¹ A Buk kə lungo-tə-lungoi a jiyǝng, Bulus ka bu bwiranǝm bangimǝm a sǝngtǝn furni hanjimiyəng, ka sotən go kən dugən ləmmangəm, ka du hanjim a di ya Makidoniyang. ² Ka mul a kǝngngǝr sǝngtǝn furni a hamjimi nyagu, ka be tǝm ba Helinawam. ³ A bukka nǝngnga swangngər tə bwanbi a gaiyəng, Yahudawa ka nǝngngatǝn naka Jalbunǝnəng, a nyəng kə nǝngnga bwi go gi gwi ya buntəlong ka hiyǝng yigira Suriyang, ka wulga kəmarang go gə tu a Makidoniya. ⁴ Nəbbə yorǝ hanguwun ka lauwa Asiyam a murga tǝn Sobatarus bwen Burus a Biriyai, tən Aristakus na Sakundus, warigǝm nǝbbǝ fungrǝm ba Tasalonikam; Gayus ni ya Derbai, Timoti tǝn Tikikus na Trofinus ba Asiyam. ⁵ Mǝnni nǝb bambe ka lubǝn yambǝna Taruwasa. ⁶ Nǝn dǝgga buntǝlong ka hiyǝng a Filibi, a buk ka kotǝ mwan de merǝ bariyǝng, a mura kotitǝ nuwʊng kǝnǝn lauwe hanjim a Taruwasang. Nǝn nǝngnga kotǝ nyibi a gai. ⁷ A ko rǝ jiguwi ya nyibiyu, nǝn kura bwi nǝn jarǝ mwanǝng, Bulus ka sotǝn yǝm a nǝbbǝ fungrǝm. Bǝraki bǝ sur bwi go bǝgǝ di rǝ silani, ka jaukag rǝ yǝm yigira jʊggǝr da kummǝn. ⁸ Ka gungor tǝtta kǝrangngi mwam a kanda jiyǝng dǝnǝn kurgabwiwun. ⁹ Gu bweli bǝrǝ mo Aftikosi wa chi ya fugan ka sǝmbangǝng dum ka dǝb hangu nǝggǝn.Bulus ka wu yǝmma sutang, bwelihi wa da dummi ka yarre wa kan da jiyǝn dǝn bwanbiyǝn kǝn dǝbba bwiya-bwiyaiyǝng. ¹⁰ Mǝnni Bulus ka suwe, a wutǝn bwiyangu a hanguwi ka kummǝng, ka suwe go "Kari furi ba kiyamǝn a gu, kari yum." ¹¹ Ka kaubwi ya kanda jiyǝng a jau jǝni jaurǝ. A bukka wu yǝmma sutang yigira tǝm silanǝnmǝng ka diyǝng. ¹² Hanjim ka be rǝ bweli hi rǝ yum, ka nya sǝngtangnga furiyǝng. ¹³ Mǝnni kenǝn lu Bulus rǝ ditang rǝ bunttulong ka hiyǝng, yigira Assos, a gu nǝn kǝmma no nǝn dǝb Bulus a buntulong ka hiyǝngngi. Wai ji we gun hangu farǝ go nǝngngai, bǝraki hangu a bu bwi go gǝ yo tǝm. ¹⁴ A nyabǝn Assosǝng, kǝnǝn dǝb hangu a buntǝlong ka hiyǝng nǝn diya Mitiliusiyang. ¹⁵ A bukkǝ kǝnǝn gunmǝn a gaiyǝng, kǝnnǝn lauwe tǝm hi ya kawurrǝm Kiyos rǝ tǝm silanǝm. Tǝmma silang kǝnǝn be bɨr da Militusiyǝng. ¹⁶ Mǝnni Bulus ka bu bwi go gi suwa Afisa a buntǝlong ka hiyǝng; go na kari bǝggi tǝgbwi ya Asiya, bǝ ka da go ki ba nǝngnga bwi ki gǝ lau Urshalima a ko bwilǝmri a yautangngi. ¹⁷ Ka Militasǝng ka tǝm bagi nǝbbǝ yigira Afisa go bǝgǝmǝne nǝbbǝ gram ba kulmorǝm. ¹⁸ A fulla hanjim a be tǝni kǝ hangu a sotǝn go "Jin kǝtǝ yǝm to ko wun fau naka miyǝng a Asiya