¹ Fula wun Bitrus tǝ Yohanna sotǝn yǝma nǝbbi, nǝbbǝ tung jǝni a kak ka Niyajyuwung na nigra wa bǝ to kanda ruwaninyiniyǝn na ba Sadukiyawam, ka jǝrtǝnǝ wa hanjimi. ² Jǝnihi ka da bana hanjim deni bǝra ki Bitrus na Yohanna ka mǝsatǝna nǝb a jiya Yesuwi mǝni bo sotǝne guntang ka Yesuwung a mura ba bǝtǝro-bǝtǝroyǝm. ³ Ka tuwa hanjim a dǝga jarǝmǝng yǝgi rǝ tǝmsilanǝm, bǝra ki yu ka ma. ⁴ Mǝni nǝb mwam ba nui yǝmhǝmǝng ka nǝbǝn yǝmbǝ nyam, mwami a nǝbǝ barǝm ba yu yǝmba nyamǝm ka lau nete te nu. ⁵ Rǝ tǝm silanǝmǝng, nǝbba tau tǝmǝm ba jiyǝm, tabǝban jiyim tǝ nǝb mʊlarǝm ka kura bwi a Urshalima. ⁶ Hannaniya, nigra tung jǝni a chǝriya Niyajiyuwi ka gai, tǝ Kayafa tǝ Yohanna tǝ Iskandari, tǝn dʊgur tǝtta nigra nǝbbǝ tung jǝni a chǝriya Niyajiyuwi warigu. ⁷ A jiwun hanjim be nǝn Bitrus na Yohanna a jugʊr da jǝyǝng ka gʊl hanjim go, "Rǝ kumni ta wulaiyu na bo rǝ dunda wunǝn tǝn nǝngnga jǝni yaiye rǝgi? ⁸ Kǝn Bitrus a ri rǝ We Yulgoi ka jautǝn hanjimi go, "Jǝn nǝbbǝ gram ba tǝmǝm na tabe, ⁹ mǝni kʊ tǝn nǝngnga bǝmǝn tai gulirte bǝ ra ji nya wa nǝngnga bwiyu rǝ ni rǝ bwati yu - wulai a dǝg ki nihi a nya dǝndeniyǝng? ¹⁰ Masi jǝn nǝbba Isra'ilam tǝ yǝm jǝni warigu a mura dunda Yesu Kristi wa Nazaradi, wu tǝ yʊwa jiya riyangngi wu Niyajiyu a gugge wa bwiyati bǝra nǝn ge ni waiwe siya kak ka jǝnǝngngi a nya bwi lǝmangngiyu. ¹¹ Yesu Kristi gǝn werda jǝn bǝtǝ mura kantǝm tǝ dʊnglam, mǝni kǝn ti a yulo bara kǝngngi ya kani. ¹² Me yǝyarang we a gwa gu niyu, bǝra ki me dagi dun dǝn nǝbǝn a tǝm bǝ kunǝm, a mura nǝbbə bǝn dǝmǝn nya yǝyarang wi. ¹³ Hanjim a chu Bitrus na Yohanna ka sirǝ kumniyǝng ka yǝm go nǝbbǝ merǝ guji yǝm, mǝni bo mǝri yǝmtang, ka mǝnabʊntǝng, mǝni a kaba jǝgang ka yǝm go Bitrus tǝ Yohanna ka chi tǝn Yesu. ¹⁴ Bǝra ki ka chu ni wun kwara rǝ gri ka sissi tǝn hanjim, bǝra nyang bo meriji bana hanjim ba suwe a jiyu. ¹⁵ Mǝni a buk ka hanjim a jǝg nǝb tǝmrǝm go dʊgumǝn kʊlgǝnǝn da chimǝn, ka suga bwitanjiyu, ¹⁶ go, "Wulai ji bǝ nǝn nǝngnga tǝnna bam nǝb bambi?" bǝra ki grajiya jiya mǝnatangnga bunti a nǝngnga bwiyu nǝn kwetǝre mǝni bo wunǝ ni a chi a Urshalimai ka rǝ yǝmtang mǝni me nyǝnkǝ bǝ nǝn jau buri rǝ gǝng. ¹⁷ Mǝni bo nyǝnkǝ me nǝn fare no jǝni yaiye a jaukak a mura nǝbbǝng, masi tǝnǝn wʊtǝn su bǝri hanjim ba kabi a sotǝn yǝm a wunǝ ni, rǝ mǝsarang hǝng banigu a mura dundande." ¹⁸ Ka buwe Bitrus tǝ Yohannang ka ne sori go kari ba kabi ya suwe a mǝssatən a nəb a mura dunda Yesuwun. ¹⁹ Mǝni Bitrus