¹ Festas a dǝggi a kǝng ka tǝmmǝng a buk ka kotəttə bwanbiying. Ka gun a Kaisariya a diya Urshalima. ² Ki nigra nǝbbǝ tung jin a kakka Niyajiyuwung, na nǝbbǝ gram ba Yahudawam a betǝn rə yəmni rǝ kunni a Festasi a dur da Bulusin. ³ Ka chilla sǝrǝng a go Festasi go d nǝn Bulus a Urushalima na tǝ juwa juwi. ⁴ Kǝn Festas a ngatǝna hanjimi go Bulus bwe chǝnti a Kaisariya mǝnni merǝ lantang mə rǝ bwimi bǝn kaubwi a gai. ⁵ Bǝrǝ nyang wa yim ba dǝmǝng na funngyiye a funngiyǝ na ni hi kari bwirang ki kǝntǝ suwe" ⁶ Bukka kote naruwʊng yigǝra kwawʊng ka diya Kaisariyang. Tǝmma silang ka chi a dǝntǝlǝng da duutǝnnǝng ka buwe go be gǝmnǝ nǝn Bulus a kak ka dʊʊtǝng. ⁷ Bulus a lauwe Yahudiwa di yawa Urushalima ka si rǝ do. Ka su bǝrǝ nyate tǝ bwirai a Bulusi, mǝnni nya be yim bǝ nyam. ⁸ Kǝn Bulus a jǝg dur da gǝnǝng nǝngngatǝn bǝ bwiran a ni a Yahuawai, a gwan ruwanyiniwi na Kaisarri. ⁹ Mǝnni Festas farǝ dǝgǝmən bǝ kwauwʊm a Yahudawang ka nǝnngatǝn gulǝn a Bulusi go "Kǝmǝn fari mo diya Urushalima na nganǝn dute a jiga jini yaiye ga". ¹⁰ Bulus a nga go siya kanda dute Kaisarri, a chi bwi nǝngngaimǝn dute a gaiwe", nǝngngatǝn be bwiran a Yahudawa nyəngkǝn yəm gǝrǝ nyaguwʊng. ¹¹ Ki bǝ nyam kǝn nǝnnga bwirang da dautǝn a bwiyatǝn ki kwʊlabe bwiya. Mǝnni yim ba jiyǝm nyate ki kari guni ba mitǝn me ji. Ki mǝn dǝbmǝn dʊʊte miyu yigǝrang Kaisarrǝ". ¹² Buk kǝn Festas a su ga yǝmmi tǝn dǝntǝlǝngnǝng, ka nga go "Bu Kaisar, bǝn diya gwan Kaisarrǝ". ¹³ A buk ka yagi kotǝng, Nidu Agaribas na Barniki ka be surang a gwa Festusi a Kaisariya. ¹⁴ Ka gai kotǝ mwam kǝn Festas a sotǝn yəm ba Bulusəm bwe chǝnti wu Filikus a duwa jarəmmi. ¹⁵ A jii mǝn ka Urshalimai, nigra nǝbbǝ tung jɨni a chəriya Niyajiyuwi a be rǝ wuri a gwa miyu chəllaire go ju. ¹⁶ Kǝn sotǝn mo me sori ya Romawai, ne ni nətte ni mwautǝn wuriyu na ba jǝg dur da gǝn. Na su yəm a ji a wuri mwautǝnni. ¹⁷ Bǝrarǝ nyang ba hanjim ka kurabwi wariguwʊng, Luktǝbǝ jii tǝmma silang na chiya dǝntǝlǝn da dʊʊtenəng kǝn tǝm mo bi mǝnnǝ nihi. ¹⁸ Nǝbba mwautǝn wuri a suwe yəm ba jiyǝmmǝng, kǝn jǝgga mo wuri hi me yəmbǝ nyam a mori. ¹⁹ Kǝn jǝgga mo burǝ a jugər da jiyən, wa fungkwor da jiyən a du guni ya bwiya mo Yesuwi. Mǝnni Bulus go ka rǝ yuummi. ²⁰ Kǝn buna ngingkǝn bǝn jǝgga yəmhǝm grǝrǝng, ki mo bǝn chiya Urshalima na nəngnga nǝn duttta gai bǝ rǝ jɨni yaiye ga? ²¹ Kǝn Bulus a chəlla go di nǝngnga gəmən a gwan Kaisari na nəngnga gəmmǝn duta gai yigǝra jii bǝn tǝm a gwan Kaisarri." ²² Agariba a sotǝn na Festasi "Bǝn fau mo bǝn nwi yim ba ni waiwʊng rǝ kinǝng" Festas go bǝn nwi hangu rǝ sila. ²³ Tǝmma silang kǝn Agaribas na Barniki a be rǝ nǝb mwam ka dǝgga kan dǝn kurgabwi tǝn nǝbbǝ gram ba nǝbbǝ barǝ kǝrammǝm na nǝbbǝ gram ba tǝmmǝm, Festas a nǝbbǝn sǝr go dǝggi ye nǝn Bulusing a gwan jiyu. ²⁴ Kǝn Festas go nidu Agaribas na jǝn warigu bǝtǝ ka gum kǝttǝ chu niwʊng ga suga yǝm kiying a Urshalima na gaiwe. Mwuwaimǝn wurte go a dautǝn be durǝ yuum? ²⁵ Kǝn jǝgga mo nya bə jiya dautǝnna bwiyati, mǝnni nak dǝbmǝn dʊʊta gun go di gra Kaisareng, kǝn mwe yǝm burǝm mo di grǝ rǝ. ²⁶ Mǝnni me mǝnnə bagi yǝm bǝ bǝn mulatǝnna Kaisariyǝm. Bǝrarǝ nyang kǝn be gǝra kak ka jɨneng me nyǝra nǝn mwe nidu Agaribas. Na nya ji bǝn yɨgtǝna ji bǝn mula a dur da gǝnni. ²⁷ Bǝraki ba chimǝn mote tǝm bwe chǝnte mulatǝn bə bwiran da gǝn".