¹ Mənni yəm wai jiwe, a mwatənte koti bən no kʊnang. ² Bəraki nəb ba chi bə farə bwitan jiyʊwʊm, bə farə chəmmərəm, bərə wertəng dʊttəng, wertang ka bwitəm, bə sʊrə yəm bə bwiraməm, bə me bə nwitən yəmma nəb burəməm, bə merə wʊnannəm bə merə kalʊriyəm. ³ Ba chi mərə yobi nyaiyəm, bə me bə nwigotən nəb waringəm, bərə langtəttə bwiraiyəm, ba tabə duttəm, nəbbə bumən soriyəm, bə me bə farə jiya dautənwiyəm. ⁴ Hanjim ba chi bə nəbbən bagiyəm, bə rə dʊr nəggənnəm, bə rə gaanəm, ba yotən da swiyer da jɨnni jəlliyən a li tən Niyajiyʊwʊm. ⁵ Ba chi rə wʊlo kalʊriyʊ, mənni ka niga sətte tən kumnitang gʊ. Wʊlgamən bwi a bam nəbbə. ⁶ Bagi ba jiyəm ka dɨgira kai ni funo rə nyʊim bə mɨtəm, bam be ji gən nyʊiyəm bə rə jɨni bwiraiyəm, ba nyəgəlmənna jʊwi bərarə jəllən da bwiyən də bwirannən. ⁷ Bam nyʊim bambe wa jiya məssatang jʊtəkwang, mənni me ba dəmən a lau yəmtang ka yəm bə nyaməm. ⁸ Nyəng kə Yannisu tən Yambrisu, a nəngnga kag nən Mʊsang. Nə nyang nəb məssarəm ba nyatəm bambe ka nəngnga kag rə yəm bə nyam. Nəbbə furna jiyʊwi a kiyakiyaiyəm, ngabə nən ji a kʊllo nəbbəntang a yəm bə nyami. ⁹ Mənni me ba di fʊrre. Bəra ki mɨtəta jiyʊ ba jɨretəne a wʊni kwetərre, nyəra ya bam nəbbi. ¹⁰ Mənni mwe, kən fʊng məssarang ka miyəng, rə yobiya miyʊ, kəmarang ka miyəng, nəbəntang ka yəmbə nyam ba miyəm, rə yotang ka dang na tautang ka fʊriyəng ka miyəng. ¹¹ Rə mwami a kwewi ya miyʊ, tən kʊnang ka miyəng, rə jɨni ya nyaiya Antakiyai na Koniyai na Listrai. Kən bi fʊri a mʊra kwewi ya miyʊ, mənni a mʊra yai jɨniye warigʊ, Nigra ka yiyai. ¹² Waringəm bə farə go tə yoyombə kalʊriyəm a mʊra Kristi Yesʊwʊm ba no kʊnang deni. ¹³ Nəbbə bwiram tən bə funo nəbbəm, ba jaukak rə kiyatang. Ba dəg bagi a lira hanjim bo bən dəg lira. ¹⁴ Mənni mwe, jau kak rə jɨni yən məssai na yə nəbbən yəm bə nyam rə fʊri kwani. Yəm nəbbən yʊ məssarang wʊm. ¹⁵ Kən yəm mo a fʊlla wʊ mən bwe kəttəli, kən yəm wani kalʊriyʊ. Yə ba dəmən a dəgən jəgga jʊwi ya nyatang a yiyarang a nəbbəntang a yəm bə nyam a mʊra Kristi Yesʊwi. ¹⁶ Dənə bwan da Niyajiyʊwʊn, Niyajiyʊ ka gʊtən yuumum ba gəm warigʊ. Kari fini bərə məssarang, wʊtangnga fʊri, wʊtangnga suu, yəngnatang, bərə yʊwʊrtang a mʊra jiya dautənwi. ¹⁷ Kang ke nyang na bəra niya Niyajiyʊwi, a chi ya riri bwi, na kʊra bərə swiyər də nyan warigʊ.