¹ Bulus, Silbanus, tǝn Timoti, yɨgira Ekkilisiya ka Tasolonikai a mura Niyajiyʊ tǝn Te nǝnʊ na Nigra Yesʊ Kristi. ² Masi nǝtǝttǝn dautǝnbǝwi a chi nǝn jɨn rǝ chimbǝ lǝmmangǝm a gwa Niyajiyʊ Te nǝnʊ na Nigra nǝnʊ Yesʊ Kristi. ³ Tǝnǝn chi rǝ wʊnnan a Niyajiyʊ jʊtǝkwang bǝra nǝn jɨn, chətte. Wai ji we ka dautǝn we, bǝrari nǝbbǝntang ka yǝm bǝ nyam ba jɨnǝm kǝ grarǝ deni, na bo yogotang ka dang ka jɨnǝng kǝ yɨgtǝn bwi. ⁴ Nən rə bʊtənəni kǝnǝn sʊ yǝm dʊr a səssi a sǝttǝni ta bǝn Ekkilisiya Niyajiyʊwi. Nǝn sʊ yǝm a ji a mitang ka dang ka jɨnǝng tǝn nǝbbǝntang ka yǝmbǝ nyamǝm a mura kʊnang kǝtǝ ka mʊriyəng. Kǝnǝn sʊ yǝm a kʊnang kǝtǝ mida gǝrǝng. ⁵ Wai we gǝn wullo dʊʊtǝta Niyajiyʊwi tǝ nyai. Ji be rǝ gi bǝn ti gǝn a ba dautǝn wa a dʊʊtǝtta Niyajiyʊwʊn no kʊnǝng bǝra rǝgǝng. ⁶ A chi ji nya a gwa Niyajiyʊwi a jautǝn kʊnang a ba nǝggǝn kʊnangngǝm, ⁷ na bo nǝggǝn gǝri jǝn bǝtǝ nǝn no kʊnnang kinǝm. Ba nǝngnga nyang a chutang ka Nigra Yesʊwʊng a mura ji tǝn wǝni tǝmri ya kumni tan gʊwi. ⁸ A mura sǝllǝn da kərangǝng ba yamǝn jwagǝr da gǝn a ba yǝmbǝ Niyajiyʊwʊm tǝn ba yəbǝ yǝm lǝmmangǝm ba Nigra Yesʊwʊm. ⁹ Hanjim ba no kʊnnang kǝ kʊrǝkwangngǝng pre rǝ kag ka Niyajiyʊwʊng na bo gratǝtta kumnitan gʊwi. ¹⁰ Ba nǝngnga wai jiwe a fʊlla a be a ko wʊ nǝbban gǝm ba ne gratǝm na mǝna bʊntǝ rǝgǝ hanjim ba nǝbǝn yǝmbǝ nyamǝm warigʊ. Bǝraki kǝtǝ nga rǝ bʊtang ka buggǝng ka nǝnnǝn jɨn bǝtǝ nǝbbǝn yǝmbǝ nyamǝm. ¹¹ Bǝrari wai ji we nǝn ka nǝn rʊwa nyini jʊtǝkwang bǝra nǝn jɨn. Nǝn rʊwa nyini no Niyajiyʊwa nǝnʊ a ti gǝn kǝtǝ dautǝn wa buwʊng ka jɨnǝng. Nǝn rʊwa nyini no a rigǝmǝn ji nya tǝ fari rǝ swiyer dǝ nyan tǝn swiyer da nǝbbǝntang ka yǝm bǝ nyamǝm rǝ kumni warigʊ. ¹² Nǝn ruwa nyini bǝrari yai jǝniye na ki dun da Nigra Yesʊwun a nya nǝbbǝntang a grate a gwa jɨniyʊ. Nǝn rʊwa nyini no hangʊ a nǝggǝn grate, bǝrarǝ nǝttǝtǝn dautǝn bəuwi ta Niyajiyʊwa nǝnʊwi na Nigra Yesʊ Kristiyʊ.