¹ A kulən da nəb bən də ka Antakiya, ka nəb bə yuwe yəməm we na nəb mularəm. Bana Barnabas, Saminu (wʊ bərə mo Yuluwi), Lukiya niya Kurame, Manayin (wu noro tən nidu Hiridusi), na Shawulu. ² A jiwu hanjim ka ruwatən nyina Nigrai na so hiyu kə We Duwi go, "Tə jəgi mən Barnaba tən Shawulu rə kəng, na nəngaimən swer dən buwe hanjim wun." ³ Buk kə kulən hən a so hiying, a ruwa nyiniyəng, na tətən kang ngəng, ka du hanjim a diyang. ⁴ Kə Barnabas tən Shawulu a fung jirda We Yulgoi ka diya Sulukiyang; buk ka nyangəng ka yawung yəgira fuur da Kuburusin. ⁵ Buk kə hanjim ka təmba Salamiyəm, ka chi si finangang ka yəmba Niyajiyuwuməng a gwa ruwani nyina Yahudawai, hanjim ka tən Yohana wu bərə mo Markusi ni tuga ran jiyu. ⁶ Hanjim a tuwe fuur hənəng yigira Bafusang, ka nya gu ni wu jiga təmi wu bərəmo Bar-yesuwi, niya Yahudai tiya nyatə go ngən ni yuwe yəmi. ⁷ Ni waiwe ka murga dur tən nigra tau gu kuntai, Sarjus Bulus, ni rə bərsani. Kə nigra hi a buwe Barnaba tən Shawulu go na ngə nui yəm ba Niyajiwuməng. ⁸ Mənni kən Elimas "ni barə təmi" (bəra ki mə wulga dundangən nyang) a su kra yəmbə ban hanjiməm, farə go gə dəmmən kəmaranka nigra tau gu kuntayəm a juya nəbəntang a yəmbə nyami. ⁹ Mənni Shawulu, wu bərə mo Bulusi ka ri rə We Yulgoiyəng; ka tartən kəmtəng nihiying ¹⁰ sotənə go, "Mwe yila shetani, fur da mun a ri nəng julai na rə bwiran. Mən chugo kag gi wa wunə ji nyai. Me bən du lugrotang a juwiya Niyajiyuwi a si sabi, bən nəngnga ga? ¹¹ Chu kʊ, kang ka Niyajiyuwung wa mwi ya dur, bən yulo du, me bən kabi chu guji ba bani." Rəkwa-rəkwang guji nyərarə muwa ka be tən nə kum a Elimasiyəng; ka su yogorə me bə yəm juwiyəng, chəlla nəb go tagəmən damər. ¹² A bukə nigra tau gu kuntai a chu jəna nəngnga bwiyuwung, ka nəbən yəmbə nyaməng, bəraki ka məna buni rə məsarang ka Ta-jiyuwung. ¹⁴ Bulus tən kagəm bangəm ka diya Firijiyang, yigira Antakiya a təmba Bisidiyam. A gai gun hanjim a dəga kanda nyini ruwaniyən da Yahudatən a ko ngəriyu ka chi ya gaiyəng. ¹⁵ Buk kən ke kerang a mura wang ka soriyin ngəng na rə ka nəb bə yuwe yiməm ngəng, kə nəbə gram ba gayim a təmtən yim a hanjimi go, "Chitətta nənnʊ, ka tənə bagi yəmbə ba yəgtən kumna nəb a gwi ki, tə suwe." ¹⁶ Kən Bulus a gun a gug kang ka gəng a jiyəng suwe rə go, "Nəb ba Israilam na jin bətə ne gratə Niyajiwum, tə kausu. ¹⁷ Niyajiyu wa nəb bambə Isra'ilai a samən te bəbə chərem na ne buwong mwam a jiwʊ hanjim ka Masari, na jəge hanjim rə kumniyu. ¹⁸ Ka dəb nyəra jəte furtəgwar ka mida nən ji a mura sayəng. ²⁰ Jini yayya nənga bwi a mura jətə betəttə gwar rə furtənu. A bukka jini warguwung, kən Niyajiyu a ne nəbbə nəngnga dutəm yigira Sama'ila rə bə yuwe yəməm. ²¹ Kə nəb a chəla go tə fau nidʊwung, kə Niyajiyu a ne hanjim Shawulu yəlang Kishi, ni ya duk ka Biliyaminuwung, a chi nidʊ ka jətə furtə gwarəng. ²² a jiwu Niyajiyu a jəg mən hangu a dʊtte ka be nən Dauda a chi nidʊwa jiyuwung. Wa jiya Daudai gu Niyajiyu a suwe gəri go, "Kən nya Dauda yəlan Yesei ni wʊ ka furamiyuwi; wu nəngnga ji mə fari wariguwi." ²³ A mura dugər tətta ni waiwi, Niyajiyu ka be tən rə Ni Jəgrə a Isra'ila, Yesu, nyənka ne yəm bʊrəm go gəbə nəngnga gərəng. ²⁴ Jəni yaiye ka su nəngnga bwi, ka məna du Yesu a being a jiwun Yohana a si finang ka batisma butang a kanggi a nəb ba Isra'ilami warigu. ²⁵ Yohana be mwarmən swer da gənəng, go, 'Tə kəma to mənnə wune? Me mənnəng hangu. Mənni tə