bəm a nəngngatang a ji nyai. ¹⁵ Nyəra ləbərta nanan jɨnʊ, tə mai kʊratang ka bwiyəng a finang ka yəm bə ləmmangngəm ba chim bə ləmmangngəməm. ¹⁶ A wʊnə yobi ta ka mʊriyʊ warigʊ, tə dəb bəm a nəbbəntang a yəmbə nyami, ji wʊ bətə dəmən tə dum bətətta wʊ bwirai. ¹⁷ Na tə dəb dala yiyarangngi tən dampo Wei, wʊ gən bwan da Niyajiyʊwʊni. ¹⁸ Rə yənə nyini rʊwani rə chəllan, tə rʊwani nyini jʊtəkwang a mʊra We. Rə wai fʊri we, jʊtəkwang tə chi rə jəggatang, rə tautang ka dang warigʊ, a fʊlla tə rʊwani nyini bəra nəbbə yʊlgoiyəm ba Niyajiyʊwʊm warigʊ. ¹⁹ Na tə rʊwaimən nyini, nyəngkə bən ni bwan a fʊlla bə wʊmən nyiya miyʊwʊng. Tə rʊwa nyini na nya sʊ ji nya kʊlʊ-kʊlʊ bwiyʊ a jiya yəm bə ləmangngəməng rə kumni. ²⁰ Bərarə yəm bə ləmmangəm gʊ chin mən ni təmri wʊ ka mʊra chəntti, na ba sʊ yəm rə kumni, nyəng ka dautən wʊ bən sʊwe rəgəng. ²¹ Tikikʊs, chiya yodai na kewe rə yəm bə nyami a mʊra Nigrai, ba sʊgəmən jɨni warigʊ, na ba tə yəm nyəngkə mən ka gərəng. ²² Kən təm gəmən hangʊ bərarə kang kəmmarang ke, na tə yəm nyəngkə nən ka gərəng, na nyəngkə ba yɨgəmən kumni a furna jɨnʊwʊng. ²³ Masi chim bə ləmmangngəm a chiya gwa chətti, na yodai tən nəbbəntang a yəm bə nyam a gwa Niyajiyʊwi Te na Nigra Yesʊ Kristi. ²⁴ Masi na nəttəttən dautən bəwi a chi rə ba yotən da Nigra Yesʊ Kristiyʊ warigʊwʊm rə yodai wʊ me bə jiiri.