¹ A bukkə nyangəng Bulus ka du Atina a yigi a Korinti. ² A gai ka nya gu ni ya Yahudawai wʊ dunangən mo Akilai, ni ya Buntusi, wa diye bərə lantang a Italiya tən nyiyangu bərə mo Balkisuwi, bəra ki Kalaudiyas go wunə ni ya Yahudiyai a jir məna Italiya. Kə Bulus a be gwa hanjimiyəng, ³ bərakə hangu a chi nəngnga swiyer də kwanən, bəra ki swiyerda jiyən də kwanən. Nəb bə nəngnga kunggaiyəm. ⁴ Bǝrə nyang Bulus ka jigga yəmni tən nəb a kanda ruwani nyiniyəng a wunǝ ko gəriya Yahudawai. Wu furna Yahudawai tən Helinawa. ⁵ Mənni a fulla Silas tən Timoti diye wa Makidoniyang, We ka dəg Bulus kwag go a diya gwa Yahudawai na wautən yəmba Yesuwum na sotǝn go gǝnǝng Kristi. ⁶ A jiwu Yahudawa nəngnga kag na kəbba hanguwung, kən Bulus a bamən duk kang gǝng a hanjimi go, "Dugum ban jəni a ciya dutəttan jənu; me mənnə bwiran. Mən diya gwa nəb bə me Yahudawam." ⁷ A du gaiyəng ka diya kaitan Titus Yustusi, ni ne gratə Niyajiyuwi. Kaitangu wu rə do tən gwa ruwani nyiniyu. ⁸ Kiristus, nigra kanda ruwani nyiniyu təm ba kaitanguwum warigu ka nəbən yəmbə nyam a Nigrai, mwama nəb ba Korintiyawam ka nəbən yəmbə nyam kə nəngngatən batismang. ⁹ Kə Nigra sotənna Bulusi rə kum a churang go, "Karən nwi tate, mənni su yəm karən bən masi. ¹⁰ Bəra ki me nən ka kin, merə ni wu ba nəngnga nən kiyari, bəra ki mən kamənə nəb mwam a bɨr dande." ¹¹ Bulus ka chiya gai jir din rə swangər tə nukkunən, məssatən bwantətta Niyajiyu a ban hanjimi. ¹² Mǝnni Galiyo chi gwamna Akayaiyəng, Yahudawa ka guntəna Bulusi ka be nə hangu a kag ka dutəng; ¹³ hanjim a suwe go, "Ni waiwe bǝ wu furna nəbbi go a ne gratə Niyajiyuwun a demən dang rə sora nənnʊ." ¹⁴ A jiwu Bulus farə go gə suwe yəmmi, Galiyo ka sotənna Yahudawa go, "Jən Yahudawa, na lungo jiya yullo bwiran tə kiyari ki, na ba chi ji wʊ bənən jigai. ¹⁵ Mənni na tau jiwa bwanti rə dutte tən sora jənuwung, tə yigi tə nwigo jugər da jənən. Me mən farə mo mən chi ni ba muriya tai duti. ¹⁶ Galiyo ka dəg hanjim a dimən a kanda dutən. ¹⁷ Kə hanjim warigu a tau Sosthanisu, nigra kanda ruwani nyiniyəng, ka bugta kag ka gwa dutiyəng. Mənni Galiyo nwi bə da nən guji a nəngnga bwi. ¹⁸ Bulus, a buk ka chi kotə mwama gaiyəng, ka dʊ chita gaiyəng ka dəga buntəlong yigira Suriya tən Balkisu na Akila. Durə nyiya wimangiyəng, Sankuriyai, ka dəg go kurgəmən durəng bərarə buni ta bauwi. ¹⁹ A lauwe wa Afisang, Bulus ka du Balkisu tən Akila gai, kə hangu a dəga kanda nyiniruwaniyəng jəgga yəmni tə Yahudawan. ²⁰ Hanjim a chəlla Bulus go tə yəgtən chitang a kotəng, ka kwila. ²¹ Mənni durə hanjiməng, ka sotən go, "Bən kaugəmənə bwi Niyajiyuwa nga ki."Ka dəga buntəlong a diməna Afisang. ²² Fulla Bulus a səg bwi a Kaisariyang, ka gwi a nəngngatəne surang a kʊlmor də ka Urshaliman ka fi ya Antakiyang. ²³ A chi bani ya gaiyəng, ka diməna gai yigira Galatiyang tən Firjiya ka səngtən furni a məssarbə wariguwung. ²⁴ Gu ni wa Yahudawai bərə mo Afolosi, buwong ka Alizandariyang, ka be Afisa. Ni wa dəmən yəma sutangngi rə yəmtang ka waniyəng. ²⁵ Afolos ka nya məsarang a juwiya Nigrai. Hangu karə kumni aji ya chi wa We yulgoi, ka nəngnga tən məsarang a nəb nyəngka dautən rəgəng a jiya Yesuwi, mənni a yəm batisma Yohanai. ²⁶ Afolos ka su yəm dur a sisi a kanda nyini ruwaniyən. Mənni Balkisu tən Akila a nwi hanguwung, ka nəngnga ka bu hangu a kəngəng ka jiggatən a juwiya Niyajiyuwi nyagu. ²⁷ A fau sutang a Akayang, kə chitta yigtən a səngtən furniya hanguwiyəng ka mulatən na məssarbə bə ka Akayam go yu hangu kani təssu. A laweng, ka nəngngatən tugarang a nəb ba nəbbən yəmba nyaməm. ²⁸ Afolos ka məga furna Yahudawai rə kumni a wutangnga yəm, nung rə hanjim a mura wani go Yesu nən Kristi.