nui, ka rə wuba be buk ka miyənggi, suitənbə kumən ləbərtangʊ.' ²⁶ Chite, bətəm burəm ba Ibrahiməm, na rə bə ruwatən nyini a Niyajiyuwum, yəmba jəg rangngəm suwe bəra nə nən. ²⁷ Bəraki ba chi ya Urshalimam tən nəbbə gram ba jiyəm a ngabə nən hangu, bərə nyang, yəmbə nəbbə yuwe yəməm a suwem ka ri, “bən kera wunə ko Gəriyəm, ka mwe tən dutətta jurangngi hanguyəng.” ²⁸ Warigu rə nyənkə hanjim a nyabə guji wa lau kə bən jugəriyəng, hanjim a sotəna Bilatusi go ju hangu. ²⁹ A mwarmən ritang a jəni mula hanguyəng, ka səgməne hangu a yuwarangəng ka dəgga suwung. ³⁰ Məni Niyajiyu ka gug mənne hangu a ba bətəro-bətəroiyəm. ³¹ Nəb ka chu hangu ka kotə mwaməm, nəb ba diyawu tən hangu a Galili yəgira Urshalimam. Hanjim bambe ka yulo bə bʊrə bukka hanguwiyəng a gwa nəbbi. ³² Kənnən be nənne rə yəmbə ləmang ngəm ba tau yəm bʊrəm bə Niyajiyu a ne tebəba nənnəməmi; ³³ ka ri bəmən ban yəmbe, nən bətəm ban jiyəm nyənka gug Yesuwung. Nyənkə mula mura wang kən suwʊng ka fitəng mo; 'Mən Yəla miyu, kokuwi kən yulo Temu.' ³⁴ A jiya yəmbə nyam ba gug hangu gəra buyatəm go na bwi yan gu karba fiyəng, Niyajiyu ka su bagi yəm go, 'Bən tinən kangka yəmbə nyaməng na rə kə yulgong ka Daudang.' ³⁵ Gən jiya nəngnga ka suwe wa mura kagi wang ka fiyangngəng go, 'Me bən du Wʊ Yulgoi ya mu a fi.' ³⁶ Bəraki a buk kən Dauda nəngnga swerdə Niyajiyu fara fula guwun, ka daduməng, kən ti tən tebəng, ka fiyəng, ³⁷ mənni Hangu wu Niyajiyu a guggei a fi be. ³⁸ Bəri nyang a yulo gəmən ji tə yəmi, chite, to a gwa ni wai wi kən si gəmən finang ka yunotang a jini bwiraiyəng. ³⁹ A gwa giyu, wuna junu wa nəbən yəmbə nyami ka yulo ni merə jiya kəbari wu soran Musai a dəmənba nəngai. ⁴⁰ Bəra rə nyang, wuni ki a nəngnga ba den bəri ji nəbbə yuwe yəməm a suwei ba nəngnga bwi nən ge: ⁴¹ 'Tə chu, jən bə rə dutəttə nəngəniyəm, na tə məna buni, na dʊ tə bətəro; Bəra ki mən nəngnga swer a mura kotan jənu, Swer də me bətə nga rə gən, a ci nə gu na ba sugəmən ki.'" ⁴² A jiwu Bulus tə Barnabas a dəyai, nəb ka chəlla hanjim go yəgtən bam yəmbe a ko Gəriyu wʊ beri. ⁴³ A jiwu gunmən na bam chimi, Yahudawa tə mwam na nəb ba bukang rə kumni a wai juwiwum, ka fung Bulus təng Barnabasing chilarə hanjim go a jaukag a mura nətəttə nə dautən bə wi ta Niyajiyuwi. ⁴⁴ Ko Gərəyu a juweng, bərhən ka nəngnga rə do jire tang warigu go natə nui yəmba Ta-jiyuwum. ⁴⁵ Yahudawa ta chu mwama nəbbiyəng, ka riro rə nugun, ka nəngnga kag rə ji Bulus a suweyəng kəbarə bo. ⁴⁶ Məni Bulus tən Barnabas ka su yəm rə kumni go, "A chi bwi sugəmən yəmba Niyajiyuwum fu. A chi kətə tungmən a bwitəng na kətə yulo nəb ba dautəbuwa nyatang a yuum bə kurəkwangəməng, tə chu, kənən wulga bwi a gwa nəbba kuməmmi. ⁴⁷ Bəraki ji Niyajiyu a subəməni, go, 'Kən ti gən mo tə yulo kwetərei a nəbba kuməmmi, mo na tə betənə jəgtang a gusitə warigu.'" ⁴⁸ Nəbba kuməm a nwi yəmbəng, ka nəngnga bwiləmri ne gratə bwamər da Niyajiyuwun. A nyənkə nəb bə mwaməm ba chi ba nya yumbə kurikwangəm a nəbən yəmbə nyaməng. ⁴⁹ Kən wasə yəmba Niyajiyuwum a murtan jiyu wargu. ⁵⁰ Mənni Yahudawatə ka chəla bagi nyim bə ruwanyiniyəm tən bagi nəb bə gram ba bər hə nəm. Nyanki ka be rə sitang ka jurangngəng a jiya Bulus tə Barnabasi, ka jəgamən hanjim a bərə do rə jiyənəng. ⁵¹ Mənni kə Bulus tən Barnabas a bamən kur a nanan jiyuwung na chi dute a jiyəng. Ka diya yəgira bərda Aikoniyan. ⁵² Kə bwiranəm a ri rə We Yulgoiyəng rə furdə kwauwun.