¹ Kǝnnǝn kabi nǝn su nǝn wer dutǝtta nǝnǝn ga? Me nǝn farǝ waniya butangnga durri yigira jǝni na bo bera jǝni nyǝra ka bagi nǝbbə ga? ² Jǝn rǝ butǝjǝni jǝntǝn wana butangnga bukka nǝnǝngngi, yǝ mula furna jǝnuwi, yǝ nǝb warigu a yǝm na keri. ³ Kǝtǝ nung to tǝn wani a gwa Kristiyu, ya jire wa nǝnniyu. Mula bǝrǝ dor; mǝni nǝn We Yulgoi ya Niyajiyu rǝ yuumi. Mula ba jiya wettǝtǝn mula jǝniwi, mǝnni mula mura wetǝta furna nǝbbiyu. ⁴ Mǝnni waiwu gǝn dura sim nǝn ka gǝra mura Kristiyu a kakka Niyajiyuwi. ⁵ Nǝn me nǝnǝ dǝmǝntang ka dutǝtta nǝnnuwung kǝ bǝnǝn gug dur gǝrǝ no guji ka jǝrera nǝnniyu. A jiya nyangngi, dǝmǝntangka nǝnǝng wa gwa Niyajiyuwi. ⁶ Niyajiyu ga dǝgbǝn nǝn chi rǝ dǝmǝntang na nǝn yullo bwiranǝm ba yǝm burǝm bǝ fiyǝm. Bam be me butangka yǝmǝng kǝ mularǝng mǝni ba Wem. Bǝrakǝ mulatang bǝ muktǝ-mukte, mǝni We bǝ nǝbbǝn yuum. ⁷ Mǝnni swiyer dǝ berǝ bwiyatǝn-dǝn mula jiya wetǝn-a be mura tai gratǝtǝ nǝbba Isra'ilam me ba dǝmǝn jǝga kakka Musang dura sim rǝgi. Nǝn nyang bǝrarǝ gratǝtta kakka gǝngngi, gratǝtǝ surri. ⁸ Gratǝtta swiyer dǝ We nǝngngari bǝn bǝnggo nǝn wullai? ⁹ Ki swiyer da yartangngǝn karǝ gratǝ ki, bǝn bǝnggo mwami ya gratǝtta swiyer dǝ nyani nǝn wulai! ¹⁰ Me jugurwe, ji wuna ti a yullo grati, me rǝ tǝgai grate ta li taiyu, bǝri rǝ gratǝtta li taiyu. ¹¹ Mǝnni ki wu suri karǝ gratǝ ki, mǝnni gratǝtta wu mebǝ suri ba nu nyinne! ¹² A chi nǝn ka nǝnǝ durra simǝng, nǝn me nǝnnǝ tate. ¹³ Nǝn me nyǝra nǝn Musa wa dǝb dug a mǝra kakkangǝng rǝgi, nyǝngkǝ nǝbba Isr'ilam me ba dǝmǝn a jǝga gratǝttǝ suri rǝgǝng. ¹⁴ Mǝnni kǝmarang ka jiyǝng a mǝra-mǝra bwi. Berǝ tǝn ku dughǝng ka gai a jiwun kerǝ yǝm burǝm bǝ funiyǝm. Wumǝn be, bǝraki mǝn wumǝn a mura Kristiyu gǝn kwan. ¹⁵ Mǝnni berǝ tǝn ku, fulla wun kǝrǝ wangka Musangngi, dug mǝranǝng ka mǝra furna jiyu. ¹⁶ Mǝnni fulla wu niya wulgatǝn bwi a Nigrai ki, kǝn kulmǝn dug mǝranang. ¹⁷ Nigra gǝn We. A gu We Nigrai kawi, ka nyatangnga dur we. ¹⁸ Wariguwa nǝnnu ku, rǝ katǝttǝ merǝ dug mǝranǝngngi, ka nǝn churǝ gratǝtta Nigrai. Kanǝn nyarǝ wulgatang yigira tai grate, a dǝgai gran yigira dǝgai gran, nyǝra gwa Nigrai, wu gǝn We.