¹ Agaribas Ka sotǝn na Bulus go "bǝn dǝmǝn jǝg dur da mǝn." Bulus ka gʊg kangnga ka su jǝg dudda gǝnnǝng. ² Kǝn nǝngnga fur dǝ kwawǝn mwe Nidu Agaribas, a jiya yəm bǝ Yahudawa be gra dura me kuwum. ³ Ji kunta bo bǝraki mǝn niya yəm sori ya Yahudawai rǝ yobiyan jiyu. Bǝri nyang, kǝmǝn chəllan ne mida nan nwi. ⁴ Nyang Yahudawa warigu ka yəm nyǝngkǝn gra gərǝng gra bweltǝta miyu a tǝm ba miyim na Urshalima. ⁵ Kǝn yəm rǝ jigu, ka dautǝn a nga go kǝn chi rǝ kumni a fungtang ka nǝnǝngngǝng. ⁶ Ku n’siya gwe mona nǝngngai mǝn duute, bǝrǝrǝ yǝmburǝm bǝ Niyajiyu a nǝngnga tǝna tǝbǝba nǝnnǝm. ⁷ Bǝrǝrǝ waiwe gǝ yimburǝm bǝ sʊr da nǝnnǝn da kwu ajǝr bǝ suwǝn dǝ ka dǝga furi tǝyu, a jiw ǝn hanjiyim nǝngnga swiyer da nyan agwa Niyajiyu kum rǝ ko. Bǝri kang tilangnga furi, Nidu Agaribas, Yahudawa bǝ sǝnnai gri. ⁸ Wulai a maki gu ba kǝmma go jiya mǝnatang a buniyu suwe mo Niyajiywu ba gʊg nǝbba bǝttǝromi? ⁹ Chire kǝn kǝmma kǝn wǝngnga kak rǝ dunda Yesu Banasiret. ¹⁰ Kǝn nǝngnga jini yaiye a Urushalima. Kǝn mǝra nǝbbǝ fungrǝm mwam a jarǝm, bǝri kumni tǝn nyai a gwa nǝbbǝ gram ba nǝbbǝ tung jina a kak ka Niyajiyuwum, mǝn ka juwiyǝng kǝn bʊbuge. ¹¹ Kǝn ne kunnang deni a mura kan tǝta ruwa nyiniwi warigu kǝn dǝgre kǝn dǝg mo bumǝn Niyajiyu. Kǝnnǝngnga kak rǝ kumni nǝnji kǝn nǝ kunnang yigia tagi bǝttǝ tǝ tǝm dangdangni. ¹² Mǝn ka mǝn nangnga nyangngǝng, kǝn diya Dimaskus rǝ kumni ta nǝbbǝ gram ba nǝbbǝ tung jini a kak na Niyajiyuwum. ¹³ Mǝn ka mǝn yigirǝng, rǝ jʊggʊr da kon, Nidu, kən chu kweterai a ji wa li ko rǝ kwetǝraiyu ka yin bǝmǝn na bǝ nǝn yigi kinnǝn. ¹⁴ Nǝn yǝra tǝm wariguwǝng, kǝn nwi dagi jir swimǝn yim rǝ langngǝr da Ibraniyawan suwerǝ go, Shawulu wulai a ma kǝmǝn ni kunangngǝng? Ba bwai gwi ya ji bǝlgǝi. ¹⁵ Kǝn suwe mo, mǝmǝn wʊne Nigra? Kǝ Nigra nga go Nǝn me Yesu wʊmǝn ne kʊnangngi. ¹⁶ Ku gun sǝssi bǝraki gǝn jiya nǝngngai kǝn jirnǝnnǝ rǝgi na ba tiyǝn yu bwira miyu na bʊ bukka miyǝng a mura jɨni yǝmma durda miyǝn kuwi na rǝ yǝbǝn sunǝn a jiyu. ¹⁷ Bǝn jǝggǝn a kangnga nǝb ba yəmbǝ yəmiyəm na bǝ bǝn tǝmǝn a jiyǝm. ¹⁸ Bǝn wʊmtǝn kǝmte na wulgawe a mura kumni ta Chetanni yigira kwetǝre Niyajiyuwi, na nya yǝnnotang ka jɨni bwirai na kula wʊ bǝn ne bǝn samǝn bǝri netangnga furi yəmbǝ nyam bǝ kagǝra miyim. ¹⁹ Bǝrǝrǝ nyang, nidu Agaribas, nǝngnga be dur də nǝggǝnǝn rǝ durǝng kǝn chuwa jiyǝng. ²⁰ Mǝni rǝ jigu a bǝ ka Dimaskusǝm ki bo Urshalima na tǝm ba Yahudiyam, na ba nwibǝm warigu, kǝn wau yəmbǝ ləmmangngǝm a bukən kauwe bwi a gwa Niyajiyuwi, na nǝngnga swiyer da dautǝna butangnga kangngǝnəng. ²¹ Bǝrarǝ wai jiwe gǝ Yahudawa tai rǝgi a mura kandǝn ruwanyiniwun kǝ farǝ go tǝ ji. ²² Niyajiyu ka tugai bǝra ku kǝn nya n’dǝmǝn, siya kakka nǝbbǝ kǝttǝlǝm tǝn bə gram, na bʊ buka nǝb yumerǝm na Musa suwe go ba nǝngnga bwiyu. ²³ Nǝn nyang Ni jǝgri a no kunnang na ba a chi wurǝ jigu bǝn gʊgga bwiyati na bo a wau yəm bǝ kwetǝrem yigira nǝbba Yahudawam ba nwibǝ yəmhǝmǝm. ²⁴ Bulus a mwarmǝn jǝgtang a durǝng, Festasi ka su yəm rǝ gǝnda jirǝn, Bulus jina tallǝn ga, kumonng yəmtang kǝ mwammǝng ka dʊggǝn na jini talni ga! ²⁵ Kǝn Bulus a suwe go "jini a tallibe nigra Festus, mǝnni rǝ kumni ta furiyu mǝn su bwantǝtǝ nyai rǝ tautang a bwi. ²⁶ Bǝraki nidu ka yəm jɨni yaiye warigu, bǝngǝ mǝn surǝ yəm dur a sǝssi, bǝraki kǝn nga mo merə jiya kulumən bwi a ngi, bǝri kǝn nǝngnga be jɨni yaiye a kulu kulu bwi. ²⁷ Kǝn nga rǝ nǝb yuwerǝm ga, nidu Agaribas? Kǝn yəm mo kǝn nga rǝge." ²⁸ Agaribas ka sotǝnna Bulusi go a jii bani kǝmmǝn farə mo wʊlgai yullo ni fʊng Kristiyu? ²⁹ Bulus ka suwe go kǝmmǝn chəlla Niyajiyu, na yǝgimǝn kǝnna nu jii mwam mi ki, me mǝn kwan, na bǝ nwiyirǝ kuwʊm, a chi nyǝra nǝn me mǝnni mǝrǝ chǝnte." ³⁰ Kǝn nidu a guna sessi tǝn nigra na Barniki na bǝ ka chiro kinnǝm warigu. ³¹ A du kan dǝ kurgawǝnnǝng, ka jau kak rǝ yəmni sugǝrǝ go ni waiwe a nǝngnga be jiya lau bwiyati tǝn buwatangngi". ³² Kǝn Agaribas a sotǝnna Festusi go ni we na dǝbbǝ wuri yigira Kaisariki na bǝn jamǝn kang".