na Yohanna ka jautǝn go "Ka dautuwe a kak ka Niyajiyuwung nǝn fʊng yǝmba jǝnǝn na nǝn kwila bǝgǝm ga, tǝ mwe duute. ²⁰ Me bǝ nǝn dǝmǝn nǝn dʊ sutang a jeni nǝn nwi na nǝn chuwi." ²¹ A bukkǝ hanjima kaba wutǝn suwung a Bitrus na Yohannai, kǝn jamǝn kangnga hanjima diyang. Bǝra ki a nyabe ji ba suwei kǝ ba dǝg ne bwiran gəri, bǝraki nǝb warigu kǝ wer Niyajiyu rǝ jiya nǝngna bwiyu. ²² Nihi waiwe nya jiya mǝnatangnga bwiyu wa kwaratang ka giyəng ka sumǝna jʊttǝ fʊr tǝ gwar. ²³ A buk ka jamǝn kangna Bitrus na Yohannang ka be nya nǝbba jiyǝm, ka sotǝn jeni warigu yǝ nǝbbǝ gram bǝ tung jǝni a chirǝya Niyajiyuwi a sotǝnni. ²⁴ Bana hanjim a nui nyangngǝng ka gug jǝrtǝtan jǝyu a fulla kwani a gwa Niyajiyu go, "Niyajiyu mʊn nǝngnga korǝn tǝn tǝmmi na wimang na ri jǝni ka muriyu warigu, ²⁵ mwe wu suwe yəm rə We Yulgoi a nyiya tenǝnnu Daudai bwiramu a suwego, 'Wulai ya dǝg nǝbba kumʊm a mugorǝng mǝnni bo nǝb mǝna bunte rǝ jǝni rǝ kʊni." ²⁶ Kǝn suwe mo dube ba gusʊtǝm ka murga dur da jiyǝn na rǝ nǝbbǝ gram ba tau tǝmǝm ka kurabwitan jiyu nǝngnga kak rǝ Te nǝnna a jiyu jiya Kristiyangu.' ²⁷ Nǝn nyang Hiridus na Bilatus Babunti warigu, a murga tǝn nǝbba yǝmbǝ Niyajiyuwum na nǝbba Isra'ilam, ka kura bwi ya gu kwani a dan bǝrde nǝngnga kak rǝ bwira mu yulgoi Yesu wun samǝn kwitǝn nungngi. ²⁸ Ka kurabwi a gu kwani go na tǝ nǝngngna jiwu kang ka mun a nǝngngai rǝ jiwu kǝma ba nǝngnga bwi a kaggi. ²⁹ Ku, Te nǝnna jiyu, jǝga soriyanjiyu, nanne bwiranǝm ba mum kumni tǝ ba su yǝmba mum dur a siyǝm. ³⁰ A fulla mǝn yak kangka mʊng bǝra kwaratangnga ki, jǝniya mǝnatangnga bunti a nǝngnga bwi bǝra rǝ dunda bwiramu wu yulgoi Yesu." ³¹ A buk ka mwarmǝn nyiniruwaniyǝng, gʊn hanjim a krwabi wi ka mǝga bwi, ka rii rǝ We Yugoi. Ka su yǝmba Niyajiyumǝng dur a sim. ³² Mǝni grajiya kʊlǝn da nǝbbǝn yǝmbanyamǝm ka murga furniya jiyu. Merǝ wa si dǝl rǝ jǝna guwi, mǝni wunǝ jiyan jiyu ka chi wu kwani. ³³ Rǝ grajiya kumniyu nǝb tǝmrǝm ka suwe ji ya nǝngnga bwi nǝn jiyu a guntang ka Te nǝnna jiyu Yesuwung, kǝ grajiya nǝtǝtta dautǝnbǝwi a chiya jiya hanjiyǝmi wariguwung. ³⁴ Merǝ gu wajiyu a buna gujiyu, bǝrǝki bǝ rǝ tartǝm na kainiyǝm ka miro ka be rǝ chǝmǝr da mii jǝni grǝn, ³⁵ ka be rǝ chǝmǝrhǝn a kak ka bwiranǝmǝng, kǝn wutugotǝn chǝmǝr a wunǝ niyǝng nyǝnkǝ wuna fau rǝ gǝng. ³⁶ Yesufu yǝlan Lewiwu, niya Kuburusi, wu bwiranǝm a ne dun go Barnabasi (ngǝ gǝ sǝng furiyu) ³⁷ Ka rǝ tariyangu wa miyu na be rǝ chǝmǝr a kak ka bwiranǝmǝng.