¹ Bulus, ni tǝmri ya Kristi Yesuwi a gwa Niyajiyuwi na Timoti chiya nǝnnu, yǝgira gwa bǝn samǝn sawiyǝm rǝ ngatang ka Niyajiyuwung bǝ ka Korintusǝm, na bo ba nǝbbǝn yǝm bǝ naymǝm warigu bǝ ka kullo tǝmba Akayayǝm. ² Masi nǝtǝttǝ nǝn dautǝnbǝwi a chi nǝn jǝn na bo chimbǝ lǝmangngǝm a gwa Niyajiyu Te nǝnnu na bo Nigra Yesu Kristi. ³ Masi wertang a ci a gwa Niyajiyuwi na bo Te Nigra nǝnnu Yesu. Gǝn Te bomti warigu, na wa sǝngtangnga furiyu warigu. ⁴ Niyajiyu ka sǝngbǝmǝn furni a mura kunang warigu na ba nǝn sǝngtǝn furna bǝ ka mura kunangngǝm. Nǝn sǝngtǝn furni a bagi rǝ sǝngtangka furiyǝng kǝ Niyajiyu wa sǝng bǝmǝn furi gǝrǝng. ⁵ Bǝraki nyǝngkǝ kunang ka Krisityǝng a yǝgtǝn bwi bari nǝn nǝnnǝng, sǝngtang a furiya a nǝnnu ba nǝngnga mwam a mura Krisitiyu. ⁶ Mǝnni ki nǝn non kunang ki, bǝrarǝ sǝngtang ka furiyǝng ka jǝnǝng tǝn yiyatang ka jǝnǝng. Nyang bo sǝngbǝmǝn furi ki, bǝrarǝ sǝntang ka furiyǝng ka jǝnǝng. Sǝngtang ka furiyǝng ka jǝnǝng ka nǝngnga swiyǝr rǝ kwani nyǝng kǝtǝ mi da rǝ kunang kǝ nǝn norǝng. ⁷ Mǝnni durra sim ba nǝnǝm ka ci bwi, bǝraki kǝnǝn yǝm nyǝngkǝ nǝn ka kin rǝ ga mura kunangngǝng, nyang bo bǝnǝn chi kin a mura sǝngtangnga furi. ⁸ Mǝnni me nǝn farǝ no tǝ buna yǝmtang, chǝtte, a jiya kwewi ya nyabǝnna Asiyai.Kǝn mursǝbǝn warigu a li kumni ta nannu. Kǝnǝn jǝngmǝn furiya nǝngngatang nga yuumi. ⁹ Bǝ nyam, kǝnǝn nwi duutǝtta bwiyati a jiya nǝnni. Mǝnni a nǝngnga bwi nyang na ba kari bǝnǝn mutǝn ji a dutǝta nǝnnu, nǝn mutǝn ji a Niyajiyu, wu gug bwiyati. ¹⁰ Ka jǝgbǝna swi bwi bwiyati,ba kwabi ba jǝgbǝn bo. Kǝnǝn ti yamtang ka nǝnǝng no ba kabwi ba jǝgbǝn. ¹¹ Ba nǝngnga nyang nyǝngkǝ tǝ tuga bǝn rǝ ruwa bǝmǝn nyiniyǝng. Mǝnni mwami ba nǝngnga wunnan bǝra nǝn nǝn bǝri bwilǝmriya nǝttǝtǝn dautǝn bǝwi tǝn nǝngnga bǝmǝni bǝrarǝ nyini ruwani ya nǝb mwawi. ¹² Ka nǝn mǝksa rǝ rǝ nyang: butang ka bugǝng ka furna nǝnuwung. Mǝnni rǝ kǝmarang kǝ nyang rǝ jinya wu be gwa Niyajiyuwi gu nǝn yo yomba nǝnǝn rǝga gusǝti. Nǝn nǝngnga jǝni yaiye warigu nǝn kin-me mura bǝrsan da gusǝtǝn, mǝnni a gwa nǝtǝtta Niyajiyuwi tǝn dautǝnbuwi. ¹³ Nǝn mula gǝmǝn bǝ ji me bǝtǝ dǝmǝn tǝ ke na tǝ yǝmmi. Mǝn kǝmma mo ¹⁴ nyǝngkǝ jǝggabǝn bǝ wariguwung, bǝnǝn yullʊ jiya mǝksati a Nigra nǝnnu Yesuwi, nyǝnkǝ bǝtǝ yullʊ bǝmǝn jiya mǝksai rǝgǝng. ¹⁵ Bǝraki dur da miyǝn a sissi rǝ wai jiwung, kǝn fau mo mǝn ya a gwan jǝniyu rǝ jigu, na ba tǝ yu fini ta betang ka kaltǝ tǝsuwung. ¹⁶ Kǝ mǝnna nu mǝn kurabwi mo na mul a jǝni a fulla mǝn yigira Makidoniyai. A nyang bo kǝ mǝna fau momǝn mulla jǝni a fulla mǝn kawe bwi a Makidoniyaki, na ba tǝ yoiyi a juwiya miyu yǝgira Yahudiya. ¹⁷ A ji mǝn nǝngnga kang kǝmarangngi, kǝn nǝngnga jugur ga? Mǝn sur jǝni a mura kǝmarang ka niyǝng ga, nyǝng kǝ bǝn suwe mo, ''O, o'' na O, o, o, o ''a fulla kwan ga? ¹⁸ Mǝnni nyǝngkǝ nǝn nga rǝ Niyajiyu rǝgǝng, me nǝn suwerǝ no ''O'' na ''O, o'' a fulla kwan.'' ¹⁹ Bǝrki Yilla Niyajiyuwi, Yesu Kristi, wu me,Silbanus, na Timoti, nǝn si finang a mura jǝni yu, men ''O'' tǝn ''O, o.'' Ajiya nyangngi, a fulla warigu hangu nǝn ''O'.' ²⁰ Bǝrakǝ yǝm burǝm ba Niyajiyuwum warigu nǝn 'O' a mura gi. Nyang bo a mura ngi nǝn suwe no ''A chi nyang'' yǝgira gratǝtta Niyajiyuwi. ²¹ A ku nyǝngke Niyajiyu ga nǝbbǝn ngatang nan jǝn a mura Kristiyu, ka kawur bǝnǝng bo. ²² Ka bu bǝmǝn kʊran bo a nǝbǝn We a furna nǝnu a merǝ jugǝr we a ji bǝn nǝbbǝn a kaggi. ²³ A jiya nyangngi, kǝn bu Niyajiyu na bu bukka miyǝngngi, go jiya nǝngnga ki be ba Korintisi me mo na nya duggǝn. ²⁴ Me mo nǝn tǝrsa nyǝnkǝ nǝbǝntang ka yǝmbǝ nyam ba jǝnǝn ba ci rǝgǝng. A jiya nyangngi, nǝn nǝngnga swiyǝr kin yigira furdǝ kwauwun da jǝnǝn, A ji tǝ ka tǝ siya mura nǝbǝntangka yǝmbǝ nyamba jǝnǝmmi.