¹ Bulus a be Darba tən Listirang, ka nya gu ni məssari a gai wʊ bərə mo Timotiyu, yəlla gu nyi a Yahudiyai, wa nəbən yəmbə nyami; te niya Hellinawai. ² Chitəttə ka Listirai na Ikoniyai ka su ji nya a jiya gyi. ³ Bulus a fau go gə di yom nən gəng, ka di ya mwetən kwaliyəng, bərarə ki Yahudawa ka gaiyu ka yəm go te niya Hellinawai. ⁴ Dəgira bɨtte bautən jir a kulmotəta nəbbə fungrəmi go na hanjim a yulo nəbbə nwi yəməm na bə fungrə ji nəb təmrəm na tabe a Urshalima a suwei. ⁵ Nəbbəntang ka yəmbə nyaməng ka kulmotəng ka nəngnga rə kumni, na rə yəgtəntang a mwami a wunə ko. ⁶ Bulus tən kagəm bangəm ka diya murta Firigiyai na Galatiyai, fula We yulgoi a dang hanjim rə wautang a yəm a təmba Asiyammi. ⁷ A jiwun hanjim a be rə do rə Misiyai, rə kəmarang ka dəgitang a Bitaniyang, kə We yulhoi a Yesuwi a dang rəgəng. ⁸ Bərarə nyang, a tuwa Misiyang ka be bɨrda Taruwasiyəng. ⁹ Kə churang a be tənna Bulusi rə kuməng, gu niya Makidoniyai bərə hangu suwerə go, "Be Makidoniya nan tuga bən." ¹⁰ Bulus a chu churang-həngngəng, rə kwa-rə kwang kənən diya yigira Makidoniyang, rə yəmtang no Niyajiyuwu ka bəbbən go nə wautən yəmbə ləmangngəməm. ¹¹ Rə dutang ka Taruwasiyəng kənən diya yigira Samutaraki, təma silang kənən Niyafolising; ¹² A gaiyəng kənən diya Filibiyang, wʊng bɨrda Makidoniyanni, bɨr da li nyaguwun a təmba Romanəm, kənən chi kotə mwam a gayəng. ¹³ A ko gəri ya Yahudawai, kənən jir mənna bɨr yigira kəng ka lang wunə churə da bənən nya gun ruwa nyiniwi. Kənən chiro gaiyəng nən sotən yəmma nyim ba kurabwitəm. ¹⁴ Gu nyi wung bərə mo Lidiyai, nyi wʊ miro jəni rə chəmmərə a bɨr da Tayatiran, wʊ fung Niyajiyuwi, ka kautən su a nənniyəng. Nigra ka wum furiyang gu ka kautən su a yəmbə Bulus suwerəm. ¹⁵ A fulla nəngngatən batismai tən nəba kaitan guwiyəng, ka chila bən go, "Kətə nga nən me to mən ni fung Niyajiyuwi ki, tə be tə chi ya kai ta miyu." Yəm ban gəm ka wubən. ¹⁶ A fulla waiwe kənən jir yigira gun ruwa nyiniwi, kənən chiga nən gu bwe chuwi barə təmi, nəb ba chi nən hanguwum ka nəngnga jəna kaniyu nən gə dəni. ¹⁷ Nyi waiwe ka fungbən na Bulus gug jira ji, suwerə go, "Nəb bə bwiranəm ba Niyajiyuwum wa li jəni gratə warigu. Bə sugəmən jiwa yirangngi." ¹⁸ Ka dəb kote surə yəmbə kwanəm, jəni hi ka tau jwagər Bulus deni, ka wulga bwi a sotəna we hi bwirahi go, "Mən sunən a mura dunda Yesu Kristiyən, mo jər mənne na hanguwi."Ka jir wassəng. ¹⁹ A jii wə nəb ba bwe chuwe hiyəm a chu go juta nyatangngi ya jiyu ka təsong, ka tau Bulus tən Silasəng a dəgi gra banduwang a kag ka nəb bə nəngnga dutəməng. ²⁰ A be nən hanjim a kanda dutənəng, ka suwe go, "Nəb be Yahudawa, mənni bə lugron təm a bɨr