¹ Mwe bərarə waiwe, bwe miyʊ, yɨgtən kumni a mʊra nəttətən dautən bəwi ta ka Kristi Yesʊwi. ² Jɨni yən nwi a gwa miyʊ a jʊgər da nəb mwamən, dəgtənna nəbba nəbbən yəm bə nyaməm, bə ba dəmən a məssatənna bagiyəm. ³ No kʊnnangngi nən me, nyəra ni barə kərangngi nya wa Kristi Yesʊwi. ⁴ Me ni barə kərangngi wʊ nəngnga swiyər nyagʊ a jii ka soltən na jɨnna gʊsəti ki ba dəmən a ləm bwi nigra gʊwi. ⁵ Nən nyang, ki ka gʊ nəngnga lwigora nyəra bwe yuumti ki me mən butən gʊrmʊng a fʊng bə sori ya ligoriyʊ ki. ⁶ A chin kwak kweli a swiyər jurənni a sʊ hartang a sənnang rə jigʊ. ⁷ Nəngnga kəmmarang a jimən sʊweri, bəraki Nigra ba nən jəgatang a jɨni warigʊ. ⁸ Kəmma nən Yesʊ Kristi, wa jɨre wa Daudai, wʊn gug a mʊra ba bɨtɨro-bɨtɨroiyəmi. Nyəngkə ka gəra yəmbə Ləmmangngəm miyəməm. ⁹ wʊ mən no kʊnnang yɨgira chənte nyəra ni wa nəngnga bwiranni. Mənni bwan da Niyajiyʊwʊm me mʊra chənte. ¹⁰ Bərarə nyang bo, kən mida rə jɨni warigʊ bərarə bən samənsawiyəm, na ba hanjim a nya yiyarang kə ka mʊra Kristi Yesʊwʊng, rə gratəttə kʊrəkwangngi. ¹¹ Bam yəm be bə nga gərəm: "Nən bwiya kin ki, bənən nəngnga yuumum kin. ¹² Nən mida ki, bənən nəngnga dʊʊte kin, nən jau buriyan gʊ ki, gə bo ba jau buriya nənnʊ. ¹³ Nən yʊllo bə meri yobi nyaiyəm ki, hangʊ nən yobi nya jʊtəkwang, bəraki hangʊ me ba jau buri a dʊr da gənni. ¹⁴ Kəmmatənna hanjimi jɨni yaiye. Na wʊten su a chəriya Niyajiyʊwi, kari ba chi a bwigatəna bwante. Bəraki me gʊji rə fini a yai jɨni. Bərarkə ka yarri we a gwa nəbba kautən suwʊm. ¹⁵ Nəngnga pərsə-pərse na ne dʊr da mʊn nyəra rə niya swiyeri wa Niyajiyʊwi wʊn nga rəgi, wʊ me jiya bujəriyʊ a gwa giyʊ, wʊ məssatən na nəb bwan da yəm bə nyaməm. ¹⁶ Mwa mənna yəm bə bwiram, bə dəg nəb a bʊnai yəmtang ka Niyajiyʊwʊng. ¹⁷ Yəm ba jiyəm ba wassə bwi nyəra blabansang. A mʊra jiyʊ nən Himinayuums tən Filitus. ¹⁸ Nəb bam be ka dimən na yəmbə nyam. Ka sʊwe go kən nəngnga gʊntang ka bwiyatəng kʊni. Ka lugromən nəbbəntanga yəm bə nyaməm ba ba giyəm. ¹⁹ A nyangngi bo, jɨng ta Niyajiyʊwi rə kʊmmiyʊ ka chi bwi. Karə kʊrang de: "Nigra ka yəm bənən bəgəm-məm," bo, "Warigʊ wʊ bɨra jiya dʊn da Nigran a chin kwak a wʊlgamən bwi a bʊnai ya yəm bə nyammi." ²⁰ A kaita ni rə jɨnna kaniyʊwi, men wete tərə chəmmər na tə kəlchə-kəlchi gən kwan. Nən nyang ka jɨnna swiyər ri ya riti na ya jəi. Yaggi bərə swiyər də nyan, yaggi bo bərə swiyər də merə wertangngəng. ²¹ Mənni wa tʊmmən dʊr da gən a swiyer də merə wertangən ki, ka chi jiya swiyeri nya. Kən samən, ka rə fini a gwa ni rə kaiyʊ yəngnatang a dən bərarə swiyer də nyan. ²² Mwamənna jəllən da bweltən, na tʊgo jɨni nyai, nəbbəng yəm bə nyam, yodai, tən chimbə ləmmangəm bərare dʊn da Nigran a mʊra fʊri nya. ²³ Mənni kwila gʊlteta mɨti tə me rə fini yʊ. Kən yəm mo ji fʊngə rə buri. ²⁴ Kewe Nigrai kari ba chi rə bwelte. A jiya nyangngi, a chi kwak a yʊllo ni rə səgtangna dʊrri yɨgira warigʊ, a dəmən məssarang, rə mitang ka dang. ²⁵ A chin kwak a rə səgtang a dʊr a məssatənna na bə me bə nga hangʊwʊm. Kai ki Niyajiyʊ ba ne butang ka kangngəng bəri yəmtang a yəm bə nyam. ²⁶ Ba dəmən a kauwe bwi a mʊra yobi nya jiyʊ a dʊ chim ba Chetanəm, a bukkə hangʊ kəna tau hanjim a kəmmarang ka gəngngəng.