¹ A jiwu Bitrus na yohanna ka jiya yom yǝgira kanda nyiniruwaniyǝng a jii wurwini re koi. ² Ka gʊ ni wu bu jwaggiyu, ka dǝb rǝ jʊttǝkwang di gra nyiya fʊggong ka kanda ruwaniyiniyǝn dǝ bǝrǝ mo Nyagʊwʊn, na ba yǝra jǝni a nǝbbǝ dǝgira kanda ruwaniyiniyǝng. ³ A chu Bitrus na Yohanang dǝgira kanda ruwaninyiniyǝnǝng ka chǝl la chǝmmǝr a gwa hanjimiyǝng. ⁴ Bitrus na Yohanna ka kwitǝn kǝmta hanguwiyǝng, suwerǝ go "Jǝgabǝn" ⁵ Kə jwagihi a jǝga hanjimǝng lungrǝ go bǝgǝ nya guji a go hanjimi. ⁶ Mǝnni Bitrus go "Chǝmǝr na werdǝ kǝlbarǝn nǝn menǝn rǝ ge, mǝni ji kamǝn gǝri gu bǝn nǝnni. A mura dunda Yesu Kristiyǝn wa Nazaradi, yo yom." ⁷ Kǝn Bitrus a tau kangkǝ nyang ka gǝngngǝng ka gug a jiyǝng: rǝ kwa rǝ kwang kǝ naniyangu na chǝnta naniyanguwi ka nya kumni. ⁸ Jwaggi hi a tar bwiyǝng ka gun a sissiyǝng ka sʊ yoyomǝng, ka dǝgitǝn Bitrus na Yohanna a kanda ruwaninyiniyǝnǝng fiya tǝm, guno ra ji wer rǝ Niyajiyu. ⁹ Nǝb warigu ka chu hangu yo yom wer Niyajiyu. ¹⁰ Kǝ hanjim a jǝgga go ni hi gǝn jwaggi wu na nʊ yǝra chǝmǝr a nǝb a nyiya juwi Nyiya-nyiyaiyu a kanda nyini ruwaninyiniyǝn: Kǝ hanjim a nǝngnga mǝnnatang ka buniyǝng rǝ jǝna nǝngna bwiyu. ¹¹ Ka jiya tautang a Bitrus na Yohannang, kǝ nǝb warigu a mwarawe sǝgni a gwa hanjimi a gun bǝri mo chǝri a Solomoni, ri grajiya mǝnatang ka buntǝng. ¹² Bitrus a chu nyangngǝng ka jautǝna nǝbhǝm go "Jǝn nǝb ba Isra'ilam, wulai tǝ mǝna buntǝ gri? Bri wulai tǝ kwibǝmǝn kǝmtǝng? A mada nǝn nǝ dǝg hangu a yo yom ri kumni ta nǝnnu rǝ ji nya nǝnnuwʊng? ¹³ Niyajiyu wa Ibrahimi, na Ishakuwi, na wa te bǝbba nǝnnǝmi ka ne grate bwirangu Yesu gǝ tǝ koi tǝ mii a kagka Bilatus wuna fau go na gǝ jamǝn kangngi. ¹⁴ Tǝ ko ni yulgoi ri jǝn nyai, ngǝn kwani mǝni to dʊgʊmǝn wu nǝngngǝ jurangngi. ¹⁵ Kǝ tǝ ju wu nǝbbǝn yummi wu Niyajiyu a gug a mura suwi mǝni kǝnǝ chi nǝbbǝ churǝm ba yai jǝni nyaiyǝm. ¹⁶ Kʊ, a mura nǝbǝntang a yǝmbǝ nyam a gwa dundangǝni, wai nihi wutǝ chu na tǝ yǝmi-a mura dun dande a gwa nya kumni rǝgi. Yǝmbǝn nyam ba nǝbǝn na Yesuwum ka ne bwi lǝmangngi a kak ka jǝnǝng warigu. ¹⁷ Kʊ, chǝtte kǝn yǝm mo tǝ nǝngnga nyang a mura bunai ya yǝmtangngi nyǝnkǝ nǝbbǝ gram banjǝnǝm a nǝngnga grǝng. ¹⁸ Mǝni bo jǝni Niyajiyu a suwe wa nyina nǝbbǝ yuwe yǝmǝm, go, Kristiyangu ba no kʊnangngi, mǝni ka ri bwi ku. ¹⁹ Bǝra nyang tǝ bukang natǝ juwe na ba yǝnogǝmǝn jǝni bwirai yanjǝnu, bǝ rǝ fulla tumǝntangngi a gwa Te nǝnna jiyuwi ka lawe; ²⁰ na ba tǝmgǝmǝne Kristi, Yesu wun ti bǝra nǝn jǝnni. ²¹ Nǝ ngǝhai wa chi kwak korǝn ba yʊwi bǝra fulla wu bǝn kawe bwi rǝ jǝni wariguwi nyǝnkǝ Niyajiyu a suwei rǝ nyiyangu chǝrai a nyiya nǝbba yuwe yǝmǝm. ²² Musa suwe go 'Nigra Niyajiyu ba gʊggǝmǝn gʊ wu yuwe yǝm nyǝra nǝn mi a mura chǝtǝttan jǝnu. Mǝni bǝ ²³ tǝ kautǝn su a ji warigu ba sʊgumǝni. Ba yulo wunǝ ni wa kautǝn su a wai niwu yuwe yǝmǝm bǝn lʊktǝ hangu a mura nǝb bangǝm kǝrikwang.' ²⁴ Nǝn nyang, nǝbbǝ yuwe yǝmǝm a fulla Samuilai warigu na rǝ ba fung bukkan gǝmǝng ka suwe yǝm ba yai koti yaiyem. ²⁵ Jǝn tǝn yǝlǝmba nǝbbǝ yuwe yǝmǝm na riwa yǝm burǝm ba Niyajiyu a nǝngnga tǝn te bǝbbǝ bǝgram ba jǝnǝmǝm, nyǝngka sotǝn gra Ibrahimǝm, 'a mura sʊr da mʊn warigu, nǝb ba gʊsʊtǝm ba nya dǝgtang a kang.' ²⁶ A buk kǝ Niyajiyu a gug bwirangu na tǝme a jǝniyu na ba dǝgtǝn kang, na nya fʊlga juwi ya wuni ni a mura furni bwirai yan jǝnu.