dan de. ²¹ Bə nəngnga məsarang kə sori wa dautən buwə nən nəb ba Romam nən yuwung. ²² Kə kulən warigu a gug tən kur a Bulus tən Silasiyəng, nəb bə nəngnga dutəm ka yuromən dutətta hanjimi ka dəg go buktə Bulus tVn Silas rə chəmte. ²³ A bukkə bugtə hanjim rə kwaniyu, kən kwi a jarəməng, sotənna ni torə jarəmi mo a məra hanjim kəngkang. ²⁴ A bukka nya wai soriyəng, kə ni torə jarəmi a kwi hanjim a guglo muri a jaremi a dəg nanan jiyu bwartətta dəllani. ²⁵ Rə jugər da kumənəng Bulus tən Silas ka ruwa nyini na maratən fita Niyajiyuwiyəng, rə bagi bən buwa-buwayəm nwirə hanjim. ²⁶ Nyanyinke təm ka məga bwi, jəng ta jarəmi ka məga bwi deni; rəkwa-rəkwang, fugai ka wumomən bwi, chinta wuni niyu ka təsomən a kwiyo. ²⁷ Ni torə jarəmi a gun a dum na chu fugoi ta jarəmi a wumo bwiyəng, ka jəgə dampo farə go gə ju dudda gən rə ge, bəra rə tate lungtənə go nəbə kwi a jarəməm ka mwara. ²⁸ Kən Bulus a gug jira ji rə kumniyəng suwerə go, "Kari bən nəngnga tən yari a dudda mun, bəraki nən ka gai wu warigu." ²⁹ Kə ni to jarəmi a təm go be gəmən rə gungor da kərangən, ka dəga muri rə səg bwi kare bra tatəng, ka yara kag ka Bulus tən Silasəng, ³⁰ ka jire nən hanjim a tariyəng, ka suwe go, "Nəbə gram, wulai ji bən nəngnga kin nya jəgtangngi." ³¹ Hanjim a suwe go, "Ne yəmbə nyam Nigra Yesu, na nya jəgtang mu tən kaitamu." ³² Kə hanjim a sotən bwanda Nigram a hanguwi, tən kaitangu warigu. ³³ Kə ni to jarəmi a dəb hanjim rə kumhi a tutən detəttan jiwu, rəkwa-rəkwang kən nəngngatən batisma hanguwi tən kai tangu. ³⁴ Ka be nən Bulus tən Silas a kaitangu a ne jəni-jauriyəng. ka nəngnga bwiləmri tən ba kaitanguwum bəraki ka nəbbən yəmbə nyam ba Nijiyajiyuwum. ³⁵ Təmma silang, nəbbə nəngnga duttəm ka təmtən yəm a ni to jarəmi, suwerə go, "Du nəbhəm a diya." ³⁶ Kə ni to jarəmi a sotəna Bulusi go, "Nəb bə nəngnga duttəm ka təm me yəm go jangəmən kang natə di: bəra rə nyang tə jire na tə di ləmangngəm." ³⁷ Mənni kən Bulus a sotənna hanjimi go, "Hamjim a bugtəbən a tari tangsang nəngnga bəmən bə dutte, a kəmta nəbi, nən bənən Romawam, me rə ji bwira nyabən rəgi kin kwibəna jarəm. Ban hanjim bə fau go tə jabəmən kang a kululuwi bwi ga? Me nyang! Me bənə nga tə du hanjim a be jəgbən." ³⁸ Nəb bə torə jarəməm a kautən bwi rə jər a nəb bə nəngnga dutəməng, nəb bə nəngnga dutəm ka nwi tate a fulla nwi go Bulus tən Silas nəb ba Romawaməng. ³⁹ Kə nəb bə nəngnga dutəm a be chəlla hanjiməng; a jirməne nən Hanjim a jarəməng, ka sotənna Bulus tə Silas go hanjim a du bɨrhənəng. ⁴⁰ Bulus tən Silas a jire wa jarəməng ka be kai ta Lidiyayəng. Bulus tən Silas a chugo tən chitəng, Ka ne furi rə kumniyəng ka diya mən na bɨrhənəng.