rǝ chiyǝmi, na nyǝngkǝ nǝn chi kin jutəkwang. ¹⁹ Kǝn jaukag rǝ fungtangnga Niyajiyuwi nyagu rǝ sǝgtang a dur, rǝ wite, rǝ kunang kǝn nwi, bǝrǝ naka Jalbunǝng ka Yahudawang. ²⁰ Kǝtǝ yǝm to nǝngnga be nǝggǝni a sugǝmǝntang a wuni ni ba nǝngngamǝn finiyu, tǝn nyǝngkǝn mǝssa gǝmǝn gǝra tari tǝn kaini, kainiyǝng, ²¹ Nyǝngkǝn wula tǝn wer a Yahudawa tǝn Helenawa, a jiya butang a kang a Niyajiyu na nǝbbǝntang a yǝmbǝ nyam a Nigra Yesuwi. ²² Kʊ nyang nyǝngke chu, mǝn yigiya Urshalima, We a nungngi kwetǝre go a chin bwi n'di, yǝmbe ji ba nyai a gaiyu. ²³ We Yulgoi ka wuwi mǝn su go a dǝnǝ bɨr ki chǝnte tǝn kunnang ka yamire. ²⁴ Mǝnni ti bǝ mo yuum ba miyim me a nyiya gujiyu a mi, kǝ bǝn dǝmǝn bǝ mwarmǝn sǝk ka miying na ri swiyer dǝ yuwe a gwa Nigra Yesuwi, na su yǝmbǝ lǝmmangǝm ba nitǝta ba Niyajiyuwum. ²⁵ Ku Jigga, kǝn yǝm waringǝm ba jǝnǝm bǝn wautǝng yǝmba dute ta Niyajiyuwumi, me bǝtǝ yəgtən tǝ chuwi. ²⁶ Bǝrarǝ nyang kǝn suggǝmǝn ko kʊwi, me mǝnne bwiran da dugum ba gu niyǝm. ²⁷ Bǝra kǝ nwibe nǝngngini a sugǝmǝntang a kǝmmarang ka Niyajiyuwung. ²⁸ Bǝrarǝ nyang tǝ nǝngnga den rǝ duttǝta jǝnu, na bo rǝ kulmor dǝ We Yulgoi a dǝgǝn tǝn nǝb jǝgarǝm. Tǝ nǝngnga den rǝ totangnga a kulmor da Niyajiyuwun, ba hanguwa suta rǝǝ dugum ba giyǝmǝm. ²⁹ Kǝn yǝm mo a buk ka ditang ka miyǝngǝng ki jwatǝ nyuwai ba be juggǝr da jǝnǝn, bo me ba du kulmorhǝn. ³⁰ Kǝn yǝm mo a mura jǝnu bagi ba be su yǝmni bwirai bǝ me rǝ swirrǝm, na ba tǝ nya mǝssarbe. ³¹ Tǝ chi rǝ yǝmtang. Tǝ kǝmma jǝttetǝ bwanbi, du bǝ mǝssagǝməntang rǝ betǝkǝmi kum rǝ ko. ³² Kʊ mǝn dǝggǝn a kang ka Niyajiyuwung tǝn yǝmba nittǝ tǝn dautǝnbuwi bǝ ba demǝn a mugǝn na nǝgǝn kulla a mura bǝn tumǝn warigu. ³³ Nǝngnga bǝ jǝllǝn da kweyǝlgai, wetetǝ kǝlchǝ-kǝlchi na dutteta gu niyu. ³⁴ Jin rǝ bwita jǝnnu kǝtǝ yǝm to nǝngnga swiyer rǝ kana miyu, na nya ji mǝn fari na bǝ nǝn ka kinnǝm. ³⁵ A mura jǝni warigu kǝn yullo gǝmǝn jiya mǝsarangngi, nǝngkǝ bǝtǝ tuga ba yarmǝn yariyǝm rǝ swiyer, na nyǝngkǝ bǝtǝ kǝmma rǝ bwandtǝtta Nigra Yesu, bwantǝttǝ hangu rǝ bwi go, suwe go, "Nǝbbǝntang kali yutang rə dǝgtang a kang." ³⁶ A bukka su we nyangǝng, ka ru wa a ruwa nyini tǝn hanjim warigu. ³⁷ Warigǝm ka tǝro-wite rǝ kwani, kǝn hanjim a kum Bulusǝng ka jǝlmang. ³⁸ Hanjim ka nǝngnga furdə yulluwun, bǝrarǝ yǝmba sotǝn go, me ba kaubwi a chu kakkagang bo. Kǝn hanjim a yo hangu a buntulong ka hiyǝngǝng.