¹ Kʊ chətte, tə rʊwa bəmən nyini, na bwanda Nigran a jau kak na nya grate, nyəra kə karəga jɨniyəng. ² Tə rʊwa nyini na nən nya jəgtanga kang a ji bwira na ka nəbbə bwiraməm, bəraki waringəm rə nəbbəntang a yəmbə nyam. ³ Mənni Nigra nən yəm bə nyam, wʊ ba mʊ gən na jəgən a kang ka wʊ bwiraiyəng. ⁴ Kənən bau fʊri rə Nigra a ji ya jɨni, mo ka tə nəngngare, bətə jau kak rə nəngngatang a jɨni nən sʊgəməni. ⁵ Masi Nigra fʊng rə furna jɨnʊ yɨgira yodai a Niyajiyʊwi na rə mitang ka dang ka Kristiyəng. ⁶ Kʊ kə nən bagəmən jiir, chətte, a mʊriya dʊn da Nigra nənʊ Yesʊ Kristiyəng, tə mwamən a chi wa chi chiyəm bərə kʊnəmmi na me mʊra yobi tə yʊ a gwa nən niyʊ. ⁷ Bəraki rə butəjɨni kətə yəm to ka nyagʊ tə məssamən a nənni. Nən chi ba jʊgər da jɨnnən nyəra nəbən yʊwʊr bəm. ⁸ Nən jabə jɨni jauri ya gʊwi nən mər be. A nyangngi, kə nə nəngnga swiyer kum rə ko a mʊra kʊnang swiyer na kwewi, bəra ki me nən fa rə no nən nee nəggənni gʊwa jɨnʊ. ⁹ Nən nəngnga nyang, me mo me nənnə kumni. A nyangngi nən nəngnga nyang no na chi jiya məssarangngi a jɨni, natə məssamən a nənni. ¹⁰ A fʊlla tən nən ka kini, kə nən nəggən sori no, ''Wʊ me bə farə go gə nəngnga swiyeri kari ba jau jɨni jauri.'' ¹¹ Bəraki kənən nwi mo bagi ba jɨnnəm bə chi chimbə rə kʊnəm. Me bə nəngnga swiyer mənni bə mʊrga nəb. ¹² Kʊ bam be gə bə nən nəggən sori a jiyəm na nən bagəmən jiir a mʊra Nigra Yesʊ Kristiyəm, no na nəngnga swiyer rə kəmmarang kə nyang na jau jɨni jauriya jiyʊ. ¹³ Mənni jɨn, chətte, kari bətə dʊ nəngngngatang a ji nya. ¹⁴ Ki gʊ ba kwila nwitang a bwan da nənnən a wankang ke ki, tə jəga hangʊ na kari bətə chi chim kin,na ki hangʊ a nwi bujəri. ¹⁵ Kari bətə ti a nyəra ni a kakgi, mənni tə wʊtən sʊ a hangʊwi nyəra chi. ¹⁶ Masi Nigra chim bə ləmməngngəmi rə bwigo a nəggən chim bə ləmməngngəm jʊtəkwang a wʊna jʊwi. Masi Nigra chi nən jɨn warigʊ. ¹⁷ Kang kə gən sʊrang ka miyəng, me Bulus, rə kang ka miyəng, wai we jiya nʊngtangngi a wani warigʊ. Mən mʊla nyang. ¹⁸ Masi nəttəta dautən bəwi ta Nigra nənʊ Yesʊ Kristiyʊ a chi nən jɨn warigʊ.