¹ A jiwu ko Fentikosi ya beng, hanjim warigu ka gu kwani. ² Rǝ kwan rǝ kwang guji ka bau jir a ji nyǝra gǝnda sǝmban, ka suwe a ri kaitǝ hanjima chirowi warigu. ³ Kǝ tagi langte nyǝra kǝrang a jǝrtǝne wa hanjimiyǝng a wutugo wutugoi bwi, ka chiya warigǝmba jiyǝmmǝng. ⁴ Ka rii rǝ We Yʊlgoi warigǝmba jiyǝm su rǝ tagi langte dǝndang, nyǝnkǝ We ne hanjim ba su rǝgǝng. ⁵ A wai fulla, karǝ Yahudawa tǝ rǝ chim a Urisaliman, nǝbbǝ lǝma Niyajiyuwum, a gani dǝndang a sʊtǝtta jiyu. ⁶ A nui dan jir dǝn, nǝb mwam ka kurwabwi a gu kwani rǝ yǝllang ka bwiyǝng bǝ rǝ ki wuna jiyu ka nui hanjim surǝ yǝm rǝ langngǝr dangngǝn. ⁷ Hanjim ka nǝngnga mǝnatangnga buni rǝ kwani; ka suwe go, "Bǝn jum, nǝbbambe surǝ yǝmǝmbe, me nǝbba Galiliyǝm ga?" ⁸ A nǝngnga go nyǝnǝ ki warigǝm ba jiyǝm su yǝm rǝ langngǝr dǝn bǝbbǝn rǝ gǝnǝng? ⁹ Fisiyawa tǝn Mediyawa, na Elimawa, na Yahudawa tǝn Kafadokiya, a mura Funtus na Asia, ¹⁰ A mura Firgiya tǝn Bamfiliya, a mura Masar na tǝmba Libiyam a kulo Suriyu, na fʊbǝbba jǝre wa Roman, ¹¹ Yahudawa ba kangngəm na kətətawa Larabawa, warigu kǝnǝn nwirǝ su wer langngər da nǝnnǝn a jiya swiyetǝttǝ kuntai ta Niyajiyuwi." ¹² Waringəm ba jiyəm ka mǝna bunte; sugarǝ go, "Jini yaiye bǝ nʊngbǝn wulai?" ¹³ Mǝni bagi ka nʊ nʊr go, "Hiya inabiyu a ju hanjim." ¹⁴ Kǝn Bitrus a gun tǝ bǝ kwau a jir kwanǝn bǝng, ka gug jiira sotǝn go "Nǝbba Yahudam bǝ ka tǝ chiya Urisalimam, tǝ yǝm jǝni yaiye, tǝ kautǝn suwa yǝmba miyǝm. ¹⁵ Bǝrǝki nǝbbambe a nobǝ guji a juwi nyǝnkǝ tǝ kǝmma rǝgǝng, bǝ rǝ ki kʊ nyǝngke jii wurwin rǝ moriyu bwigi. ¹⁶ Mǝni ji waiwe gʊn suwe wa nyiya ni yuweri Yoweli: ¹⁷ Niyajiyu go "Ba nǝngna bwi nyang a jitang ta kotǝng, bǝn sǝgtǝne We miyu wa nǝb warigu, yǝlǝm ban jinǝm tǝn yubǝ ban jinǝm ba sʊ yǝm yuwerǝm, bǝri, bo bǝtǝm barǝm ba jǝnǝm ba chu wuloni, bo tabǝbban jǝnǝm ba da dugamni. ¹⁸ A nyang bo bwiranǝm ba miyǝm tǝn bwiranǝm ba miyǝm bǝ chuwum a yai kote bǝn sǝgtǝnne We miyu, ba su yǝm yuwerǝm. ¹⁹ Bǝn nungǝn jiya mǝnatangnga buniyu a ji na bo jiya jǝrgo kini a gusʊti, dʊgum tǝn kǝrang na yon. ²⁰ Ko ba fulga a nǝngnga yʊlu ki swang ka yʊlo dʊgum, kamǝna du ko kunta Te nǝnna jiyuwi a be. ²¹ Mǝni ba yʊlo warigu wu bǝrrǝ dunda Te nǝnna jiyuwi ba nya jǝgtang.' ²² Nǝbba Isra'ilam, tǝ kautǝn su a yǝmbambe. Yesuwa Nazaradi, wu Niyajiyu a dǝg a chi bwi a gwan jǝniyu a nǝngngatang a jǝna menatangng a buniyu rǝ nungtang, kǝ Niyajiyu wa gwangiyu a jʊgʊr da jǝnnǝn, nyǝra kǝtǝ yǝm rǝga bwita junuwʊng. ²³ Bǝra rǝ kuratangka bwiyǝng kǝ nyang rǝ yǝmtang ka Niyajiyuwʊng, kǝn nǝbbǝn hangu, jǝn bo a kangka nǝbba gug durǝm, kǝttǝ ju a riyangu yuwarang. ²⁴ Mǝnni Niyajiyu ka gug hangu a bukka dǝmmǝn kwewi ya bwiyatiyǝng, bǝrǝki meba nǝngnga bwi a tau. ²⁵ Bǝraki Dauda a suwe wa