¹ Kə Niyajiyʊ ka guggən tən Kristi, ki tə fau jɨni ka jiyʊ, a gwa Kristi ka chiwi a kang kə nyang ka Niyajiyʊwʊngngi. ² Tə nəngnga kəmmarang a jɨni ka jiyʊ, me mʊra jɨni ka təmmi. ³ Bəraki kətə bətəro, yuumum ba jɨnəm ka bəmənbʊwi bwi tən Kristi a mʊra Niyajiyʊ. ⁴ Bukkə Kristi a bewi, wʊ gən yuumum ba jɨnəmi, jɨn bo bətə be kin a mʊra grate. ⁵ Tə mʊgte, jəllən da gʊsətən- talte, sirəmmi, faurang kə bwirang, burri bwira, jəllən, na sʊ, wʊ gən fʊngtang ka weni bwiraiyəng. ⁶ Bərarə jɨni yaiye, giyə jwagər da Niyajiyʊwʊn səgtəne bwiya nəbbə mebə nwi yəmməmi. ⁷ A mʊriya wai yobi gʊna tə chitən wi. ⁸ Mənni kʊ a chi kwak tə jamən yai jɨniye-furi kwewi, jwaggər, kəmmarang kə bwirang-kəbar na yəmbə sirəmməm a nyiniya jɨnnʊ. ⁹ Kari tə kəratən nyata bwita jɨnnʊ. Bəraki kətə jəgmən ni funi rə swiyertəttagʊ, ¹⁰ Mənni bo kətə mai ni fi wʊn tʊmmən bwiya a gwa giyʊ rə yəmtangngi a wʊllo wa nəngnga hangʊwi. ¹¹ A gai me yəmba niya Heliniyawai na niya Yahudawai ni mwetən ka jwinnəng na rə wʊ mwetən bi, fʊbe, Baubawa, Sikitiyawa, kwewe, wʊ rə chim ba dʊrrəmmi, mənni Kristi gən warigʊ, ka mʊra warigʊ. ¹² Tə chi nyəra bə Niyajiyʊ a sammən sauwiyəm, rə yʊlgoi na bən yotən daam, tə chi rə bʊmte, ji nya, dəndenni, tautangnga dʊr, tən mitangnga daa. ¹³ Tə mida rə bwite. Tə nəngngatən jɨni nyai a bwita jɨnnʊ. Kə gʊ kari yəm tən gʊ ki tə yənotən nyəng kə Nigra yəno gəmən gərəng. ¹⁴ A li yai jɨni yaiye warigʊ, tə chi rə yodaai, waiwe gən ji bʊ a ririyʊ ¹⁵ Masi chim bə ləmangngnəm ba Kristiyəm a ri furna jɨnnʊ. Bərarə bam chim bə ləmmangngəm be gə ba dəg ki buwogəne a mʊra bwi kwannəm. Tə nəngnga wʊnnan. ¹⁶ Tə dʊ yəm ba Kristiyəm a chiya jɨni rə kwanni. Rə bərsan warigʊ tə məssatən, tə bautən jiir a bwite rə fite na rə fitətta wei. Tə mara fite rə wʊnnan a furna jɨnnʊ a gwa Niyajiyʊwi. ¹⁷ Mənni bo wʊni ji bə tə nəngngai a mʊra yəmmi, kin swiyer ki, tə nəngnga warigʊ a mʊriya dʊn da Nigra Yesʊwʊn. Tə nəngnga wʊnnan a gwa Niyajiyʊ Tei, a gwa giyʊ. ¹⁸ Nyʊim, tə ne grate nəbbə barəm ba jɨnəm nyəng ka dautən gera a mʊra Nigrang. ¹⁹ Nəbbə barəm, tə yotən da nyʊim ba jɨnəm, kari tə nʊng kwewi hanjim. ²⁰ Bətəbi tə ne grate tebəbba jɨnnəm a mʊra wʊnə ji, bəra ki ka dəg Nigra nwi fʊri kwauwi. ²¹ Jɨn tebe, kari tə tʊngnga bətəm ba jɨnəm, kari ba chi rə tate. ²² Jɨn kewete, tə ne grate nəbbə gram ba jɨnnəm ba bwiyəm a mʊra wʊnə ji warigʊ, me rə chutang ka kəmtəng, nyəra bə dəg nəb a fʊr də kwauwʊnəm rə yəmbə nyam a fʊri. Nwi tata Nigrai. ²³ Wʊni ji bə tə nəngngai, tə nəngnga a mʊriya fʊri bəra Nigra me bəra rə nəb. ²⁴ Tə yəm to bətə yʊ jangəmiya jɨnnʊ rə fʊllai a gwa Nigrai. Bəraki Nigra Kristi gʊ tə ne grati. ²⁵ Bəra ki wa nəngnga bə nyagʊwi ba yʊ jangəmiya bʊnaiya nəngngatang nyagʊwi, mənni bo me fautangnga dʊr we.