¹ Fulla wu Bulus tən Barnabas a dəga bɨrda Ikoniyani ka dəga kanda ruwani nyiniyin da Yahudawan ka sotən yim a hanjimi, bə mwama Yahudawam na rə Helinawata nəbən yimbənyami. ² Mənni Yahudawata nəbənbə yimbə nyami ka swi Helinawam a nənga furdə yuluwun rə chite. ³ Kə hanjim a lang a gaiyəng, surə yəm dur a səssi rə kumni ta Nigrai, be rə jəni ba dəg ki nga rə yəmba nətəti dautən buwi. A nəngnga nyang a gwa betang rə wuloniyəng tən jəna mənnatanga buniyu a kaniyan Bulus tən Barabasəng. ⁴ Mənni nəb mwam a bɨrhən ka wutəgo bwitə təsu: bagi ba Yahudawam bagi ba nəb təmrəməm. ⁵ A jiwu Helinawa tən Yahudawa fau chəllatanga sir a gwa nəbbə gram ban jiyim go na tə mungo Bulus tən Barnabas rə wetəng, ⁶ hanjim ka yəm ji nəngnga bwiyu ka mwara yigira bɨr da Likoniyan, Listra na Darbiyeng, rə murta tuwe gaiyu, ⁷ ka wau yəmbə ləmmangəm a gai. ⁸ A Listra ka gu ni wʊn buwe jwagiyu, nani merə kumni, a yomən bə yom we. ⁹ Ka nwi nyənkə Bulus surə yəm rəgəng. Bulus a nyabtən kəmta nihi ka chu ka nəbbən yəm bə nyam go gəbə nya kwaratang. ¹⁰ Ka sotən yəm rə kumniyəng go, "Gun səssi rə nana mu." Kə nihi a gunəng. Kə nihi ya su muwara ji a diyəng. ¹¹ Jii wu nəb a chu ji Bulus a nəngngayəng, ka gugo jitə rə kumni go, "Weni ka be bəmən rə bwi ta nəbbi." ¹² Ka bu Barnabas go nən "Zafsang" ka wulga tən dun a Bulusi go "Hamisang," bəraki ge gən ni surə yəmmi. ¹³ Ni tung jəni a kak ka chəriyan Zafsai, wu kanda chəriyən da gən ka tara bɨrri, ka be rə gumtəltə rə jəni səra nyirarə wangngi a fugang; hangu tən nəba kʊlənəm farə go tə ne gratə rə tungtən jəni ya hanjimi. ¹⁴ Mənni nəb təmrəm, Barnabas tə Bulus a nwiyəng, ka yuro dutəttan jiyuwung ka mwara səngni digira nəbba jugərəng ¹⁵ bo sotənnə go, "Nəb, wula ma ki tə nəngnga jɨni yaiyəng? Nən nən nəb rə kəmarang ka nəbbəng. Nən be nən yəmbə ləmmangəm no na tə wulga mən bwi a yai jəni rə kunni ye tə kautən bwi a Niyajiyu rə yuumi, wa nəngnga təm tən jiyu, rə wimangte na rə wunə ji wu ka muriyu. ¹⁶ A fulla suwi, Ka du nəb warigu go yo nyəngka chu rə sirəngən. ¹⁷ Rə nyangəng, a dubə dur da gən me rə wʊ butən bugi, nyəngka nəngnga ji nya ka nəggən hiya jiyu tən harnang kə nyangəngəng, ri furna jənu rə bwiləmri. ¹⁸ Rə tai bwantəte warigu, rə bwaiguwi Bulus tən Barnabas a nowe ban hanjim. ¹⁹ Mənni bagi Yahudawa jəre wa Antakiyam tən bagi ba jire wa Ikoniyam ka be nowu dutətta kulənhənni. Ka mungngo Bulus a wumən na bɨrhən lʊngrə go ka bwiya. ²⁰ Mənni məssarba be sira a kawurre hanguwung, ka gun a dəgiya bɨrəng. Rə silang, hangu ka di yigira Darba tən Barnabas. ²¹ A bukkə hanjim a wau yəmbə ləmmangəm a dan bɨrən na nya məssarbə mwaməng, ka kaubwi a Listira, yigira Ikoniya na Antakiyang. ²² Ka jau kak ne kumni tən bautanga a jir a nəb ne kumni furna məssarbi go jaukag a mura nəbbəntang a furni, Sotəna hanjimi go a chi kwag no kunang kika du digiya dʊtətta Niyajiyuwi. ²³ A jiwu hanjim a sautən tabe a mura bən samən sawiyəməng, na ruwatən nyini rə sotanga hiyəng, ka dutən na Nigra wu hanjim a nəbbən yəmbə nyam wi. ²⁴ Ka suu yigira Bisidiyang a jirtəna Bamfiliyang. ²⁵ A wau yəma Biriyang ka su yigira Italiyang. ²⁶ A gaiyəng ka digiya bontəlong ka hiyəng a diya Antakiyang, a gun dəg hanjim a kang ka Niyajiyuwung bərarə swiyer də hanjim ba mwarmənən. ²⁷ A fullla hanjim a lauwe wa Antakiyai, ka kura bən samənsawiyəm a sotən jəni yə Niyajiwu a nəngnga təna hanjimi wariguwung, na rə nyəngka wumən fugong rəge bəra rə nəbəntan ka furiyəng ka nəbba kuməmi. ²⁸ Ka chəllang tən məssarbe.