¹ Kʊ a jiya betang ka Nigra nənʊ Yesʊ Kristiyəng tən kʊrgatang ka nənnəng na nən chin nən hangʊwʊng: kənən chəlla gənə, chəttə, ² kari bətə da dʊtətta jɨnʊ, rə gʊ we, bo rə bagi yəm, na kagi wang ka nəngnga da jɨre wa nənniyəng, kə sʊwe rə go, ko Nigrai ka be kʊ ni. ³ Kari gʊ ba jʊlagən a gʊ jʊwi. Bəraki ko hi me ba lauwe bə ba yəram rə betang, yɨgira fʊlla wʊ bə nʊngbən ni nəngnga bwirani, yəlliya lʊgtətangngi. ⁴ Wai we gə wʊ nəngnga kaggi na bo wer dʊr da gən a ni a ji a wʊ bərə mo Niyajiyʊwi na bo ne grati. Ji wʊ fʊngə buggi, ba chi a kan da rʊwani nyiyin da Niyajiyʊwʊng a ti dʊr da gən go gən Niyajiyʊ. ⁵ Tə kəmabə ga fʊlla nən ka kini kən sʊgəmən jɨni yaiye warigʊ ga? ⁶ Kʊ kətə yəm jiya si nən hangʊwi, na bən nʊngnge hangʊ a fʊlla dautənwi. ⁷ Kʊ jiya kəllʊ-kəllʊ bwiyʊ wa bʊnai ya goriyʊ swiyeri, wa ji ya swiyer mənNi ka gʊ wʊ dang rəgi bera fʊlla bən dəbmən hangʊwa jʊwi. ⁸ Ki mənni kən jəgge wai we me bə fʊng sori yʊ, wʊ Nigra Yesʊ ba ju rə yuumum ba nyiyan gʊwiwʊm. Nigra ba fʊlga hangʊ a chi me rə fini a kweterei a betang kangəng. ⁹ Wai wʊ me bə fʊng sori ba be a mʊra swiyer da Chetanən, rə kumnitangʊ warigʊ, rə nʊngtang a jɨniya mənatangnga bʊniyʊ ya nyati. ¹⁰ na bo rə jʊllai rə bʊnai ya nəngngatang a nyagʊwi. Jɨni warigʊ ba chi ya bam ba bɨtɨrom, bəraki hanjim a yəbə yodaiya yəm bə nyami na ki hanjim a nya jəgtang. ¹¹ Bərarə nyangi Niyajiyʊ ka təmtəne swiyer da nigatangnga səttəng, na ba hanjim a nga rə nyar. ¹² A ji fʊngnge re hanjim warigʊ nəngngatən duute, ba nga bərə yəm bə nyamməm a nyangngi bo a nwi ləmang ka jɨni bwiraiyəm. ¹³ Mənni tənnən chi rə wʊnnan jʊtəkwang a Niyajiyʊwi bəra nən jɨn, chəttətə Nigra yotən dai. Niyajiyʊ ga sagəmmən nyəra buwʊng kə rə jigʊwʊng ka yiyarangəng bərə jəgtangnga tən tʊməntang ka Weng na ngatang a yəm bə nyam. ¹⁴ Wai we gən ji hangʊ a bəgəne gəri a mʊriya yəm bə ləmmagəm na tə nya grate a gwa Nigra nənʊ Yesʊ Kristiyʊ. ¹⁵ Bərarə nyang, chətte, tə si rə kumni. Tə tau yobi məssagəməni, a mʊriya bwantə na mʊriya waniya nənʊ. ¹⁶ Kʊ masi Nigra nənʊ Yesʊ Kristi rə bwigo, na Niyajiyʊ Te nənʊ wa yobəmmən dai a nəbbən titang ka fʊriyəng kə kʊrəkwangəng tən bautang a fʊri wʊ nya yɨgira ji beri a mʊra nəttətən dautən bə wi, ¹⁷ a səngəmən na mʊ furna jɨnʊ a mʊriya swiyer də nyan na bwan.