¹ Mən nən wai sori rə kumniyʊ a kak ka Niyajiyʊwʊng tən Nigra Kristi Yesʊwʊng, wʊ ba nəngngatəng duuta bərə yuumuməm na ba bɨtɨro-bɨtɨroiyəm, na bo bərarə betang ka gəng na dʊʊtəttangʊwʊm. ² Wau bwamhən; Kʊra bwi, rə fʊlla rə me fʊlla we. Mwe su, wʊla wer, bau jiir, rə mitang ka daang na məssarang. ³ Bəraki fʊlla ka bere wʊ nəb me ba tɨ məssarang kə nyangəng. A nyangi, ba li fautang a kʊraten nəb məssarəm ba dautənna furna jiyʊwʊm. A ba chi a sotənnə jɨni suna jiyʊ farə go tə nwiyʊ. ⁴ Ba wʊlgamən sunan jiyʊ a məssarang kə nyang, ba kautən bwi a kʊtəsəngni rə kʊni. ⁵ Mənni mwe nəngnga deen a mʊra jɨni warigʊ. Mida rə notang a kʊnang, na nəngnga swiyer da ni wari yəm bə Ləmmangngəm; ri swiyer da mʊn. ⁶ Bəraki mən tɨtɨ. Fʊlla bən di gəri ka lauwe. ⁷ Kən nəngnga lwigori nya, kən mwarmən lwigori, kən tau yəm bə nyam. ⁸ Kən timən gʊrmʊng ka dautənwʊng, wʊ Nigra, Ni nəngnga duutətta dautənwi ba ni a ko hiyʊ, me mən kwan bo, mənni rə ba yotən da betang ka gəngngəng. ⁹ Fʊm bwiyamʊ nan be mən wʊlak. ¹⁰ Bəraki Dimas ka dwi. Ka yotən da gʊsəte, ka diya Tassalonika. Kariskis ka diya Galatiya, Titus bo ka diya Dalmatia. ¹¹ Nən kanən Luka gən kwan. Fauwe Markʊs natə be kin; Karə fini ya mi bərarə swiyərhən. ¹² Kən təm Tikikʊs a Afisus. ¹³ Be mənnə dʊgkən məra bwi rəgəng kən dʊwewa Tarʊwasa a gwan Karbusi; berə ki, tai mənne tən wani, me nyəra wani yəre. ¹⁴ Iskandari ni sum mʊnti ka nəngngai mən ji bwira rə kwani. Nigra ba mər a switənna swiyer da gən. ¹⁵ Mʊ hai yəmən bwi we, bəraki ka nəngnga kak rə bwantətta nənnʊ dəni. ¹⁶ A fʊlla mən yiya dʊr da menni, me ni ya bəmtənna mi. A nyangngi, kən mwaramən na mi. Me mən farə mo ke jɨni yaiye a dʊtəttan jiyʊ. ¹⁷ Bəraki Nigra ka bʊ buka miyəng; ka ni kumniyəng, naki a mʊra mi finang ba nya ritang, na ba nəb bə me Yahudawam warigʊ a nwi. Kən jəgiye wa nyi ya turrəmmi. ¹⁸ Nigra ba yiyaiye wa mʊra swiyetəttə bwirai warigʊ, ba yiyai bərə dʊʊtetang gʊ ta jiyʊ. Grata chi a hangʊwi kʊrəkwang. Amin. ¹⁹ Simən Briskilla, Akila, na kai ta Onisifurusi. ²⁰ Arastus ka chi ya Korinti, mənni kən dʊ Turufimʊs me bwi ləmmang a Militus. ²¹ Nəngnga jin dəməni na be rə təm bwangrəm. Yuumbulus kə sənne, nyang rə nən Budis, Linus na Kalaudiya na Chətte warigʊ. ²² Masi Nigra chi rə we mʊ. Masi nəttəttən dautən