¹ Nǝn fau no tǝ yǝm, chǝtte, a jiya nəttəta Niyajiyu a ne Ekklisiya ka Makidoniyai. ² A fulla bǝnggorang ka kunongngǝng, furdǝ kwauwun da mwamən da jiyǝn rǝ nəggəni ya bunǝn da jiyǝnni ka betənnə nǝbbǝntang ka jiyǝng was-wasi. ³ Bǝraki kǝn nǝbǝn butangka bugǝng, ka nǝbǝn a mwam a sumən na nyəngka dǝmǝn rəgəng. A ngatang ka furan jiyuwung. ⁴ Rə chǝllan deni go nǝggi sǝr tǝ nǝngngatǝn dan swiyer da nǝbba yəbbə yəmbə nyamǝm. ⁵ A nǝngnga bə bwi nyang nyǝngkǝ nǝn kǝmma rǝgǝng. A jiya nyangngi, hanjim ka suwa ne duttətan jiyu a gwa Nigrayǝng.Bo ka nǝbǝn dutəttan jiyu a gwa nǝnniyu a jiya kǝmmarang ka Niyajiyuwung. ⁶ Kǝ nǝn yǝgtǝn kumniya Titusiyǝng, wu su dan swiyer kuniyu, na ba mwarmǝn swiyerda nǝbǝntangngǝn a kullo jǝnniyu. ⁷ Mǝnni kǝtǝ jau kak a mura wunǝ ji-a mura nǝbǝntang a yǝmbǝ nyam, a mura yǝm, a mura yǝmtang, a mura swiyer rǝ kumni, a mura yodaiyan jǝnu bǝri nǝn nǝn. Bǝrarǝ nyang tǝ yǝm to kǝtǝ jaukak a jiya dan swiyer da nǝbǝntangngǝn. ⁸ Mǝn suwe nyang me mo mǝn kwakgi. A jiya nyangngi, mǝn suwe mo na bǝnggo nyaguwi yodai yan jǝnu a gwa bǝnggotang rə tǝrsatang ka bagi nǝbbǝng. ⁹ Bǝraki kǝtǝ yǝm swiyerdǝ nyan da Nigra nǝnu Yesu Kristiyǝn. Nǝn kwini hangu ni rǝ jǝna kaniyu, mǝnni ka yullo wu rǝ bunǝnni, na ba a gwa bunǝn da gǝnni tǝ nǝngnga jǝna kani. ¹⁰ A wai ji waiwe bǝn nǝgǝn yǝmbǝ ba tuga gǝnǝm. A jǝr da suwun, tǝ subǝ nəngngatang a guji bwigi, mǝnni kǝtǝ fau nǝngngatang. ¹¹ Tǝ mwarmǝn ku. Nyǝnkǝ tǝ ka tǝnǝ kǝmmarang to tǝ nǝngnga rǝga wai fullang, masi tǝ tǝrsa tǝ be rǝga mwatǝnte a dǝmǝntang ka jǝnǝng. ¹² Ki ka tǝnǝ kǝmarang ka nǝngngatang a dan swiyer dǝn ki, ji nya wun yuwi bo. Ba chi a ji wu ni karǝ gi men ji me gǝri. ¹³ Bǝraki swiyer dande me mo na ba sǝnggǝmǝn nǝggǝni na bagi ya nya dǝndeni. A jiya nyangngi, ka dautǝnwe nya dǝggitang a jʊgʊr. ¹⁴ Nyatang ka jǝnǝng a wai fulla we ba yullo jiya mǝrtang ka bunǝn da jiyǝn ni. Nyang bo na ba nyatang ka jiyǝng a dǝmǝn mǝrtang ka bunǝnǝn da jǝnǝn, na ba nya swigotang. ¹⁵ Nǝn nyang nyǝngkǝ mulla rǝgǝng: ''Wu ka rǝgǝ mwami a nya bǝ gujiya dutǝn, bo wu ka rǝgǝ baniyu a buna bǝ guji.'' ¹⁶ Mǝni wunnan yigira Niyajiyuwi, wa dǝg jǝllǝna furiyan Titusi a kǝmmarang kǝmən gǝra bǝri nǝn jǝnǝng. ¹⁷ Bǝrakǝ hangu a yə bə chǝllan da nənnən gǝn kwan, nyang bo ka chi rǝ yǝmbǝ nyam a ji. A be gwan jǝniyu rǝ ngatang ka gǝng. ¹⁸ Nǝn tǝmme hangu tǝn gu chiya nənnu wu ka werra sǝtǝni ta Ekklisiyai warigu bǝri swiyer da gǝn da finang ka yǝmbǝ lǝmangǝmmǝn. ¹⁹ Me bǝri nyang nyǝnkǝ gǝn kwan, bǝraki Ekklisisya jiya samǝn hangu go nǝn diya kin a mura dan swiyer da ji nyan. Kangkǝ bǝri netangnga gratǝ Nigra rǝ bwigo na bo bǝrarǝ faurang ka nǝnǝng ka tugarangngǝng. ²⁰ Nǝn mwa no kari gu ba nǝbǝn bwiran a jiya kang nəbbəntang kə nəngngarəng. ²¹ Fautang ka nǝnǝng no nǝn nǝngnga jiya dautǝnwi, me kakka Nigrang gǝn kwan, mǝni a kakka nǝbbǝng. ²² Bo kǝnǝn nǝn tǝm gu chiya nənnu tǝn hanjim.Kǝnǝn no bǝnggotang a hanguwi, mǝnni kǝnǝn nya ka tǝrsara gwa swiyeti mwam. Ku bo ka yǝgtǝn tǝrsatang, bǝrarǝ ngatang kǝ ka rǝgǝng a gwa jǝniyu. ²³ A ji Titusi, chugo yomi ya miyu, bo chugo swiyeri ya miyu bǝri nǝn jǝn. Bǝraki na chǝtǝtta nǝnnu, nǝbbǝ Ekklisisya tǝmme. Hanjim bo kwetǝrei ya Kristiyu. ²⁴ Bǝri nyang, tǝ nung yodaiyan jǝnu, na bo tǝ nung Ekklisiya jiya dǝg kinǝn nǝngnga mǝksa a jiya jǝniyu.