¹ Bagi nəb ka diya wa Yahudiya yəgi ra Antakiya məsatəna chite, suwerə go, "Mwiya ngəmən bə kwalte nyinka soriya Musai a suwerə gərəng ki, me bətə nya jigtang." ² Bam yəm ka be rə wugatang yəm a jiya yəm bambe a jugər da jiyən tən Bulus na Barnabas. Kən Bulus tən Barnabas, rə bagi nəb a mura jiyu a yigiya Urshalima a gwa nəb təmrəmi tən tabe a jiya gulən dande. ³ Bərarə nyang hanjim, bə kulmor a təmməm, ka diya tʊ a mura Finikiyang na təmba Samariyam sotənne butang ka kangəng ka nəbbə me Yahudawam. Ka betən rə bwilǝmrǝ a chitǝ deni. ⁴ A birawa Urshalimang, kulmor rə nəb təmrəm na tabe ka yu hanjim rǝ bwilǝmrǝ, kən hanjim sotǝn jəni warigu yə Niyuajiyu a nənga gwan jiyu. ⁵ Mənni bagi nəb ba nəbbən yəmbə nyam ba mura Farisawam, ka guno suwe go, "A chin kwag mwiya tən kwalta hanjimi na fung soriya Musai." ⁶ Bərarə nyang nəb təmrəm tən tabe ka chiga go natə jiga ban yəmbe. ⁷ A bukka wuga yəm deniyəng, kən Bitrus a gun a sotəna hanjimi go, "Chite, kəttə yəm to Niyajiyu ka nǝngnga saurang kə nyang rə langtang a mura jənən, go a nyiya miyu nəbba kuməm a nya yəmbə ləmmangəm, na nəbbən yəmbə nyam. ⁸ Niyajiyu wa yəm furniyu, ga su yəm bəra nən ji, ka ne hanjim We Yulgoi, nyəngka nəbbən gərəng; ⁹ a nəngnga bə saurang a jugər da nənnən na hanjim, ka tumən furna jiyu a nəngnga kaluri a gwa nəbəntangnga a yəmbə nyami. ¹⁰ Mǝnni kʊ nyang nyəngke bərarə wulai kə tə bəngo Niyajiyuwung, tə titən nəgənni a bwiranəm wʊ te bəbbanənəm a dəmən ba dəbi? ¹¹ Mənni kənən nəbən yəmbə nyam no jəgtang wa gwa nəttəta Nigra Yesuwi, nyəngkə ka rəgəng." ¹² Nəb warigu ka marasi sau a kautən su a Barnasba tən Bulusi a ji wʊ hanjim suweri nyəngkə Niyajiyu a nəngnga jəna mənatangnga buniyu rə nungtang a mura nəbba kuməmi. ¹³ A bukkə hanjim a marasiyəng, Yakubu ka nga, suwerə go, "Chite, tə nwi no. ¹⁴ Siman ka suwe nyəngkə Niyajiyu a tugarang kan gəng ka nəngnga tən nətə gra nəbba kəməmi go na gə nyatəne nəb a dundan gən. ¹⁵ Bwantətta nəbbə yuwe yəməm ka nga rə waiwe, nyəngkə ka mula bwi mo, ¹⁶ 'A buk ka yai jəni yaiyəng ki bən kauwe bwi, Bən kau bwi mu kai tan Daudai, ta yarri; Bən kauwe bwi rə jiya kiyai na gug kullohi, ¹⁷ na nya nəb ba dutənəm a fau Nigra, rǝ warigu nəbba kuməm bərarə dunda miyin.' ¹⁸ Waiwe gən ji Nigra suwei, wa nəngnga jəni yaiye yəm rə langtangngi. ¹⁹ Bərarə nyang, a kəmmarang ka miyəng mo kari bətə ne kunang nəbba kuməm bə ka kauwe bwi a gwa Niyajiyuwum; ²⁰ mənni bənən mulatən a hanjimi no a chin kwag