¹ Bǝrarǝ nyang kǝn dǝb a furiya miyu, mo mebǝn kabi yǝga jǝni a muriya yobi swibwiyu. ² Lʊktǝgǝmǝn furi ki wunǝ gǝba ni bwilǝmri, a li waiwu lugtǝmǝn furiyu? ³ Mulagǝmǝn nyang nyǝngkǝ na ba fulla be gwa jǝniyu kari bǝ na ba ni bwilǝmriyu a lugtǝmǝn furi. Mǝn ka mǝnǝ durra sim a jiyan jǝni warigu, mo fur dǝ kwauwun dǝ mǝn ka rǝgǝn, gǝdǝ tǝ ka rǝgǝ wariguwun. ⁴ Bǝrakǝ mula gǝmǝnne a mura kwewi rǝ fuddǝ yulluwun na bo rǝ betǝkǝmi mwam. Me mǝn farǝ mo mǝn dǝggǝna furdǝ yulluwun, a jiya nynagngi, fau mo tǝ yǝm wulluloi a yodai mǝn kamǝn gǝra jǝnniyu. ⁵ Ki gu ka wa berǝ furdǝ yulluwun ki, a betǝn bǝ gǝra mi mǝn kwan, mǝnni a gu kullo-na ba kari bǝn suwe rǝ kwewi-yǝgira jǝni warigu. ⁶ Wunglatang ka wai niyǝng a kang ka nǝb mwamǝng ka sitǝn. ⁷ Bǝrarǝ nyang, a ku a nyiya wunglatangngi, tǝ yunotǝn, na bo tǝ sǝngtǝn furi a hanuguwi. Tǝ nǝngnga nyang bǝri furdǝ yulluwun ba nǝngngatǝn mwam a hanguwi. ⁸ Bǝrarǝ nyang mǝn nǝggǝn kumni mo tǝ nung hangu yodai kwǝtǝre. ⁹ Wai jiwe gǝ Jiya nǝngnga ki mula gǝmǝnei, na ba bǝnggogǝn, na yǝm ki ka tǝ nwi yǝm a jǝni warigu ki. ¹⁰ Wu tǝ yunnotǝni, kǝn yunotǝnna wai ni rǝ kinang. Ji wun yunoi- ki karǝ guji bǝn nǝngnga yunorangngi ki- nǝngnga yunorang bǝri nǝn jǝn a kakka Krisityǝng. ¹¹ Kangkǝ nyang bǝra Chetan ba mǝblobǝn. Bǝrakǝ nǝn me nǝnni bunai a yǝmtang a kǝmarang ka gǝng. ¹² Kǝn nya Nigra wumimǝn fugong a fulla wun yigi bɨrda Tarwasani, na wau' yǝmbǝ lǝmmangngǝm ba Krisitiyǝm a gaiyǝm. ¹³ A nyangngi, furiya miyuwa da be, bǝrkǝn chubǝ chiyamiyu Titus a gai. Kǝn duwe hanjim a gaiyǝng, n'kawebwi a Makidoniyang. ¹⁴ Mǝni masi wunnan a chiya Niyajiyuwi, wa mura Krisitiyu nǝbǝn nyatangng a kunni. A gwa nǝnniyu, ka wassǝ mǝtǝmǝtǝ ləmmangngi a gani warigu. ¹⁵ Bǝrakǝ nǝn, a gwa Niyajiyuwi nǝn mǝtǝmǝtǝn ləmmangngi ya Kristiyu, a jugǝr da bǝn yiyarǝm, na bo a jugǝr da bǝ bǝtǝrorǝm. ¹⁶ A gwa bǝ bǝtǝrorǝm, mǝtǝmǝtǝ a bwiyatǝn yigira bwiyate. A gwa bǝ nyarǝ yiyarangngǝm bo, mǝtǝmǝtǝ a yuumi yǝgira yuum. Wunǝ ga dautǝna yai jǝni yaiye? ¹⁷ Nǝn me nyǝra nǝb mwam bǝ miro yǝmba Niyajiyuwum bǝrarǝ nyatangnga. Ajiya nyangngi, rǝ kǝmarang kǝ yulgong, nǝn su yǝm a mura Krisitiyu, nyǝngkǝ Niyajiyuwa tǝmbǝne gǝrǝng, a kakka Niyajiyuwung.