¹ Bəgsərte, tə ne kewete jiya dautən wa jiyʊ, kətə yəm jɨn rə kəngniyəng katənə Bəgsər a ji. ² Tə jau kak rə kumni a mʊra nyini rʊwani. Tə chi rə bʊwatang a bwi a mʊrangi rə wʊnnan. ³ Tə rʊwanyini a gʊ kwani bəra nən nəng, na Niyajiyʊ a wʊmən fʊgang bərarə bwan, na sʊ yəm bə nyam ba kəllʊ kəllʊ bwi a Kristiyəm. Bərarə nyangngi n'gʊwe mən ka mʊra chenti. ⁴ Tə nəngnga nyini rʊwani na ba dəmən sʊtang nyagʊ, nyəngka dautən bən sʊwerəgəng. ⁵ Tə yo a mʊra bərsən bərarə bə ka tariyəm, tə nəngnga fini rə fʊlla. ⁶ Tə dʊ yəm ba jɨnəm wʊnə fʊlla a chi ba nəttəm. Masi a chi ji nwirə ləmmang a nwitangngi. Na ba tə yəm nyəng kə bətə jautən a wʊnə ni gərəng. ⁷ A jiya jɨni mən ka mʊriyʊ. Tikikʊs ba sʊgəmən, gən chiya yodai, wʊn bwira ngagəri. Gən chʊgo kewetiya miyʊ a mʊra Nigrai. ⁸ N'təm hangʊ a gwa jɨniyʊ bəra nyangnyəngke, na ba tə yəm yobi nən ka mʊriyʊ. Naba yɨggəmən kumni a furna jɨnnʊ. ⁹ N'təm hangʊ tən Onisimʊs. Chiya nənnʊ wʊn nga gəri na rə yotangnga daai, wʊ ka mʊra kwan na jɨniyʊwi. Ba sʊgəmən jiya nəngngaa bwi a gwi. ¹⁰ Chimiya chənti Aristarkʊs, kə səgənne na Markʊs chiya Barnabai (Wʊ a gwan giyʊ gʊ tə nya sərri, a be ki tə yʊ hangʊ) ¹¹ Na Yesʊ wʊn bərə mo Yuumstusi. Hangʊ gən kwan wʊn mwetən kwaliyʊ, chʊgo swiyeri ya miyʊ a mʊra dʊʊtətta Niyajiyʊwi. Ka yʊwoimən titangnga fʊriya gwa miyʊ. ¹² Abafaras kə səgənne, gə rə kang ka mʊriya kwan a kewetan Kristi Yesʊwi. Jʊtəkwang ki ka rʊwa gəmən nyiyi rə kumni na chi nəbba rii rə yəmtang a mʊriya kəmarang ka Niyajiyʊwʊng. ¹³ Bərarə ki kəmən nəbən yəmtang a jiya gi ka nəngnga swiyər rə kumni bəra nən jɨn, bərə bə ka Laudikiyam na bə ka Hirafolisyəm. ¹⁴ Luka yotən daai, wʊ tarə fʊllanni kə səgənni. ¹⁵ Tə sʊ chətəttə ka Laudikiyai, na Nimfa, na Ekklisiya ka mʊra kaitagʊwʊm. ¹⁶ Fʊlla n'ke wang kangke a jʊgər da jɨnɨn ni, bo ki n'ke amʊriya Ekklisiya ka Laudikiyai na bo tə yəm to kən ke wang kangke a jɨrewa Laudikiya. ¹⁷ Tə sotən a Arkibasi, ''Ti kəmmarəng kamʊng a swiyer də yʊ a mʊra Nigran, na rii.'' ¹⁸ Sʊrang kang ke nən me rə kang ka miyəng-Bulus. Tə kəmma rə chentta miyʊ. Masi nəttəttən dautən bə wi a chiya jɨni.