gi a ji, 'Ka mǝn churǝ Te nǝnna jiyu jutǝ kwang a kak ka miyǝng, bǝrǝ ki ka kǝng nga kangkǝ nyang ka miyǝng kari bǝn nui tate. ²⁶ Bǝra rǝ nyang furi ya miyu nǝn kwau langngǝr da miyǝn mǝksare. Bo, bwiya miyu ba chi dur a sissi. ²⁷ Bǝrǝ ki mebǝn mai yumba miyǝm a gwa kʊnangngi, nyàngbo me bǝn dʊ We Yʊlgoi ya mu a fi. ²⁸ Kǝn nʊngngi jʊwi ya yummi, kakka mung ba dǝgi rii rǝ furdǝ kwauwun. ²⁹ Chǝtǝttamiyu, bən su yǝm durasim a jiyan Tah Daudai. Ka bwiya kǝn dǝg, mǝnnǝ suwangu ka nǝnni berǝ tǝn ku. ³⁰ Bǝrǝ rǝ nyang, hangu ni yuwe yǝmmi mǝni ka yǝm Niyajiyu ka tǝgktǝn yem rǝ bautangnga bunni go a mura duk kangngǝng bǝn nyab gʊ a jiya kʊlgǝnǝn dangǝnǝn. ³¹ Ka chuwe jǝni yaiye bo ka suwe yǝm a jiya guntang ka Kristiyǝng, n’dubǝn hangu a gwa kunangngi, bo bwiyangu a fi be. ³² Yesu waiwe, Niyajiyu ka gug wu waringəm ba nǝnnəm kǝtǝnnǝn bʊ bugi. ³³ Bǝrarǝ nyang nyǝngke gug rǝ ge yǝgira kangkǝ nyang ka Niyajiyuwung na ka yu tǝggotang ka yǝmməng ka We Yulgoiyǝng a gwa Tei, hangu ga kwi bǝmmǝne jǝwe tǝ churǝ na tǝ nwiri. ³⁴ Dauda a gwi ba ji mǝnni ka suwe go "Te nǝnna jiyu ka sotǝnna Taiya jiyu go, "Chi a kang kǝ nyang ka miyǝng, ³⁵ yǝgira fulla bǝn dǝg nǝbba kangngǝm ba mum a yullʊ gʊ bǝn fiya nani wi" ³⁶ Bǝrarǝ nyang masi kaita Isr'ilai a nya yǝmtang go Yesu waiwe tǝ yʊwa a riyangngi, Niyajiyu ka dǝg a chi Te nǝnna jǝyu tǝn Kristi. ³⁷ Hanjima nui nyangngǝng ka kur a furna jiyu, ka sotǝna Bitrusi tǝn bagi bwiranǝm, "Chǝtte wulai bǝnǝn nǝngngai?" ³⁸ Kǝn Bitrus a sotǝn go, "Tǝ bukang na wuna jǝnu nǝngnga tǝn batisma a mura dunda Yesu Kristiyǝn bǝri yʊnotangnga jǝni bwiraiyan junu, bo bǝ tǝ nya We Yulgoi. ³⁹ Bǝra rǝ butangnga yǝmhǝm wa jiya jǝni tǝn bǝtǝbban jǝnnǝm na bǝ perem warigu, rǝ mwami a bǝ Te nǝnna jiyu Niyajiyu ba buwum. ⁴⁰ Rǝ tagi bwantǝ mwam, a yǝgtən kumni, ka chəlla hanjim go, "Tǝ yǝya dutǝtta jinu a mura ban dam bǝ bwiram be." ⁴¹ Kǝn hanjim a yʊ yǝmba gǝm kən nǝngngatǝn batismang, a wai kowe kǝn nya yǝgtang a bwi rǝ nǝb nyəra nǝtǝttǝ bwanbi. ⁴² Kǝ hanjim a jaukag rǝ mǝssarang ka nǝb tǝmrǝmmǝng rǝ kurgarang, a mura kǝratangnga wmantǝttǝ fʊm-fʊmmi rǝ ruwatang a nyini. ⁴³ Tatǝ ka tau nǝb warigu, bo kǝn nǝngnga jǝnna mǝnnatang a buniyu rǝ nungtang a ji ba nǝngnga bwiyu mwam a gwa nǝb tǝmrǝmmi. ⁴⁴ nǝbba nǝbǝn yǝmbǝ nyamǝm warigu ka gu kwani mǝ dǝndangngni we a mura jǝnan jiyu, ⁴⁵ ka miro jǝnna jiyu wariguwung, ka wututgotǝna bwita jiyu nyǝnkǝ wunə farǝgǝng. ⁴⁶ A kotǝ warigu ka jarǝkak rǝ kǝmarang ka jiyǝng kin a mura gʊn ruwa nyiniwi, kǝrra mwantǝttǝ fum fummi a kaini, mǝnni wutugo jǝni jauriya bwitan jiyu a mura furdǝ kwauwun rǝ sǝgtang a furi. ⁴⁷ Hanjim ka wer Niyajiyu, bo hanjim karǝ yutangnga gwa nǝbbi warigu. Te nǝnna jiyu bo yǝgtǝnǝ bǝ nyarǝ yiyatangǝm juttǝkwang.