¹ A buk kə hanjim a sumən na bətətta Amfipolis rə Aboloniyang, ka birawa bɨr da Tassalonikan, a gu ka gwa nyini ruwani Yahudawai. ² Bulus, nyənka mitən wu rəgəng, ka diya gwa hanjimiəng, a kota gəriyu wa Yahudawai tə bwanbi ka jəgga yəmni kin a mura wani. ³ Hangu ka wuməna mura wani, jəggatən ne go a chin kwag Kristi a no kunang na bo guna mura ba bətəro-bətəroiyəm. Ka suwe go, "Yesu waiwe mən suwe yəmbangəmi nən Kristi." ⁴ Yəm həm ka dəb furna bagi Yahudawai ka murga bwite tən Bulus na Silasəng, rə nəb mwam ba Helinawam ba nəbbən dur a funtangngəm, tən bagi nyimbə mwam bə rə gratəm. ⁵ Mənni Yahudawa ba nəbbən bə yəmbə nyaməm ka ri rə nugun, ka wu furna bagi nəbbə bwiraməm gana banduwai, ka kura kulən mwam ka dəga bɨrhən a gug furna nəb biyəng. Ka guntəna kaita Jasoni farə go natə jige Bulus tən Silas a kag ka nəb mwaməng. ⁶ Mənni nəb həm a nyabə hanjiməng, ka wuwe Yason tən chiteng a be nən ji a kag ka nəbə gram ba bɨrəm suwerə go, "Nəb ba murga təməm ka lawe wa gwe. ⁷ Nəb həm bambe gəbə Yason a yu a kaitan guwum a diməna ji soriya nidu Kaisari; suwerə go karə gu nidu dunda gən mo Yesu. ⁸ Kʊlən tən nəbbə gram ba bɨrəm, a nwi yai jəni yaiyəng furni ka kiya. ⁹ A buk kə yu chəmmər a gwan Yasoni tən bagiyəng, ka jamən hanjim a diyang. ¹⁰ A wai kumhi nəbbə fungrəm ka yo Bulus tən Silas yigira Biriyang. A fulla hamjima lauwe wa gayəng ka diga kanda ruwani nyini ya Yahudawai. ¹¹ Nəb bambe karə furni nyai ya li ba Tassalonikam, bəra ki ka yu yəm həm me jugər a muri, ka yigi jəgara mura wani juttə kong go na tə chu jəni yai nə nyangki. ¹² Bərarə nyang mwama jiyu ka nəbən yəmbə nyam, rə bagi nyimba nəngnga duuttəm ba Helinawam na nəb mwam. ¹³ Mənni Yahudawa Tassalonikai a nwi mo Bulus ka warə bwanda Niyajiyuwun a Biriyang, ka diya gai a gug furna nəb mwamiyəng. ¹⁴ Rə kwa- rə kwang, chite ka tung Bulus go diya laa, kən Silas tən Timoti a chiya gayəng. ¹⁵ Nəb ba jəg Bulusəm ka di nən hangu a Atinang. A du Bulus a gayəng, ka nya təmrang kang gəng go Silas tən Timoti ka rə nyəngkə ba nəngnga bwi gərəng ki a ya wulag-wulag. ¹⁶ A jiwʊ Bulus ka yamrə betang ka jiyəng a Atinai, furangu ka kiya rə kwani nyəngka chu bɨrhən a ri rə weni. ¹⁷ Hangu ka jəgga yəmni tən Yahudawa a gwa nyini ruwana jiyuwi tən bagi bə fung Niyajiwum, na rǝ nǝb bǝ hangu chiga kinna banduwam na bə ka gaiyəm warigu. ¹⁸ Mənni bagi Abikuriyawa tǝn nəb ba yəmtang deniyəm ka chiga na hangu. Kǝ bagi suwe go, "Wulai ji niwu babta yəm farǝ go gə suwei?" Bagi a suwe go, "A nǝngnga da bǝ wau yəmba yagi weniyəm,"bǝraki bǝ wau yəmba Yesu rə guntang ka gǝng a bwiyatǝm. ¹⁹ Ka dəb Bulus a be rəga həlla Arasayəng, suwerə go, "Bənən dəmən nə yəm kang mǝsarang kǝ fiyəng kə mǝn suwerəng kə ga? ²⁰ Bəra ki mən be nən jəni fi a suna nənu. Bərarə nyang, nə fau nə yəm yaiye mən suweri." ²¹ (Nəb ba Atinam warigu tən fubǝ ba chi ya gayəm me bǝ chitǝna guji a dǝmǝnna suwetang tǝ nwitang a guji fi.) ²² Kǝn Bulus a gun a siya jugur da Arisan ka suwe go, "Jin nəb ba Atinam, kǝn chu mo tə katənə kumni a ji ya yəmba funtang a jutə warigu. ²³ Bəra ki a jiwʊ mən surə na mən jiga jibana ruwani nyini yan jənuwi, kǝn chu gu chirə wutə mulatən to, "NIYAJIYU NƏN YƏMBI. Ji tə ruwatən nyini a mura bunaya yəmtang ka jəniyəngngi, gu mǝn sungəmənni. ²⁴ Niyajiyu wa nǝngnga təm tən jiyu na wunǝ ji ka muriyu, a chi gǝ Nigra ji tən təmmi yəng, me bə chira kandə ruwa nyini wun murə kaniyu. ²⁵ Me bə farə tugarang a kaniya nəbbi, da bə fau nən guji, a chi hangu rə bwigo gǝ ne yum nəbbe, rə hegetang tən jəni warigu. ²⁶ A gwa ni kwani na nəb waringəm bə ka gussətəm, rə nyəngka jəgga fulla yigəra gani chiro wi wariguwung. ²⁷ Bərarə nyang, na hanjim na fau Niyajiyu, kaiki ba lau hangu ki na ba nya. Rə nyang, Hangu me pre rə guwa nənu. ²⁸ Bəra ki nən chi a mura Ngi, nən yolore kən nya duttəta nǝnuwung, nyənkǝ kwan a mura nəbbə mularəm ba jinəm a suwe gərəng, 'Bəra ki nǝn bo nǝn bətəm burəm ban gəm. ²⁹ A chi nən bətəm burəm ba Niyajiyuwuməng, ka nyagu nə yəm no me nyagu nən dəb ji wa tau wa we Jiyu nyira rə wer də kəlchi-kəlchin, kweyəlga, wer də chəmər mwami, tə yirə dəndeniyu, rə wete tən sula nyəra rə nəbbi a kəmarang ka niyəng. ³⁰ Bərarə nyang, Niyajiyu ka dəb mən kagkagəng a fulla mti, mənni ku bə nəngnga buwong go nəb warigu a bukang a gani warigu. ³¹ Bərarə ki hangu ka ti ko wu ba nəngngatən duttə tə nyai gəra gussəti a wa saməni. Niyajiwu ka nung bən kwetərei a nihiyu a jiwung guge a mura ba bətəro-bətəroiyəm." ³² A jiwʊ nəb ba Atina nwi yəmba guntang a bwiyatəməng, kə bagi ya nəngngatən nur a Bulusəng; bagi go, "Bənən kautən su a mui a bam yəmbə bo." ³³ A buk ka nyangəng, kən Bulus a du hanjiməng. ³⁴ Mənni bagi ka nga nən hangu a nəbən yəmbə nyam, a murga nən Diyonisiyus wa Arasai, na rə gu nyi mo Damarisi, na bagi bə ka kinəm.