¹ A chin kwak bau furi, mǝnni nyabǝ guji we. Mǝnni mǝn jaukak rǝ churʊng kǝ prǝng na wullʊni a gwa Nigrai. ² Kǝn yǝm guni a mura Kristiyu, wu jǝttǝ kwu a jǝr tǝ gwa ya suwi- kǝ wa mura bwi ki, kǝ me wa bwi ki, yǝmbe, Niyajiyu ka yǝm-kǝn dǝb yigira jitǝtǝ bwanbiyu. ³ Bo kǝn yǝm mo niwai we- ki wa bwi ki, kǝ me wa bwi ki, yǝmbe, Niyajiyu ka yǝm- ⁴ kǝn dǝb yigira kaita Niyajiyuwi mǝnni ka nwi jǝni me mǝn dǝmmǝn suweri. ⁵ A ji a wai ni bǝn nǝngnga bautang ka furiyǝng, mǝnni a ji a dur da miyǝn me bǝn nǝngnga bautang ka furiyǝng, a dǝmǝn a kʊngngǝr kʊngngǝri a miyu. ⁶ Ki mǝn fau mo mǝn bau furi ki, me ba chi mɨ, bǝraki bǝn chi su yǝmbǝ nyam. Mǝnni bǝn mwamǝna bautang a furi, bǝri gu ba dǝbi a sumǝna jiya chu na nwi a miyu. ⁷ Bo bǝn mwamǝna gugtang a dur bǝrarǝ wai wulloni yǝ rǝ kumniyu ye. Na ba kari bǝn ri rǝ gugtang dur, kǝn ni tug bwiya miyu, bwira Chetani na wunlai re, na ba kari bǝn gug dur rǝ kwani. ⁸ Kǝn chǝlla Nigra kalli tǝ bwanbi na ba dǝbimǝn kangke. ⁹ Mǝnni a swimǝn go, ''Nǝtǝtta dautǝnbuwi ta miyu ka sitǝnsiya mwi, bǝraki kumni bǝ ri bwi a mura kʊngngǝr-kʊngngǝri. ''Bǝri nyang bǝn lii fautangnga gugtang a dur a jiya yarmǝntang ka miyǝng, na ba kumnita Kristiyu a chi ya gwa miyu. ¹⁰ A nyang nyǝnki, kǝn mida bǝrǝ Kristi a mura kʊngngǝr-kʊngngri, a yǝgtang a sʊ, fumtang, bǝngorang, na bo nǝggǝni. Bǝraki wunǝ fulla wun nya bwati ki, mǝn ka mǝnǝ kumni bo. ¹¹ Kǝn yullo mɨ! Mǝnni jǝn tǝ dǝggi kwak a nyangngi, kə na dautənwe tǝ weri, bǝraki yarmǝn ba bǝn bǝrǝ mo nǝb tǝmrǝm bǝ gramǝm, nǝn kwini mǝ mǝn guji ki. ¹² Nungtang ka riri bwiyǝng ka nǝb tǝmrǝmmǝng ka nǝngnga bwiya jugər da jǝnǝn, rǝ mitang ka dangnga riri bwi, rǝ nungtang na jǝna mǝnatangnga buniyu rǝ swiyetǝttǝ kuntai. ¹³ Yarməntang kə nyənnəng a gwa bagi Ekklisiya, mǝnni bo chi gəmən bə jiya nǝggəni ga? Tǝ yunoimǝn kan letang ke. ¹⁴ Jǝga! kən kura bwi na ba be a gwan jǝniyu kalang kǝn bwanbiyǝng. Me bǝn chi gǝmǝn nǝggǝnni, bǝraki men jǝna jǝnu. Kəmǝn fagəne. Bǝraki bǝtǝbbi me ba dəg nəggəni a nəb burəmi, a nyangngi nəb burəm ji ba dəb nəggəni a bətəbiyu. ¹⁵ Bən nəngnga bwiləmri mǝr bunǝn da jǝnǝn, a fau ki a chi rǝ yuum ba miyǝm. Kǝ kǝn yogǝmǝn dah rə kwani ki, ba dautən we yomən da bani ga? ¹⁶ Mǝnni nyǝngkǝ ka rǝgǝng, nǝgǝn bǝ nǝgǝnni. Mǝnni, mǝnǝn bǝrsan bwiran nəng. ¹⁷ Kǝn lʊktǝgǝn rǝ bǝn tungǝmǝnǝm ga? ¹⁸ Kən chǝlla Titus mo a yǝga gwan jǝniyu, kǝn murga hangu tǝn gu chiya nǝnnu. Mǝnni Tiyus a nǝngnga gəmən yari ga? Nǝn di bǝ yomma juwi kwani ga? Nǝn dəbə nani kwani ga? ¹⁹ Tǝ kəma a wai fulla warigu nǝn jǝg dutǝtta nanu a kakka jǝnǝng ga? A kakka Niyayuwung, a mura Kristi nən su jǝni warigu na tǝ nya kumni. ²⁰ Bǝraki mǝn lǝmma mo m'be ki me bǝn nyagǝn nyǝngkǝ mǝn kǝmma rǝgǝng. Mǝn lǝmma bo mo me bǝtǝ nyai nyǝnkǝtǝ kǝmma rǝgǝng. Mǝn lǝmma mo bǝn nya bunaiya nigotangngi, nugun, jwagǝr ba wumǝn bwi, fautang a furi, rə gugtang ka durəng, yǝmni kǝtǝl-kǝtǝlli, lǝngǝtələngi. ²¹ Mǝn lǝmma mo a bukkǝn kauwe bwiyǝng ki, Niyajiyuwa miyu ba dǝmǝna sǝggiya tǝm a kakka jǝnǝng. Mǝn lǝmma mo bǝn nǝngnga furdǝ yulluwun bǝrarǝ nǝbbǝ mwamǝm ba nǝngnga jǝni bwirai beri kuwum, bǝ bo a bʊ bǝkangnga bunaiya yulgoriyu rǝ taltǝ na dagatang kǝ kursǝnnǝng na swiyetǝtta jǝllǝnni ta nǝngngaiyǝm.