¹ A fula wu Apolos ka Korintusiyi, Bulus ka tuwe wa murta həllai a be Afisa, ka nya bagi məssarba gai. ² Bulus a sotənna hanjimi go, "Kətə yu We-Yulgoi a ji wu tə nəbən yəmbə nyami ga?" Hanjim ka sotən go, "O' o, nən nwi mən bə guji a jiya We Yulgoi." ³ Bulus a suwe go, "Nəngnga gəmən batisma a mura wulai?" Hanjim a suwe go. "A batisma Yohanai." ⁴ Kən Bulus a ngatən go, "Yohana a nəngnga batisma butangnga kangngi. Hangu a sotənna nəb go nəbbən yəm bə nyam a wu ba be buk kang gənəngi, bə suwe Yesu." ⁵ A ji wu nəb həm a nwiyəng, kən nəngngatən batisma a mura dun da Nigra Yesuwun." ⁶ A fulla Bulus a titən kang a hanjimiyəng, kə We-Yulgoi a sigtənnə bwiyəng hanjim ka su yəm a langtə dangdang, surə yəm ba nəb yuwerəməm. ⁷ Hanjim ka lau nəb kwau a jir bəsu. ⁸ Bulus ka dəga gun ruwa nyiniwi məsatənna nəb dur a sissi swangər tə bwanbi, jəgatən yəm na bo wu furna nəbbi a jiya duutətta Niyajiyuwi. ⁹ Mənni a jiwu furna bagi Yahudawa a nəngnga kəngkang, a fungbə sori, ka su su yəmbə bwiram a ji a Juwi hi a kagka kulən. Bərarə nyang Bulus ka wumən bwi a hanjimi a di tən ba nəbbən yəmbə nyaməm, ka su nəngngatən məsarang a kur da Tiranusən. ¹⁰ Ka jaukag rə nyang nyəngke a mura jitə təssu yigira jiwʊ nəbba Asiyam a nwi yəmba Nigrami, nəbba Yahudam, na rə ba Helinam. ¹¹ Niyajiyu ka nəngnga jəna mənatangnga buniyu mwam a kangkan Bulusəng, ¹² Bərarə nyang gusər məbra bwiya hanguwun na ditən gəra nəbba bwara-bwarayim ka nya bwitə ləmangyi, weni bwirai ka jiroməna hanjimi. ¹³ Mənni karə nəbbə barə təməm ba Yahudawa ba tuwe wa gaiyəm. Hanjim bə nəngnga fini rə dunda Yesʊwʊn go na tə nya kumni a jiya weni bwirai, nyəngkə hanjim ba suwe go, "Mura dunda Yesuwun də Bulus surə yəmba gəməm, nən sugəmən no, tə jir." ¹⁴ Nigra wu tung jəni ya chəriya Niyajiyuwi bərə mo Siva karə bweləm nyibi, ji nəngnga dan swiyer de. ¹⁵ Kə we-bwirai hi a ngatənna hanjimi, "Kən yəm Yesu, kən yəm Bulus, mənni jən tənən ba wune?" ¹⁶ Kə we bwirahi a guntən na hanjimi a li kumnitan jiyu ka bugtəng. Go nyəng ka mwara jiro mənne wa kaihi rə səngngi bwitərə kun rə dete. ¹⁷ Ji wai we ka dəga suna Yahudawai tən Helinawa bə karə chim a Afisam. Tatə ka ma hanjim, dunda Nigra Yesuwun ka nya grate. ¹⁸ Nəbbə fungrəm mwam ka be suwerə nga rə jəni bwirai ya nəngngai. ¹⁹ Nəbbə barə təməm ka birawʊrə wannan jiyu a tung a kəmta nəbbi. A fulla bəngo nyaguwiyanguwung, ka lau kwiyəlgai nete furtənu. ²⁰ Kə yəmba Nigram a jau kag rə kumniyəng a jutə mwam. ²¹ Bulus a mwarmən yəm a wautang a Afisang, ka kəma mura We go gə diya Makidoniya tən Akaya a juwiya Urshalimai; kə go "A bukkən yiga