a du weni, tən talte, na jautangnga nam bwang bi, na rǝ jautangnga dugum. ²¹ Rə langtang a bɨtte dəndang ka nəbbə warə yəməm we, na rə bə kera mura wang ka Musaməm a gana nyiniruwani ya Yahudawai a wunə ko gəriyu." ²² Ka nəngngatən nyagu a nəb təmrəm na tabe, na rə kʊlmor warigu, ka samən Yahuda wʊ bərə mo Barsabai, na Silas nəbbə sira kagəm a mura kʊlmor, ka təm hanjim yigira Antakiya tən Bulus na Barnaba. ²³ Hanjim a mula go: "Nəb təmrəm, tabe na rə chətte, yigira gwa chətətta nǝnʊ bə ka Antakiya, Suriya na Kilikiyam, kǝnǝn nəngnga surang. ²⁴ Kənə nwi mo bagi nəb bə mən neba soriyəm, ka jir a mura nəni a ya dagəne rə məsarang kə da furna junuwʊng. ²⁵ A chi nyangəng kənən ngaga waringəm ba nənən nən samən nəb na nən təm yigira gwa jəniyu tən chətətta nənnʊ ta dai Barnaba tən Bulus. ²⁶ nəb ba nəbən dutətta jiyu bərarə dunda Nigra Yesu Kristiyəm. ²⁷ Bərarə nyang kənən təm Yahuda tən Silas, bə ba sugəmən ji kwaniyəm a mura bwantətta jiyuwum. ²⁸ Bəraki ka nəngngatən nyagu a We yulgoi na nən warigu, no me bənən ti gəmən jəni nəgənni a li yai jəni kwag gi ye: ²⁹ no tə ne buk tungtang a jəni a weni, rə jautang a dugʊm, rə nam bwangbi, na talte. Tə du yai jəni yaiyə ki, ba nəngnga gəmən nyagu. Tə gərmən ləmmang. ³⁰ A bukkə yo hanjiməng, ka fiye wa Antakiyang; a buk ka kura kulən a gu kwani wariguwung, hanjim ka ne wang. ³¹ hamjim a keng, ka nəngnga bwiləmri bərarə yəgtəntang a kumni ta nyai. ³² Yahuda tən Silas, nəbbə yuwe yəmǝm, ka səngtən furni a chəttǝng, rǝ bwantǝ tǝ mwami ne kumni hanjim. ³³ A buk kə hanjim a chi kotə mwam a gaiyəng, kə ba gaiyəm a yo hanjim ləmangəng a kaubwi a gwa nəb ba təmeməng. ³⁴ Mənni Silas ka chu go ka nəngnga gəmən nyagu ngə chi a gai ³⁵ Mənni Bulus tə Barnaba ka chi a Antakiya tən bagi chətte, a gwa hanjim a nəngnga məssarang tən wautang a bwanda Nigran. ³⁶ A buk ka yagi kotəng, Bulus ka sotənna Barnabasi go, "Tənən kau bwi kʊ nyang nyəngke na nən jəga chətte a bətəttə nən wau yəmba Nigram wi, na nən chu nyəngkə ka gərəng. ³⁷ Barnabas ka fau go natə di tən Yohana wʊ bərə mo Markusi. ³⁸ Mənni Bulus a kəmma go a nəngnga bə nyagu tə di nən Markus wa dugiye wa Bamfiliya a jabə kag nən ji a swiyeri. ³⁹ Buri ka digi ya jugər da jiyən rə kumni, kə hanjim a wulgang, Barnabas ka dəb Markus a di gəra Kuburus. ⁴⁰ Mənni Bulus ka samən Silas a diya kinəng, a buk kə chəta ruwatən nyini a dəga kang ka Nigrangəng. ⁴¹ Ka du wa mura Siriya tən Kilikiyang yəgtən kumni a kʊlmotəng.