gaiyəng, a chin kwag in yiga Roma." ²² Bulus ka təm nəb tugarəm ban gəm bisu, Timoti tən Irastus yigira Makidoniya, ba nəngngatən tugarangəm. Hangu rə bwigo ka chi ya Asiya a fulla bani. ²³ A fulahi kən nya gugtang a furni rə kwani a Afisa bərarə wai Juwi we. ²⁴ Guni sum kori wu bəra mo Damaturusi, wu sumo jibana kweyilgai yan Dayanai, wu betənə duwong a nəbbə sumo korəm. ²⁵ Ka kura nəbbə sumo korəm ka suwe go, "Nəbbə gram, kətə yəm to a swiyer dande tənən chəmmər mwam. ²⁶ Kətə chu na tə nwi mo, a tək ba Afisa gən kwan, mənni yəgira təmba Asiyam warigu, Bulus waiwe ka wulga furna nəbbi mwam. Hangu kə suwerə go me niyajiyuwun yin nəngnga rə kani yu we. ²⁷ Men swiyer da nənən gən kwan ba no kunang, mənni rə kaitətta chəriya niyajiwu wa nənnu Dayana grai ba chi merə fini. A nyangngi ba buna gratəttangu, ge tən təmba Asiyam bə gussətə warigu ruwatən nyiniwum." ²⁸ Hanjim a nwi nyengəng, furni ka guno rə kwani, ka nəngnga buwon rə kumni suwerə go, "Diyana Afisai wurə grati." ²⁹ Bɨrhən warigu ka məga bwi, nəb ka kwi səngni warigu yigira kanda kurgarangən. Hanjim ka tuwa kagəm ba yoməm ba Bulusim; Gayus tən Aristakus ba birawa Makidoniyam. ³⁰ Bulus ka fau dəgitang a kulənhən kə məssarbe ka dang rəgəng. ³¹ Bagi kagəm ba Bulusəm bən nəbbə gram bə ka Asiyam, ka təmtən chilan rə kumni go karə hangu ba dəgiya kanda kurgaranhəng. ³² Bagi nəb surə bəgim yəm, bagi surə dəgin dang, bərəki kulən ka lungo bwite. Mwaman jiyu a yəmbə jiya be rə kurgarang kangngi. ³³ Dəgai kulən ka sotən yəm Iskandari, wu Yahudawa nyəngra kagi, kən Iskandriya gug kanangu a jiyəng go na gə sotən yəmma nəb. ³⁴ Hanjim a yəm go hangu ni ya Yahudayəng, ka gun rə wurte dəb fulla koi təsuwi, "Wu rə grati, Artimis wa Afisai." ³⁵ Kə ni mulara bɨrhəni a no wʊ dutətta nəbbəyəng go, "Jin nəb ba Afisam, wunə ga yəmbə bɨr da Afisan gə gu chəriya kojiyu Dayana grati wu bwiyangu wun səssuliyu a yarewa jiwu? ³⁶ Chu rə yai jəni men jiya buriyuwung, ka nəngnga nyagu tə marasi bəra ki bətə nəngnga guji kursə-kurse. ³⁷ Bəraki, tə berə nəb bambe a kanda dʊtən me mo kubəba kanda weniyəng, me bo mo kəba kojiya nənnuwun. ³⁸ Bərarə nyang, a chi Damatriyas tən kagəm ba swiyerəm karə wuri a jiya nəb bambə ki, kantəta duti wumən wu bwi, nəb bə nəngnga dutəm kawe. Masi hanjim a mautən wurte a duttətan jiyu. ³⁹ Mənni karə bagi yəm bəbən jəgam ki, bənən yəngna a chimba nənnəm bən chirə juttəkwangəm. ⁴⁰ Bəraki bənən nuwa kunang ka kəbarəng bəra ləngə-ləngi nən ka muriyu.Me rə ji ba dəg ki nən nəngnga nyang nyəngki, bəraki me dəmən nən su guji a ji." ⁴¹ A suwe nyangəng, ka yo kurgəranghəng.